1 Тим 3 - У Сугынь

3 ГЛАВА 1-7 Черке вуйлатыше-влак нерген. 8-13 Диакон-влак нерген. 14-15 Молан тиде серышым возымо. 16 Христослан чапмуро.

¹ Тиде мут чын: кӧ епископ лийнеже гын, поро пашам ыштынеже.

² А епископ шылталаш лийдыме лийшаш: ик гана гына ӱдырым налше, айык, ушан-шотан, шкенжым сайын кучышо, [чыным йӧратыше,] корныеҥ-влакым кумылын ончышо, туныктен моштышо лийже.

³ Аракам йӱаш йӧратыше огыл, кредал коштшо огыл, [ӱчашыше огыл,] шкаланже пайдам кычалше огыл, но тыматле лийже, ынже ӱчаше, оксам ынже йӧрате.

⁴ Тудо шке ешыжым моштен кучышаш, йочажым мут колыштшым да чыла шотыштат чын илышым ончен куштышаш.

⁵ А кӧ шке ешыжым кучен огеш керт гын, кузе Юмын Черкыж верч тыршаш тӱҥалеш?

⁶ Епископ кызыт гына ӱшанаш тӱҥалше лийшаш огыл. Тыгай айдеме кугешнаш тӱҥалын да диавол дене пырля титаканыш лукталтын кертеш.

⁷ Еҥ-влакын титаклымашкышт да диаволын вапшышкыже логалаш огыл манын, тудо ӧрдыж-влак коклаштат пагалыме лийшаш.

⁸ Тыгак диакон-влакат чын илышаш улыт. Нуно кокыте ойлышаш огытыл, аракам йӱаш йӧратыше ынышт лий, шкаланышт пайдам ынышт кычал,

⁹ ӱшанымашын таинствыжым ару совесть дене пеҥгыдын кучышаш улыт.

¹⁰ Но нине еҥымат ондакше тергыман, вара, нуно шылталаш лийдыме улыт гын, тек служитлаш тӱҥалыт.

¹¹ Вате-влакат чын илышаш улыт, еҥ ӱмбаке ынышт ойло, айык, чыла шотыштат ӱшанле лийышт.

¹² Диакон-влак тек ик гана гына ӱдырым налше лийыт, шке йочаштым да ешыштым сайын кучышт.

¹³ Сайын служитлыше-влак шкаланышт кугу кӱкшытым ямдылат, да Христос Иисуслан ӱшанымаште нуно кугу лӱддымылыкыш шуыт.

¹⁴ Тый декет вашке мияш ӱшанен, мый тидым тылат возем.

¹⁵ А кучалтам гын, Юмын пӧртыштӧ еҥ-влак шкеныштым кузе кучышаш улыт манын, тыланетат палаш кӱлеш, вет тиде пӧртшӧ илыше Юмын Черкыже, чынын негызше да эҥертышыже.

¹⁶ Чынжымак, Юмылан ӱшанымашын святой тайныже пешак кугу: Юмо кап дене толын, Святой Шӱлыш дене чыныш лектын, Суксо-влаклан Шкенжым ончыктен, калык-влаклан Тудын нерген увертарыме, тӱняште Тудлан ӱшаненыт, Тудо чап дене пылпомышко нӧлталтын.