1 Тим 2 - У Сугынь

2 ГЛАВА 1-15 Юмылан кузе кумалман.

^1-2 Тыгеже мыланна ласкан, шып, чыла шотыштат Юмым пагален да яндар койышым кучен илаш манын, чыла еҥ верч, кугыжа ден вуйлатыше-влак верч эн ондак йодмым, кумалмым, сӧрвалымым, тауштымым эртараш йодам.

^3-4 Чыла еҥ утаралтше да чыным пален налже манын шонышо Юмын, мемнан Утарышынан, ончылно тидыже сай да келшыше.

⁵ Вет Юмо икте, Юмо ден еҥ-влак коклаште ушен шогышат икте – айдеме Христос Иисус.

⁶ Тудо чыла еҥым сулен налаш Шкенжым пуэн, шке жапыштыже таныклымаш тыгай лийын.

⁷ Тидланак мыйым увертарен туныктышылан да Апостоллан шогалтыме. Христос дене ушнен, чыным ойлем, ом шойышт. Чын Юмым палыдыме-влакым ӱшанымашлан да чынлан туныкташ мыйым палемдыме.

⁸ Тыгеже пӧръеҥ-влак, кидыштым яндар кумылын нӧлталын, шыде да кокыте шонымаш деч посна чыла годымат кумалышт манын шонем.

^9-10 Тек ӱдырамаш-влак чапыштым волтыдымо, шинчаш перныдыме да шотан вургемым чият, шкеныштым ойыртемалтше ӱппунем, шӧртньӧ, ракывотшер да шергакан вургем дене огыл, а поро пашашт дене сӧрастарышт. Юмын корно дене каяш шонышо ӱдырамаш-влаклан тыге ышташ келша.

¹¹ Тек ӱдырамаш, чыла шотыштат мутым колыштын, шып тунемеш.

¹² Туныкташ але пӧръеҥым вуйлаташ мый ӱдырамашлан эрыкым ом пу, тудо шып илышаш.

¹³ Вет эн ончыч Адамым ыштыме, вара – Евам.

¹⁴ Адамым ондалыме огыл, а ӱдырамаш ондалалтын да титакыш пурен.

¹⁵ Но ӱдырамаш ӱшанымаште да йӧратымаште пеҥгыдын шога да поро уш-акыл дене яндарын ила гын, йочам ыштыме гоч утаралтеш.