1 Тим 1 - У Сугынь

1 ГЛАВА 1-2 Саламлымаш. 3-11 Шояк туныктымаш нерген шижтарымаш. 12-20 Юмын порылыкшылан тауштымаш.

¹ Юмын, мемнан Утарышынан, да Господь Иисус Христосын, ончыкылык ӱшаннан, кӱштымыж дене Иисус Христосын Апостолжо лийше Павел деч

² ӱшанымылан кӧра шочмо эргыж гай лийше Тимофейлан. Юмо Ачана да Господьна Христос Иисус деч тыланет порылык, чаманымаш да тыныслык лийже.

^3-4 Вес туныктымым ынышт шаре, шонен лукмо ойлыштмаш да мучашдыме тукымвож нерген ынышт шонкале манын, тый икмыняр еҥлан кӱштышаш улат ыле. Чыла тидыже Юмын пашажлан огыл, а ӱчашымашым лукташ веле полша, Юмын пашаже ӱшаныме гоч веле ышталтеш. Садлан мый Македонийыш каяш лекмем годым тыйым Ефесеш кодаш йодынам.

⁵ Яндар шӱм, поро совесть да ондалыдыме чон дене ӱшанымаш гыч лекше йӧратымаш лийже манын, мый тыге кӱштенам.

⁶ Тидын деч южышт кораҥыныт, кӱлеш-оккӱлым мутланышышке савырненыт.

⁷ Нуно закон туныктышо лийнешт, но шкешт мом ойлымыштымат, молан ӱшандарымыштымат огыт умыло.

⁸ Ме палена: законым закон почеш кучылташ гын, тудо сай.

⁹ Ме умылена: законым чын ыштышылан огыл, а тудым пудыртышо да мут колыштдымо, Юмылан кумалдыме да языкан, святойым шотлыдымо да амыргыше, ача-авалан осалым ыштыше, айдемым пуштшо,

¹⁰ яжарланыше, пӧръеҥ ден пӧръеҥ илыше, еҥым шолыштшо, [еҥ ӱмбаке ойлышо, вольык дене коштшо,] шояче, шке товатлымыжым пудыртышо-влаклан да чын туныктымаш ваштареш шогышо чыла молылан лукмо.

¹¹ Моктымо Юмын чапшым увертарыше, мыланем ӱшанен пуымо Поро Увер тыге ойла.

^12-13 Мылам вийым пуышо Господьна Христос Иисуслан тауштем: мый ондакше мыскылыше, поктылшо да еҥым шыгыремдыше лийынам гынат, Тудо мыйым ӱшанле айдемылан шотлен да служитлыме пашаш шогалтен. Мыйын титакем Юмо кудалтен, вет мом ыштенам – ӱшаныдымемлан кӧра пален омыл.

¹⁴ Господьнан порылыкшо Христос Иисус дене ушнымаште улшо ӱшанымаш ден йӧратымаш дене пырля мыланем тичмашын пуалтын.

¹⁵ Тиде мут чын да шӱмыш пышташ чыла шотыштат йӧра: Христос Иисус тӱняшке языкан-влакым утараш толын, нунын кокла гыч эн языканже мый улам.

¹⁶ Мыйын, эн кугу языканын, илышыште Иисус Христос уло чытымыжым ончыкташ шонен, сандене мыйым тыге серлаген, Тудлан ӱшанаш тӱҥалшаш да курымашлык илышым налшаш-влаклан мыйын гоч корным ончыктен.

¹⁷ А Курымашлык Кугыжалан, колыдымо, койдымо, кугу ушан ик шкет Юмылан курым-курымеш пагалымаш да чап лийже. Аминь.

¹⁸ Тимофей эргым, пророкла ойлен кодымаште тыйын нерген каласыме дене келшышын, тиде кӱштымашым тыланет ӱшанен кодем. Тиде ойлымылан эҥертен, кредалмаште ӱшанле сарзе лий,

¹⁹ ӱшанымаште шого, поро совестьым кучо. Икмынярышт совестьыштым колыштмым чарненыт, да нунын ӱшанымашышт кӱ ӱмбаке логалше корабль семын шаланен.

²⁰ Тыгайже-влак коклаште Именей ден Александр улыт. Юмым мыскылыде илаш тунемышт манын, мый нуным сатаналан пуэн коденам.