1 Петр 5 - У Сугынь

5 ГЛАВА 1-11 Черкылан да тудын вуйлатышыж-влаклан каҥаш. 12-14 Чеверласымаш.

¹ Мый, шкежат пресвитер, Христосын орланымыжым таныклыше да почылтшаш чапым пырля пайлыше айдеме, тендан пресвитерда-влакым сӧрвалем:

² Юмын тыланда ӱшанен пуымо кӱтӱжым кӱтыза, ӧкымлыде, шке кумылын, Юмылан келшышын тудым оролыза, намысле пайдам кычалын огыл, а уло кумылын тыршен ыштыза,

³ тыланда ӱшанен пуымо еҥ-влакым кид йымалныда ида кучо, а кӱтӱлан корным ончыктышо лийза.

⁴ Тунам Тӱҥ Кӱтӱчӧ кончен толмо годым те лывыжгыдыме чап вуйшӱдышым налыда.

⁵ Самырык-влакат, пресвитер-влакым колыштса. Чыланат, икте-весым колыштын, икте-весе деке тыматле шонымашан лийза, вет «Юмо кугешныше-влак ваштареш шога, а ӱҥышӧ-влаклан порылыкым пуа».

⁶ Тугеже, ӱҥышӧ лийза да Юмын виян кид йымалныже лияш келшыза, шке жапыштыже Тудо тендам кӱшкӧ шогалта.

⁷ Кеч-могай тургыжланымашдам Юмылан ӱшанен пуыза: Тудо тендан верч тырша.

⁸ Айык шонымашан лийза, шекланен шогыза: тендан ваштареш шогышыда, диавол, ырлыше лев семын, кӧм нелаш кычалын, коштеш.

⁹ Пеҥгыде ӱшанымаш дене тудын ваштареш шогалза. Те паледа: тендан иза-шольыда-влаклан уло тӱняште тыгаяк орланымашым чыташ логалеш.

¹⁰ А Христос Иисус дене ушнен шогымаште мемнам Шкенжын курымашлык чапышкыже ӱжшӧ чыла порылыкын Юмыжо, кӱчык жап орлыкым чытымекыда, тек тендам тӧрлата, чоткыдемда, вияҥда да пеҥгыдемда.

¹¹ Тудлан куат да вий курым-курымеш лийже. Аминь.

¹² Мый тыланда Силуан гоч кӱчыкын возышым, тудым ӱшанле изалан шотлем. Мый тендам кумылаҥдынем да, тидыже Юмын чын порылыкшо манын, таныклынем ыле. Тиде порылыкышто те пеҥгыдын шогеда.

¹³ Тендан дене пырля ойырен налме Вавилон черке, тыгак Марк эргым тыланда саламым колтат.

¹⁴ Икте-весыдам йӧратымаш шупшалме дене саламлыза. Тыланда, Христос Иисус дене ушнен шогышо-влаклан, чылалан тыныслык лийже. Аминь.