1 Петр 4 - У Сугынь

4 ГЛАВА 1-11 Юмылан илымаш. 12-19 Христослан ӱшанымылан верч орланымаш.

¹ Тыгеракын, Христос мемнан верч кап да чон дене орланен гын, тугеже теат тыге шонымым саркураллан налза, вет кап да чон дене орланыше айдеме языкым ыштымым чарна,

² сандене тудо кап дене илаш кодшо ӱмыржым ынде айдемын сутланымыж почеш огыл, а Юмын эрыкше почеш ила.

³ Чын Юмым палыдыме-влакын кумылыштым шуктен, мом эртыше илыш жапыште ыштенда, тидат сита: те пужлен, сутланен, [пӧръеҥ пӧръеҥ дене коштын, вольык дене коштын, удам шонен,] аракам йӱын, шот деч посна кочкын-йӱын да шояк юмылан намыслын кумалын иленда.

⁴ Но те нунын дене пырля пужлымаш йогынышко огыда ушно, сандене нуно ӧрыт да тендам вурсат.

⁵ Илыше ден колышо-влакым судитлаш Ямде Улшо ончылно нуно мутым кучаш шогалыт.

⁶ Вет колышо-влак айдеме семын кап дене судитлалтыныт гынат, Юмо семын шӱлыш дене илышт манын, нуныланат Поро Уверым каласкалыме.

⁷ Но чылажынат мучашыже лишнак. Тугеже ушан-шотан да кумалмаште пеҥгыде лийза.

⁸ Эн ондак икте-весыдам тыршен йӧратыза, вет йӧратымаш шуко языкым леведеш.

⁹ Ӧпке деч посна икте-весыдам шкендан деке пуртыза.

¹⁰ Те кажныже, Юмын шуко сынан порылыкшылан пашам ыштыше поро служитлыше семын, Тудын деч налме моштымаш дене икте-весылан тарзыланыза.

¹¹ Кӧ ойла гын, Юмын шомакшым ойлымо семын ойлыжо, кӧ служитла гын, Юмын пуымо вий дене служитлыже. Тек Юмо чыла шотыштат Иисус Христос гоч чапландаралтеш. Тудлан курым-курымеш чап да куат лийже. Аминь.

¹² Йӧратымем-влак, тендан дене ала-мо умылыдымо лиеш манын шонен, тендам тергаш колтымо туллан ида ӧр.

¹³ Христосын орланымашкыже ушнымыда семын куаныза, тунам Тудын чапше кончымо годымат куанаш да йывырташ тӱҥалыда.

¹⁴ Тендам Христосын лӱмжӧ верч вурсат гын, пиалан улыда: Чап Шӱлыш, Юмын Шӱлыш, тендан ӱмбалне. Нуно Тудым мыскылат, а те чапландареда.

¹⁵ Тек тендан кокла гыч нигӧат еҥым пуштмылан, шолыштмылан але осалым ыштымылан, але еҥ пашаш шӱшкылтмылан ок орлане.

¹⁶ Но иктаж-кӧ Христослан ӱшанымыжлан орлана гын, ынже вожыл, а тыгай ужашлан Юмым чапландарыже.

¹⁷ Вет судлан Юмын мӧҥгысыж-влак деч тӱҥалаш жап. А мемнан деч тӱҥалеш гын, Юмын Евангелийжылан тореш лийше-влаклан могай мучаш лиеш?

¹⁸ «Чын ыштыше пыкше утаралтеш гын, Юмым пагалыдыме да языкан еҥ кушко логалеш?»

¹⁹ Тугеже Юмын эрыкше почеш орланыше-влакат тек чоныштым ӱшанле Ыштышын кидышкыже пуат да умбакыжат порым ыштат.