1 Петр 3 - У Сугынь

3 ГЛАВА 1-7 Вате ден марий. 8-22 Чын ыштыме верч орланымаш.

^1-2 Тыгак теат, вате-влак, шке марийдам колыштса. Тыгеракын, Юмын шомаклан ӱшаныдыме марий-влак ватыштын арун да Юмо деч лӱдын илымыштым ужын, нунын илышыштлан кӧра мут деч посна ӱшандарыме лийын кертыт.

³ Тек тендан моторлыкда тӱжвач сӧрастарымаште – ойыртемалтше ӱппунемыште, шӧртньым сакалымаште, чапле вургемыште – ок лий.

⁴ Тек кӧргысӧ шӱм айдемыда – вашталтдыме, тыматле, шыма чон – тендам моторым ышта. Тыгайже Юмын ончылно шергакан.

⁵ Юмылан ӱшаным пыштыше святой ӱдырамаш-влакат ожно шкеныштым тыгак сӧрастареныт да марийыштым колыштыныт.

⁶ Тыге Сарра Авраамын мутшым колыштын, тудым оза манын. Порым ыштеда да нимогай лӱдмаш деч огыда лӱд гын, те Сарран шочшыжо улыда.

⁷ Тыгак теат, пӧръеҥ-влак, вийдыме улмыштым чаманен, ватыда дене шот дене илыза, нунылан пагалымашым ончыктыза, вет нуно тендан дене пырля наследник улыт да Юмын порылыкшо дене пуымо илышым налыт. Тунам кумалмыланда чарак ок лий.

⁸ Мучашлан, чылан икгай шонымашан, чаманыше, иза-шольо-влакым йӧратыше, поро шӱман, келшен илыше, ӱҥышӧ лийза.

⁹ Осаллыклан осал дене, вурседылмылан вурседылме дене ида вашеште. Порым гына тыланыза, вет те паледа: тидланак тендам ӱжмӧ. Тыге шкеат Юмын суапландарымыжым налыда.

¹⁰ Вет возымо: «Кӧ илышым йӧратынеже да поро кече-влакым ужнеже, йылмыжым осал деч кучыжо да умшажым – чоян ойлымо деч,

¹¹ осал деч кораҥже да порым ыштыже, тыныслыкым кычалже да тудын деке лишемаш тыршыже.

¹² Вет Господьын шинчаже чын ыштышым онча, пылышыже тудын сӧрвалымыжым колыштеш, но осалым ыштышым мланде ӱмбач пытараш манын, Господьын чурийже тудын ваштареш лиеш».

¹³ Те поро верч тыршыше лийыда гын, кӧ вара тыланда осалым ышта?

¹⁴ А чын ыштымыланда верч орланеда гынат, те пиалан улыда, нунын лӱдыктымышт деч ида лӱд, ида ӧр.

¹⁵ Господь Юмым шкендан шӱмыштыда святитлыза, да ӱшанен вучымыда шотышто умылтарымашым кӧ йодеш, кажныжлан тыматлын да пагален вашешташ эре ямде лийза.

¹⁶ Поро совестян лийза, тунам тендан Христос дене ушнымаште порын илымыдам шудалше-влак тендам осал-влакым вурсымо семын вурсымыштлан намысыш логалыт.

¹⁷ Осал пашалан орланаш сай огыл, а Юмын эрыкшылан келша гын, поро пашалан орланаш сай.

¹⁸ Вет Христосат, мемнам Юмо деке кондаш манын, языкланна кӧра икана орланен, чын ыштыше – чын огыл ыштыше-влак верч. Тудым кап дене колымашке шуктымо, но шӱлыш дене ылыжын.

¹⁹ Шӱлыш денак Тудо каен да казаматыште улшо шӱлыш-влаклан ойлен.

²⁰ Ожно, Нойын илыме жапыште, ковчегым чоҥымо годым, кунам Юмо чытен вучен, нуно мут колыштдымо лийыныт. Корабльыште икмыняр еҥ гына, вес семынже кандаш чон, вӱд гоч утаралтын.

²¹ Тунамсе семынак кызыт мемнамат вӱд, вес семынже тынеш пуртымаш, Иисус Христосын ылыжмыж гоч утара. Тынеш пуртымаш – кап гыч лавырам мушкын колтымаш огыл, а поро совесть дене илаш Юмо деч йодмаш.

²² Христос пылпомышыш кӱзен да Юмын пурла могырыштыжо шинча. Суксо, власть да вий-влак Тудын кидше йымалне улыт.