1 Петр 2 - У Сугынь

2 ГЛАВА 1-10 Христос – илыше кӱ. Юмын святой калыкше. 11-17 Святой илыш дене илышаш нерген. 18-25 Христос гай тарзе лийза.

¹ Тугеже, чыла осаллыкым, чыла чояланымым, сайла кояш тӧчымым, кӧранымым да чыла орлымым коден,

² кызыт гына шочшо аза семын ару шомак шӧрым йӧратыза. Тудын дене те кушшаш да утаралтмашке шушаш улыда,

³ вет те Господьын поро улмыжым тамленда.

⁴ Тудын деке, илыше кӱ деке, толза, Тудым еҥ-влак кӱлдымыш луктыныт, а Юмын ончылно Тудо ойырен налме да шергакан.

⁵ Шкендам илыше кӱ семын Юмын Шӱлышын пӧртшым чоҥаш пуыза, Иисус Христос гоч Юмылан келшыше надырым Шӱлыш дене пуышо святой иерей-влак лийза.

⁶ Вет Возымаште тыгай шомак уло: «Теве Мый Сионышто кӱм пыштем, ойырен налме шергакан негыз пусак кӱм, Тудлан ӱшаныше намысыш ок пуро».

⁷ Тугеже, тыланда, ӱшаныше-влаклан, тиде кӱ шергакан, а ӱшаныдыме-влаклан тудо – «чоҥышо-влакын йӧрдымыш лукмо, но пусакын негызше лийше кӱ», нунылан тудо – «шӱртньымӧ кӱ, алгаштаралтме кӱ».

⁸ Шомакым колыштдымыштлан нуно шӱртнят. Нунылан тыге лияш палемдыме.

⁹ Но те ойырен налме тукым, Кугыжан иерейже-влак, святой калык, Юмын Шкаланже налме тукым улыда. Тендам пычкемыш гыч ӧрыктарыше волгыдышкыжо Ӱжшын кӱдыратле пашажым те увертарышаш улыда.

¹⁰ Ондак те калык лийын огыдал, ынде Юмын калыкше улыда. Ондак тендам чаманыме огыл, а ынде чаманыме улыда.

¹¹ Йӧратымем-влак, илаш толшо ӧрдыж еҥым сӧрвалыме семын тендам сӧрвалем: чон ваштареш кучедалше капысе сутланымаш деч шкендам кучыза

¹² да чын Юмым палыдыме еҥ-влак коклаште порын илыза. Тыгеракын, нуно поро пашадам ужыт да, осалым ыштыше манын, мо верч тендам кызыт вурсат, толын кайыме кечынже тидын верчак Юмым мокташ тӱҥалыт.

¹³ Тыгеракын, Господьлан кӧра чыла айдеме вуйлатыше-влакым колыштса: кугыжамат, вет тудо эн кугу кучеман,

¹⁴ тӧра-влакымат, кугыжа вет нуным осалланыше-влакым мут кучаш шогалташ да порым ыштыше-влакым мокташ колтен.

¹⁵ Вет Юмын эрыкше тыгай: порым ыштыме дене те тунемдыме еҥ-влакын шотдымо ойлымыштлан мучашым пыштышаш улыда.

¹⁶ Эрыкан еҥ семын ыштыза, тек тендан эрыкда осаллан леведыш огеш лий, а Юмын кулжо лийза.

¹⁷ Чылам пагалыза, иза-шольымытым йӧратыза, Юмо деч лӱдса, кугыжам шотлыза.

¹⁸ Тарзе-влак, озада-влакын мутыштым лӱдын да пагален колыштса: поро да тыматле-влакын веле огыл, но торжа-влакынат мутыштым колыштшо лийза.

¹⁹ Юмым эре ушышто кучымыжлан кӧра иктаж-кӧ чын амал деч посна ойгаҥдарен орландарымым чыта гын, тиде – Юмылан келшыше.

²⁰ Титакланда кырыме годым чытеда гын, тендам молан мокташ? Но порым ыштымыланда кӧра орлыкым чытеда гын, тиде Юмын ончылно келшыше,

²¹ да тидланак тендам ӱжмӧ, вет Христосат мемнан верч орлыкым чытен да мыланна корным ончыктен: те Тудын кышаж почеш кайышаш улыда.

²² «Языкым Тудо ыштен огыл, Тудын йылмыж гыч чояланымаш шоктен огыл.»

²³ Тудым вурсеныт гынат, вурсен вашештен огыл, орланымыж годым лӱдыктылын огыл, а чын Судитлышын кидышкыже чыла ӱшанен пуэн.

²⁴ Ме, язык деч кораҥын, чын ыштен илен кертшаш улына, сандене Христос шке Капше дене языкнам ырес меҥгыш нӧлталын. Тудын сусыржо дене те паремдыме лийында.

²⁵ Те [кӱтӱчӧ деч посна кодшо] йомшо шорык гай лийында, но чондам Кӱтышӧ да Аралыше деке кызыт пӧртылында.