1 Кор 2 - У Сугынь

2 ГЛАВА 1-5 Павел ыресеш пудален сакыме Христос нерген увертара. 6-16 Юмын кугу уш-акылже.

¹ Иза-шольо-влак, кунам тендан деке миенам, мый Юмын таныклымыжым пеш чапле мут да кугу уш-акыл дене огыл увертараш толынам.

² Вет тендан дене лиймем годым мый Иисус Христос, пудален сакыме Иисус Христос, деч молым нимом палаш огыл манын шонен пыштенам.

³ Мый тендан дене улмем годым вийдыме, лӱдшӧ да пырткыше чонан лийынам,

⁴ мый айдеме уш-акылын ӱшандарыше мутшо дене огыл, а Шӱлыш ден вийым ончыктен ойленам да увертаренам,

⁵ вет тендан ӱшанымыда айдемын уш-акылеш огыл, а Юмын куатеш негызлалтшаш.

⁶ Туге гынат ме ушым шындыше-влак коклаште кугу уш-акылым ойлена, но тидыже кызытсе саманын уш-акылже але кызытсе саманын пытышаш вуйлатыше-влакын уш-акылышт огыл.

⁷ Ме Юмын шолып кучымо, шылтыме кугу уш-акылым ойлен пуэна, тиде уш-акылжым Юмо мемнан чапнам нӧлташ жап тӱҥалме деч ончычак палемден.

⁸ Тиде уш-акылым кызытсе саманын власть кучышо-влак кокла гыч иктат пален огыл, а палат ыле гын, чапын Господьшым пудален огыт саке ыле.

⁹ Но возымо семын «Мом шинчат ужын огыл, пылышат колын огыл, да мом айдеме шӱмыштыжӧ пален огыл, тудым Юмым йӧратыше-влаклан Юмо ямдылен».

¹⁰ А мыланна Юмо тидым шке Шӱлышыж гоч почын, вет Шӱлыш чылажымат, Юмын келгытшымат шымла.

¹¹ Айдемын келгытшым айдеме кокла гыч кӧ пала? Тидым айдемын кӧргӧ шӱлышыжӧ веле пала. Тыгак Юмын келгытшымат Юмын Шӱлыш деч моло нигӧ ок пале.

¹² А ме тиде тӱнян шӱлышыжым огыл, а Юмо деч толшо Шӱлышым налынна, вет Юмо мом мыланна пӧлеклен, тудым палышаш улына.

¹³ А ме тидын нерген айдеме уш-акылын туныктымо мутшо дене огыл, а Святой Шӱлыш туныктымо мут дене ойлена, да Шӱлыш пашам Шӱлыш почеш илыше-влаклан умылтарена.

¹⁴ Мо Юмын Шӱлыш деч, тудым шке шӱм-чонжо почеш илыше еҥ шӱмышкыжӧ ок пыште, вет тудлан тиде ушдымылык, тидым шӱлыш дене веле лончылаш лиеш, сандене умылен ок керт.

¹⁵ Но Шӱлыш почеш илыше еҥ чыла лончылен кертеш, а тудым нигӧ лончылен ок керт,

¹⁶ вет «Кӧ Господьын ушыжым пала да Тудым туныктен кертеш?» А Христосын ушыжо мемнан уло.