1 Кор 1 - У Сугынь

1 ГЛАВА 1-3 Саламлымаш. 4-9 Юмылан тауштымаш. 10-17 Черкыште келшыдымаш ваштареш. 18-31 Юмын куатше да уш-акылже.

¹ Юмын эрыкше почеш Иисус Христосын Апостолжо лияш ӱжмӧ Павел да Сосфен иза деч

² Юмын Коринфысе черкыжлан, Христос Иисусын святитлыме да святой лияш ӱжмӧ-влаклан, кеч-куштат Господьна Иисус Христосын – нунынат, мемнанат Господьнан – лӱмжым ӱжын кумалше-влаклан.

³ Мемнан Юмо Ачана да Господь Иисус Христос деч тыланда порылык да тыныслык лийже.

⁴ Юмын тыланда Христос Иисус гоч пуымо порылыкшылан тендан верч Юмемлан эре таум ыштем.

⁵ Тудын дене ушнен шоген, те чыла шотыштат – шомак денат, шинчымаш денат пойдарыме улыда.

⁶ Христос нерген таныклымаш тендан коклаште пеҥгыдын вожаҥын,

⁷ да мемнан Господьна Иисус Христосын толмыжым вучымыда годым Юмын пуымо чыла тӱрлӧ моштымаш тендан уло.

⁸ Христос тендам мучаш марте пеҥгыдемда, тыгеже мемнан Господьна Иисус Христосын кечынже тендам нимо дене шылталаш ок лий.

⁹ Шке Эргыж деке, мемнан Господь Иисус Христос деке, ушнымашке тендам ӱжшӧ Юмо – ӱшанле.

¹⁰ Иза-шольо-влак, те чылан ик семынак ойлыза, тендан коклаште шеледалтмаш ынже лий, а ик ой да ик шонымаш тендам ушыжо манын, мемнан Господьна Иисус Христосын лӱмжӧ дене сӧрвалем.

¹¹ Иза-шольым-влак, те шке коклаштыда ӱчашеда манын, мый Хлоян еҥже-влак деч пален налынам.

¹² Мый теве мо нерген ойлем: тендан кокла гыч кажныже «Мый Павелын тунемшыже улам», але «Мый – Аполлосын», «А мый – Кифан», «А мый – Христосын» манын каласа.

¹³ Христос шелалтын мо вара? Але тендан верч Павелым пудален сакеныт? Але те Павел лӱмеш тынеш пуренда?

¹⁴ Крисп ден Гаий деч молым тендан кокла гыч нигӧм тынеш пуртен омыл, тидлан Юмылан тауштем:

¹⁵ шке лӱмешем тендам тынеш пуртенам манын, нигӧ каласен ок керт.

¹⁶ Адакшым Стефаным да мӧҥгысыж-влакымат мый тынеш пуртенам. Иктаж-кӧм весым тынеш пуртенам мо, мый ом пале.

¹⁷ Вет Христос мыйым тынеш пурташ огыл, а Поро Уверым каласкалаш колтен. Поро Уверым мый ушанла чучшо шомак дене каласкалышаш омыл, уке гын Христосын ыресше кӱлдымыш лектеш.

¹⁸ Пытымашке кайыше-влаклан ырес нерген шомак – ушдымылык, а мыланна, утарымашке кайыше-влаклан, – Юмын куатше.

¹⁹ Возымо: «Ушан-влакын уш-акылыштым пытарем, умылышо-влакын умылымашыштым кораҥдем».

²⁰ Кушто ушан еҥ, кушто закон туныктышо, кушто тиде тӱнясе шымлызе? Тӱнян кугу ушыжым Юмо ушдымылыкыш савырен огыл мо?

²¹ Юмын уш-акылже гоч тӱня шке ушыж дене Юмым пален налын огылат, ушдымылыкым увертарыме гоч Юмо ӱшаныше-влакым шке порылыкшо дене утараш сайлан шотлен.

²² Вет иудей-влак палдарыше палым ончыкташ йодыт, эллин-влак уш-акылым кычалыт,

²³ а ме ыресеш пудалыме Христос нерген уверым каласкалена. Тидыже иудей-влаклан шӱртньымӧ кӱ, эллин-влаклан – ушдымылык,

²⁴ а ӱжмӧ-влаклан, иудей-влакланат, эллин-влакланат, Христос – Юмын куатше да Юмын кугу уш-акылже.

²⁵ Вет мо Юмын ушдымылыкшыла коеш, айдемын ушыж деч ушанрак, да мо Юмын вийдымылыкшыла коеш, айдемын вийже деч виянрак.

²⁶ Иза-шольо-влак, Юмын ӱжмӧ-влак, могай улыда – ончалза: шукынжо огыл шочынак ушан, шукынжо огыл власть кучышо, шукынжо огыл сай тукым деч лекше улыда.

²⁷ Но мо тӱняште ушанлан ок шотлалт, тудым Юмо ушан-влакым намысыш лукташ манын ойырен налын, да виян-влакым намысыш пурташ манын, тӱняште вийдымыла койшым Юмо ойырен налын.

^28-29 Ик айдемат Юмын ончылно моктанен ынже керт манын, кугуэш шотлымым укешке лукташ Тудо тӱняште изи, пагалыдыме да нимолан шотлалтдымым ойырен налын.

³⁰ Юмо тендам Христос Иисус деке ушен, Тудыжо мыланна Юмо деч толшо уш-акыл лийын: святитлалтмаш, чыныш лекмаш да сулен налмаш.

³¹ Тыгеракын, возымо семын «Кӧ моктанынеже гын, тек Господь дене моктана».