1 Ин 5 - У Сугынь

5 ГЛАВА 6-12 Иисус Христос нерген таныклымаш. 13-21 Пытартыш каҥаш-влак.

¹ Иисусын Христос улмыжлан ӱшаныше кажне еҥ Юмо деч шочын, да Шочыктышым йӧратыше кажне еҥ Тудын деч Шочшымат йӧрата.

² Ме Юмын икшывыж-влакым йӧратымынам теве кушеч палена: ме Юмым йӧратена да Тудын кӱштымыжым шуктена.

³ Юмым йӧратымаш Тудын кӱштымыжым шуктымаш лиеш, а кӱштымыжӧ неле огыл,

⁴ вет Юмо деч шочшо кажныже тӱням сеҥа. Тӱням сеҥыше сеҥымаш – тиде мемнан ӱшанымашна.

⁵ Кӧ тӱням сеҥа? Иисус – Юмын Эргыже манын ӱшаныше огыл мо?

⁶ Вӱд, вӱр да Шӱлыш дене толшыжо – тиде Иисус Христос. Тудо вӱд дене гына огыл, а вӱд да вӱр дене толын. А таныклышыже – тиде Шӱлыш, вет Шӱлыш – тиде чын.

⁷ Пылпомышто кум таныклыше уло: Ача, Шомак да Святой Шӱлыш, да нине кумыт икте улыт.

⁸ Мланде ӱмбалне кум таныклыше уло: Шӱлыш, вӱд да вӱр, да нине кумыт иктымак ойлат.

⁹ Ме айдемынат таныклымыжлан ӱшанена, но Юмын таныклымыже утларак кугу, а тиде – Юмын таныклымыже, тыге Тудо шке Эргыж нерген таныклен.

¹⁰ Юмын Эргылан ӱшанышын тиде таныклымаш шке чоныштыжо уло. А Юмылан ӱшаныдыме Тудым пуйто шояче манын ончыкта, вет Юмын шке Эргыж нерген таныклымыжлан ок ӱшане.

¹¹ Таныклымыже теве мо: Юмо мыланна курымашлык илышым пуэн, да тиде илышыже – Тудын Эргыж дене ушнымаште.

¹² Кӧн Юмын Эргыже уло, тудын илышыжат уло, а кӧн Юмын Эргыже уке, тудын илышыжат уке.

¹³ Юмын Эргыжлан ӱшанымыланда кӧра тендан курымашлык илышда улмым палыза манын, мый тидым тыланда, Юмын Эргын лӱмжылан ӱшаныше-влаклан, возенам.

¹⁴ Юмын ончылно теве могай ӱшанымашна уло: Тудын эрыкше почеш кунам ме иктаж-мом йодына, Юмо мемнам колеш.

¹⁵ Ме мом гына огына йод, Тудо мемнам колеш манын палена гын, тугеже ме мом Тудын деч йодына, йодмынам налына манынат палена.

¹⁶ Кӧ иза-шольыжын язык ыштымыжым ужеш, а языкше колымашке наҥгайыше огыл гын, тек кумалеш, да Юмо тудлан илышым конда. Тидым колымашке наҥгайыдыме языкым ыштыше-влак нерген ойлем. Колымашке наҥгайыше языкат уло, тиде язык верч юмылтыжо манын ом ойло.

¹⁷ Кеч-могай чын огылат – язык, но колымашке наҥгайыдыме языкат уло.

¹⁸ Ме палена: Юмо деч шочшо еҥ нигӧат языкым ок ыште, а Юмо деч шочшо шкенжым арала, да осал тудын деке ок тӱкнӧ.

¹⁹ Ме Юмо деч улмынам да уло тӱня осалын кид йымалныже улмым палена.

²⁰ А тыгак палена: Юмын Эрге толын да мыланна чын Юмым пален налашлан [волгыдым да] шонен моштымашым пуэн, да ме Тудын дене да Иисус Христос Эргыж дене ушнен илена. Тудо чын Юмо да курымашлык илыш.

²¹ Икшыве-влак, шкендам шояк юмо деч аралыза. Аминь.