1 Ин 4 - У Сугынь

4 ГЛАВА 1-6 Чынын шӱлышыжӧ ден шоян шӱлышыжӧ. 7 – 5:5 Юмын йӧратымыже.

¹ Йӧратымем-влак, чыла шӱлышлан ида ӱшане, Юмо деч улыт мо манын, шӱлыш-влакым тергыза, вет тӱняшке шояк пророк шуко лектын.

² Юмын Шӱлышым [да ондалымаш шӱлышым] тыге паледа: Иисус Христос тӱняшке толын да кап дене илен манын почын ойлышо кажне шӱлыш – Юмо деч,

³ а Иисус Христосын тӱняшке толмыжым да кап дене илымыжым почын ойлыдымо кеч-могай шӱлышат Юмо деч огыл, тиде антихристын шӱлышыжӧ. Тыгай шӱлыш толеш манын, те колында, да тудо ынде тӱняште.

⁴ Икшывем-влак, те Юмо деч улыда да шояк пророк-влакым сеҥенда, вет тендан дене Улшыжо – тӱня дене улшо деч кугу.

⁵ Нуно тӱня деч улыт, сандене ойлымыштат тиде тӱня деч, да тӱня нуным колыштеш.

⁶ А ме Юмо деч улына. Юмым палыше мемнам колыштеш, а кӧ Юмо деч огыл, тудо мемнам ок кол. Тыге ме чынын шӱлышыжым да шоян шӱлышыжым палена.

⁷ Йӧратымем-влак, икте-весынам йӧратышаш улына, вет йӧратымаш – Юмо деч, йӧратыше кеч-могай еҥ Юмо деч шочын да Юмым пала.

⁸ Кӧ ок йӧрате, Юмым ок пале, вет Юмо – тиде йӧратымаш.

⁹ Юмын мемнам йӧратымыже теве кузе почылтын: Ик Шкет Эргыже гоч мыланна илышым пуаш манын, Юмо Тудым тӱняшке колтен.

¹⁰ Йӧратымашыже теве кушто: ме огыл Юмым йӧраташ тӱҥалынна, но Тудо мемнам йӧратен да сӧрасымашым пуышо жертвылан мемнан языкна верч шке Эргыжым колтен.

¹¹ Йӧратымем-влак, Юмо мемнам тыге йӧратен гын, меат икте-весынам йӧратышаш улына.

¹² Юмым нигӧ нигунам ужын огыл, но ме икте-весынам йӧратена гын, Юмо мемнан дене ушнен шога, да Тудын йӧратымашыже мемнан дене тичмаш лиеш.

¹³ Ме Тудын дене ушнен илена да Тудо мемнан дене ушнен шога манын, тыге палена: Юмо мыланна шке Шӱлышыж гыч пуэн.

¹⁴ Ача Эргым тӱням Утарыше лияш колтен манын, ме ужынна да таныклена.

¹⁵ Иисус – Юмын Эрге манын ӱшанымыжым кӧ почын ойла, тудын дене Юмо ушнен шога, а тудо – Юмо дене.

¹⁶ Юмо мемнам могай йӧратымаш дене йӧратымым пален налынна да тидлан ӱшанаш тӱҥалынна. Юмо – тиде йӧратымаш, йӧратымаште илыше айдеме Юмо дене ушнен шога, да Юмо тудын дене ушнен шога.

¹⁷ Йӧратымаш мемнан шӱмыштӧ теве тыгай тичмашлыкыш шуын: суд кечын ме огына лӱд, вет кузе Иисус тиде тӱняште, тугак меат тиде тӱняште улына.

¹⁸ Йӧратымаште лӱдмаш уке, а тичмаш йӧратымаш лӱдмашым поктен луктеш, вет лӱдмаште орланымаш уло. Лӱдшӧ еҥ йӧратымаште тичмашлыкыш шуын огыл.

¹⁹ Юмо мемнам ончычак йӧратен, садлан ме Тудым йӧратена.

²⁰ Иктаж-кӧ «Юмым йӧратем» манеш да иза-шольыжым ужмыжо ок шу гын, тудо шояче. Вет кӧ шке ужмо иза-шольыжым ок йӧрате, ужаш лийдыме Юмым кузе йӧратен кертеш?

²¹ Юмын пуымо тыгай кӱштымашна уло: Юмым йӧратыше шке иза-шольыжымат йӧратышаш.