1 Ин 3 - У Сугынь

3 ГЛАВА 1-3 Юмын икшывыж-влак. 4-10 Юмын икшыве языкым ок ыштыл. 11-17 Икте-весым йӧратымаш. 18-24 Юмын ончылно лӱддымӧ лиймаш.

¹ Ача могай йӧратымашым мыланна пуэн, ончалза: мемнам Юмын икшывыже-влак маныт, да ме тыгай улына. Сандене тӱня мемнам ок пале, вет Тудымат пален огыл.

² Йӧратымем-влак, ме ынде Юмын икшывыже улына, но могай лийшашнам але почмо огыл. Ме палена веле: кунам тиде почылтеш, Тудын гай лийына, вет могай улеш, Тудым тугайым ужына.

³ Тудлан тыгай ӱшаным пыштыше кеч-кӧат, Тудын семынак ару лияш манын, шкенжым эрыкта.

⁴ Языкым ыштыше кажне еҥ закондымылык корныш шогалеш, да язык – закондымылык.

⁵ Но те паледа: Христос мемнан языкнам Шке ӱмбакыже налаш толын, да Тудын языкше уке.

⁶ Тудын дене ушнен шогышо еҥ языкым ок ыште. Языкым ыштыше еҥ Тудым ужын огыл да Тудым пален налын огыл.

⁷ Икшывем-влак, тек нигӧат тендам ок ондале: кӧ чын ышта, Тудын семынак – чын.

⁸ А языкым ыштыше – диавол деч, вет диавол тӱҥалтыш гычак языкым ышта. Диаволын пашажым шалаташ манынак, Юмын Эргыже тӱняшке толын.

⁹ Юмо деч шочшо иктат языкым ок ыште, вет Юмын илыш нӧшмыжӧ тудын дене кодеш, да тыгай айдеме языкым ыштен ок керт, вет тудо Юмо деч шочын.

¹⁰ Кӧ Юмын, а кӧ диаволын икшывыже, тыге палаш лиеш. Кӧ чын ок ыште – Юмо деч огыл, тыгак иза-шольыжым йӧратыдыме еҥат Юмо деч огыл.

¹¹ Теве тиде уверым те тӱҥалтыш гычак колында: ме икте-весынам йӧратышаш улына.

¹² Ме Каин гай лийшаш огынал. Тудо осал деч лийын да шке шольыжым пуштын. А молан тудым пуштын? Теве молан: шкенжын пашаже осал улмаш, а шольыжын – чын.

¹³ Иза-шольым-влак, тӱня тендам ужмышудымо гын, ида ӧр.

¹⁴ Ме колымаш гыч илышыш куснымынам палена, вет ме иза-шольо-влакым йӧратена. Кӧ иза-шольым ок йӧрате, тудо колымаште кодеш.

¹⁵ Иза-шольыжым ужмышудымо кажне еҥ айдемым пуштшо улеш. А те паледа: айдемым пуштшын иктынат шке кӧргыштыжӧ эрелан кодшо курымаш илышыже уке.

¹⁶ Мо тугай йӧратымаш, теве кушеч ме пален налынна: Христос мемнан верч шке чонжым пуэн. Меат иза-шольо-влак верч чоннам пуышаш улына.

¹⁷ Тиде тӱняште улан илыше айдеме шке иза-шольыжын ситыдымашым чытымыштым ужеш да шӱмжым нунын деч тӱкылымаште куча гын, кузе тудын чонышто Юмын йӧратымашыже кодын кертеш?

¹⁸ Икшывем-влак, ме мут да ойлымо дене огыл йӧратышаш улына, мемнан йӧратымашна чын лийшаш да мом ыштымына гоч койшаш.

¹⁹ Теве тыге ме чын деч улмынам палена да Юмын ончылно шӱмнам лыпландарен кертына,

²⁰ вет шӱмна мемнам титаканыш луктеш гынат, Юмо шӱмна деч кугу да чыла пала.

²¹ Йӧратымем-влак, шӱмна мемнам титаканыш ок лук гын, Юмо деке мияш огына лӱд,

²² да мом гына огына йод, Тудын деч чыла налына, вет кӱштымыжым шуктена да, Тудлан мо келша, тудым ыштена.

²³ А кӱштымашыже тыгай: ме Тудын Эргыжын, Иисус Христосын, лӱмжылан ӱшанышаш да Тудын кӱштымыжӧ семын икте-весынам йӧратышаш улына.

²⁴ А кӧ Юмын кӱштымыжым шукта, тудо Юмо дене ушнен шога, а Юмо тудын дене. Тудын мемнан дене ушнен шогымыжым мыланна пуымо Шӱлышыж гыч палена.