1 Ин 2 - У Сугынь

2 ГЛАВА 3-11 Юмым палыше Тудым колыштеш. 12-17 Юмым палыше айдеме тӱням йӧратышаш огыл. 18-29 Антихристын толмыжо.

¹ Икшывем-влак, те языкым ида ыште манын, тидым тыланда возем. А иктаж-кӧ языкым ышта гын, Ача ончылно арален ойлышына уло: чын ыштыше Иисус Христос.

² Тудо – сӧрасымашым ышташлан мемнан языкна верч пуымо жертве, да Тудым мемнан языкна верч веле огыл, а уло тӱнян языкше верч жертвылан кондымо.

³ А Юмым пален налмынам ме теве кушеч ужына: Тудын кӱштымыжым шуктена гын, Тудым палена.

⁴ Мый Тудым палем манын, кӧ ойла да кӱштымыжым ок шукто, тудо – шояче, тудын чоныштыжо чын уке.

⁵ А кӧ Юмын шомакшым шукта, тудын шӱмыштыжӧ Юмын йӧратымыже чынжымак тичмашлыкыш шуын. Юмо дене ушнен шогымынам ме тышечын палена.

⁶ Кӧ Тудын дене ушнен шогем манын ойла, тудо шкежат Христос илыме семынак илышаш.

⁷ Йӧратымем-влак, тыланда у кӱштымашым огыл, а тошто кӱштымашым возем. Тудым тыланда тӱҥалтыштак пуымо: тиде тошто кӱштымаш – тӱҥалтыштак тендан колмо шомакда.

⁸ Туге гынат мый тыланда у кӱштымашым возем, тидын чынже Христос гоч да тендан гоч коеш, вет пычкемыш йомеш, а ынде чын волгыдо волгалтара.

⁹ Кӧ волгыдышто улам манын ойла, а иза-шольыжым ужмыжо ок шу, тудо але марте пычкемышыште,

¹⁰ а кӧ иза-шольыжым йӧрата, волгыдышто ила, да шӱртньымашке кондышо тудын нимо уке.

¹¹ А кӧ шке иза-шольыжым ужмышудымо, тудо пычкемыште ила, пычкемышыште коштеш да кушко кайымыжым ок пале: пычкемыш тудын шинчажым сокырым ыштен.

¹² Тыланда возем, икшыве-влак: Тудын лӱмжылан кӧра Юмо тендан языкдам кудалтен.

¹³ Тыланда возем, ача-влак: те тӱҥалтыш гычак Улшым пален налында. Тыланда возем, рвезе-влак: те осалын озажым сеҥенда. Мый тыланда возем, йоча-влак: те Ачам пален налында.

¹⁴ Тыланда возенам, ача-влак: те Тӱҥалтышдымым пален налында. Тыланда возенам, рвезе-влак: те виян улыда, Юмын шомакше тендан чоныштыда кодеш, да те осалын озажым сеҥенда.

¹⁵ Тӱням ида йӧрате, мо тӱняште уло, тудымат ида йӧрате. Кӧ тӱням йӧрата гын, тудын чоныштыжо Ачан йӧратымашыже уке.

¹⁶ Чыла, мо тӱняште уло: кап ден чонын сутланымыже, шинчан сутланымыже да илышысе кугешнымаш – Ача деч огыл, а тиде тӱня деч.

¹⁷ Тӱнят, тӱнясе сутланымашат йомыт, а Юмын эрыкшым шуктышо курым-курымеш кодеш.

¹⁸ Икшывем-влак, пытартыш жап лишемеш. Антихрист толеш манын, те колында, да ынде шуко антихрист лектын. Пытартыш жап лишеммым тышеч палена.

¹⁹ Нуно мемнан кокла гыч лектыныт, но мемнан лийын огытыл. Нуно мемнан лийыт ыле гын, мемнан дене кодыт ыле. Но чылан огыл мемнан улыт. Тиде палыме лийже манын, нуно лектыныт.

²⁰ А те Святой деч шӱрымашым налында да чыла паледа.

²¹ Чыным огыда пале манын огыл мый тыланда возенам, а те чыным паледа да нимогай шоят чын деч огыл улмым умыледа, садлан возенам.

²² Кӧ шояче? Иисусым «Христос огыл» манше огыл мо? Тудо – антихрист, Ачамат, Эргымат йӧрдымыш луктын ойлышо.

²³ Кӧ Эргым йӧрдымыш луктын ойла, тудын Ачажат уке, а кӧ Эргылан ӱшанымыжым почын ойла, тудын Ачажат уло.

²⁴ Мом те тӱҥалтыш гычак колында, тидак тендан дене ушнен шогыжо. Мом те тӱҥалтыш гычак колында, тидак тендан дене ушнен шога гын, тугеже теат Эрге да Ача дене ушнен шогеда.

²⁵ А Тудын мыланна пуымо сӧрымашыже теве тиде: курымашлык илыш.

²⁶ Тидым мый тендам йоҥылышыш пурташ шонышо-влак нерген возенам.

²⁷ А тендан нерген ойлаш гын, тиде шӱрымашак тендан дене ушнен шога, да тендам иктаж-кӧн туныктымыжын кӱлешыже уке. Тудын шӱрымашыже тендам чыла нерген туныкта, тудыжо чын, шоя огыл. Тудын шӱрымашыже туныктымо семынак ыштыза: тидын дене ушнен шогыза.

²⁸ Тугеже, Тудын толмыж годым мыланна лӱдаш огыл да, толмекыже, Тудын ончылно вожылаш огыл манын, икшывем-влак, Христос дене ушнен шогыза.

²⁹ Христосын чын улмыжым паледа гын, чын ыштыше кеч-могай айдемынат Тудын деч шочмыжым паледа.