1 Ин 1 - У Сугынь

1 ГЛАВА 1-4 Илыш Шомак. 5 – 2:2 Юмо дене ушнен шогышо еҥ языкым ыштышаш огыл.

¹ Мо тӱҥалтыш гычак улмаш, мом ме колынна, мом шке шинча дене ужынна, мом онченна да кидна дене шижынна, тудын нерген, илыш Шомак нерген, увертарена.

² Илыш толын, ме тудым ужынна, тудын нерген таныклена да тыланда курымаш илышым увертарена. Тудо Ача дене улмаш да мемнан деке толын.

³ Теат мемнан дене ушнен шогыза манын, мом ме ужынна да колынна, тыланда увертарена. А ме Ача дене да Тудын Эргыже Иисус Христос дене ушнен шогена.

⁴ Тендан куанда тичмаш лийже манын, ме тидым тыланда возена.

⁵ Теве тиде уверым ме Тудын деч колынна да тыланда увертарена: Юмо – волгыдо, Тудын нимогай пычкемышыже уке.

⁶ Тудын дене ушнен шогена манын ойлена да пычкемыште коштына гын, ме шойыштына, чын почеш огына ыште.

⁷ Но Юмо волгыдышто улмо семын меат волгыдышто коштына гын, тыгеже икте-весына дене ушнымо кыл уло да Тудын Эргыжын, Иисус Христосын, Вӱржӧ мемнам кеч-могай язык дечат эрыкта.

⁸ Языкна уке манын ойлена гын, ме шкенам шке ондалена, да мемнан чоныштына чын уке.

⁹ Ме шкенан языкнам почын каласена гын, Юмо, ӱшанле да чын улешат, мемнан языкнам кудалта да мемнам кеч-могай чын огыл деч эрыкта.

¹⁰ Языкым ыштен огынал манын ойлена гын, Тудым шояче семын ончыктена, да мемнан чоныштына Тудын шомакше уке.