1 Фес 4 - У Сугынь

4 ГЛАВА 1-12 Юмылан келшыше илыш. 13-18 Господьын толмыжо.

¹ Икманаш, иза-шольо-влак: Юмылан келшыше илыш дене кузе илаш кӱлмым те мемнан деч тунемында. Но ме Иисус Христосын лӱмжӧ дене сӧрвален йодына: адакат сайракыш тыршыза.

² Господь Иисусын лӱмжӧ дене тыланда мом кӱштенна, те паледа.

³ Юмын эрыкше тиде: те святой лийшаш да яжарланыме деч шкендам кучышаш улыда.

⁴ Тендан кокла гыч кажныже шке капшым святойым да чапыште кучен моштышаш,

⁵ Чын Юмым палыдыме калык семын сутланымын тулжылан вуйым ида пу.

⁶ Шке лишылжылан нигӧ эҥгекым ыштышаш да тудын кӱшеш пайдам налшаш огыл. Кузе ме тыланда ондакат пеҥгыдын шижтаренна, Господь тыгайлан мутым кучыкта.

⁷ Юмо мемнам амырчыкыш огыл, а святой илышыш ӱжын.

⁸ Тыгеракын, тиде туныктымо деч кораҥше еҥ айдемым огыл, а мыланна Шкенжын Святой Шӱлышыжым пуышо Юмым кораҥда.

⁹ Но иза-шольо-влакым йӧратыме нерген тыланда возымо ок кӱл, вет икте-весыдам йӧраташ Юмо Шке тендам туныктен.

¹⁰ Уло Македонийысе чыла иза-шольо дене тыгак ыштеда. Тендам сӧрвалена, иза-шольо-влак, адакат сайракыш тыршыза.

¹¹ Кӱштымына семын тыматлын илымым, шке сомылым шуктымым да илышлан шке кид дене ыштен налмым чаплан шотлыза.

¹² Тунам тендан кузе илымыдам ӧрдыж еҥ-влак пагалат, да те нимо укелыкым огыда пале.

¹³ Иза-шольо-влак, ӱшанен вучымаш деч посна илыше еҥ-влак семын ида ойгыро манын, колышо дене мо лийшаш нерген тендам палдарыде ынем кодо.

¹⁴ Иисус колен да ылыж кынелын манын ӱшанена гын, Иисуслан ӱшанен колышо-влакымат Юмо Тудын дене пырля конда манынат ӱшанена.

¹⁵ Ме тидым Господьын шомакше дене ойлена: ме, Господь толмешке илен шушо-влак, колышо-влакым изишат огына ончылто.

¹⁶ Вет увертарыме годым, Архангелын йӱкшӧ да Юмын пучшо шергылтме годым Господь Шкеак пылпомыш гыч вола, да Христослан ӱшанен колышо-влак эн ондак ылыж кынелыт.

¹⁷ Вара ме, илен шушо-влак, нунын дене пырля Господь дене южышто вашлияш пыл дене кӱзыктымӧ лийына. Тыгеракын, ме эре Господь дене пырля лийына.

¹⁸ Тугеже, тиде шомак дене икте-весыдам кумылаҥден шогыза.