1 Фес 3 - У Сугынь

3 ГЛАВА

¹ Сандене, ынде чытен огыналат, ме Афинеш шкет кодаш шонен пыштенна

² да тендам пеҥгыдемдаш, ӱшанымаштыда кумылаҥдаш ме Тимофей изанам – Христосын Поро Увержым каласкалымаште Юмын служитлышыжым, мемнан дене пырля ыштышым – тендан деке колтенна.

³ Тек кызытсе орландарымашлан кӧра нигӧ огеш тайнышт. Те шкеат паледа, мыланна тыге пӱралтын.

⁴ Орланышаш улына манын, тендан дене лиймына годымак тыланда ончылгоч каласенна ыле. Тыгак лийын, тидым те паледа.

⁵ Санденак мый ынде чытен кертын омылат, ӱшанымыда нерген пален налаш колтенам. Алгаштарыше тендам алгаштарен мо, да мемнан пашана арам лийын мо манын, мый тургыжланенам.

⁶ А ынде Тимофей, тендан деч мемнан деке толмекше, ӱшанымашда да йӧратымашда нерген поро уверым конден. Те мемнам эре порын шарнеда да, кузе ме тендам пеш чот ужнена, теат мемнам тугак ужнеда манын каласкален.

⁷ Сандене, иза-шольо-влак, чыла эҥгекна да нелылыкна годым тендан верч да ӱшанымыланда кӧра ме кумылаҥынна.

⁸ Те Господь дене пеҥгыдын ушнен шогеда гын, тугеже ме илена.

⁹ Ме тендан верч Юмына ончылно пеш куанена. Кузе ситышын тендан верч да тыланда кӧра куанымына верч Юмылан таум ыштен кертына?

¹⁰ Тендам ужаш да, ӱшанымаштыда мо ок сите, тудым ешараш йӧным пуыжо манын, йӱдшӧ-кечыже уло шӱм дене Юмым сӧрвалена.

¹¹ Юмо, мемнан Ачана, Шкеже да Господьна Иисус Христос тек мыланна тендан деке корным почеш.

¹² Тек Господь тыланда икте-весе деке да чыла еҥ деке йӧратымашым шукырак да шукырак пуэн шога. Кузе ме тендам йӧратена, тек тендан йӧратымашдам тугайымак ышта

¹³ да тидын дене тендан шӱмдам пеҥгыдемда. Тыге мемнан Господьна Иисус Христос чыла святойжо дене толмо годым те Юмо, мемнан Ачана, ончылно шылталаш амалым огыда пу да святой лийыда. Аминь.