1 Фес 2 - У Сугынь

2 ГЛАВА 1-16 Павелын Фессалоникысе пашаже. 17 – 3:13 Павел угыч Фессалоникыш мийынеже.

¹ Иза-шольо-влак, шкеат паледа: тендан деке мемнан мийымына арам лийын огыл.

² Те паледа: тылеч ончыч Филиппыште шуко орлыкым да торжа койышым мыланна чыташ логалын, да тендан денат ваштареш шогеныт гынат, тыланда Поро Уверым каласкалаш Юмо мыланна лӱддымылыкым пуэн.

³ Мемнан ӱжын ойлымына чын деч кораҥме гычат, амыргыме гычат, чояланыме гычат ок лек.

⁴ А Юмо мемнам терген да Поро Уверым мыланна ӱшанаш лиймым ужын, да ме тыгак ойлена: еҥлан огыл, а мемнан шӱмнам тергыше Юмылан келшаш тыршена.

⁵ Ме нигунам сайла кояш тӧчен ойлен огынал манын, те паледа; пайдам налаш шонымына лийын огыл, Юмо тидлан танык.

⁶ Ме айдеме деч чапым огына кычал, тендан дечат, моло дечат.

⁷ Ме Христосын Апостолжо улына да тендан деч пеҥгыдын йодын кертына ыле, но шке йочажым пукшен ончышо ава гай шыма тендан коклаште лийынна.

⁸ Тендам йӧратымыланна кӧра ме Юмын Поро Увержым веле огыл, а шкенан чоннамат тыланда пуаш ямде улына ыле, тунар те мыланна шерге лийында.

⁹ А те, иза-шольо-влак, пашам ыштымынам да тыршымынам шарнеда: тендан кокла гыч иктыланат нелым ышташ огыл манын, Юмын Поро Увержым каласкалымына годым йӱдшӧ-кечыже пашам ыштенна.

¹⁰ Кузе ме святойын, чын да шылталаш лийдымын тендан дене ыштенна, тидлан те, ӱшаныше-влак, да Юмо танык улыда.

^11-12 Тендам шке Кугыжанышкыже да чапышкыже ӱжшӧ Юмылан келшышын илыза манын, ача шке икшывыжым туныктымо семын кажныдам кумылаҥденна, ӱшандаренна да сӧрваленна – тидым те паледа.

¹³ Мемнан деч Юмын шомакым колмекыда, те тудым айдеме шомак семын огыл, а тудо чынжымак могай, тугайым, тендан, ӱшаныше-влакын, коклаште Юмын виян ыштыше шомакше семын ушешда коденда – тидланат ме Юмылан эреак таум ыштена.

¹⁴ Те, иза-шольо-влак, Христос Иисус дене ушнен шогышо Иудейысе черке-влак семын ыштыше лийында. Нуно иудей-влак деч мом чытеныт, теат шкендан калык деч тудымак чытенда.

¹⁵ Иудей-влак Господь Иисусымат, шкеныштын пророкышт-влакымат пуштеденыт, а мемнам поктылыныт. Нуно Юмылан огыт келше да чыла еҥын тушманже улыт.

¹⁶ Чын Юмым палыдыме-влаклан утарыше шомакым ойлаш нуно мыланна чаракым ыштылыныт, да тидын дене шке язык висаштым эре темен шогат. Но пытартышлан нунын ӱмбаке Юмын шыдыже логалын.

¹⁷ Иза-шольо-влак, кӱчык жаплан тендан деч мыланна ойырлаш логале, но шӱмна дене огыл, а чурийна дене гына, да тендан дене вашлияш эшеат кугу кумыл дене тыршенна.

¹⁸ Ме тендан деке мияш шоненна – мый, Павел, ик гана веле огыл мийынем ыле – но сатана чаракым ыштылын.

¹⁹ Господьна Иисус Христос толмо годым Тудын ончылно кӧ мемнан ӱшанен вучымына але куанна, кӧ мемнан сеҥымаш вуйшӱдышна? Те огыл мо?

²⁰ Те мемнан чапна да куанна улыда.