1 Фес 1 - У Сугынь

1 ГЛАВА 1 Саламлымаш. 2-10 Фессалоникысе ӱшаныше-влакын илышышт.

¹ Павел, Силуан да Тимофей деч Юмо Ача да Господь Иисус Христос дене ушнен шогышо Фессалоникысе черкылан. Мемнан Юмо Ачана да Господь Иисус Христос деч тыланда порылык да тыныслык лийже.

² Кумалмына годым эре тендам шарнена, чыланда верч Юмылан таум ыштена.

³ Ӱшанымылан кӧра ыштыме пашадам, йӧратымылан кӧра тыршымыдам да мемнан Господьна Иисус Христослан ӱшаным пыштыме гыч лекше чытымыдам ме Юмына, Ачана, ончылно шарнен шогена.

⁴ Юмын йӧратыме иза-шольына-влак, Тудын тендам ойырен налмыжым палена,

⁵ вет каласкалыме Поро Уверна мут дене веле огыл, а кугу куат, Святой Шӱлыш да тӱрыс ӱшанымаш дене тендан деке миен шуын. Коклаштыда тыланда кӧра могай лиймынам шкеат паледа.

⁶ Те мемнан семын да Господь семын ыштыше лийында; пеш чот индыралтында гынат, Поро Уверым Святой Шӱлыш деч лекше куан дене шӱмышкыда пыштенда.

⁷ Тыгеракын, Македонийыште да Ахаийыште ӱшаныше чыла еҥлан корным ончыктенда.

⁸ Господьын шомакше Македонийыште да Ахаийыште веле огыл тендан деч йоҥгалтын, а Юмылан ӱшанымыда нерген увер чыла вере шарлен. Мыланна тыгеже нимом каласкалыме ок кӱл,

⁹ вет нуно шке мемнан нерген каласкалат, тендан деке кузе мийымына да шояк юмо-влак деч кузе кораҥмыда нерген ойлат: те илыше, чын Юмылан служитлаш тӱҥалында;

¹⁰ Тудын колымаш гыч ылыжтыме Иисус Эргыжын пылпомыш гыч толмыжым вучеда, Тудыжо мемнам Юмын толшаш шыдыже деч утара.