ଉଦୁବ୍କାଜି 8 - ମୁଣ୍ଡା ନାୱା ନିୟାମ୍ସାତ୍ୱା ମୋହାର୍-ଛାପ୍ ହାର୍ ସୋନା ରାଃ ଧୁୱାନ୍-ଥାଡ଼ି 1 ଚିମ୍ତା ଇନିଃ ସାତ୍ୱା ମୋହାର୍-ଛାପ୍ ଖୋଲାଅ କେଦାଏ, ଇମ୍ତା ସିର୍ମାଦିଶୁମ୍ ରେ ଆଧା ଘାଣ୍ଟା ଲେକା ସୁନ୍-ସାନ୍ ହୋବାଜାନା। 2 ଏନା ତାୟୋମ୍ତେ ଇଙ୍ଗ୍ ଏନ୍ ସାତ୍ ଝାନ୍ ସିର୍ମାଦାସୀ କୋକେ ଅକନ୍କୋ ପାର୍ମେଶ୍ଵାର୍ ରାଃ ସାମ୍ନାଙ୍ଗ୍ ତିଙ୍ଗୁକାନ୍ ତାଇନୋଃୱାକୋ, ନେଲ୍ କେଃକୋୱାଇଙ୍ଗ୍, ଆଡୋଃ ଇନ୍କୁକେ ସାତ୍ଠୁ ତୁର୍ହୀ ଏମ୍ ଜାନା। 3 ଏନ୍ତେ ଆଡୋଃ ମିୟାଃ ସିର୍ମାଦାସୀ ସୋନା ରାଃ ଧୁୱାନ୍-ଥାଡ଼ି ସାବ୍ କେତେ ହିଜୁଃ ଲେନାଏ, ଆଡୋଃ ବେଦୀ ରାଃ ନାଡ଼େଏ ରେ ତିଙ୍ଗୁ ଜାନାଏ, ଆଡୋଃ ଇନିଃକେ ଥିମ୍ବାଗି ଧୁୱାନ୍ ଏମ୍ ଜାନା ଚି ସବେନ୍ ପାବିତାର୍ ହୋଡ଼ୋକୋୱାଃ ବିନ୍ତି କୋଲୋଃ ସୋନା ରାଃ ଏନ୍ ବେଦୀ ଚେତାନ୍ ରେ, ଅକନାଃ ସିଂହାସାନ୍ ରାଃ ନାଡ଼େଏ ରେ ମେନାଃ ରାକାବ୍ ୟାଏ। 4 ଆଡୋଃ ଏନ୍ ଧୁୱାନ୍ ରାଃ ସୁକୁଲ୍ ପାବିତାର୍ ହୋଡ଼ୋକୋୱାଃ ବିନ୍ତି କୋଲୋଃ ସିର୍ମାଦାସୀ ରାଃ ତିଈ ତେ ପାର୍ମେଶ୍ଵାର୍ ରାଃ ନାଡ଼େଏ ରେ ସେଟେର୍ ଜାନା। 5 ଏନ୍ତେ ସିର୍ମାଦାସୀ ଧୁୱାନ୍-ଥାଡ଼ି ଇଦିକେତେ ଏନାରେ ବେଦୀ ରାଃ ସେଙ୍ଗେଲ୍ ଫେରେଃ କେଦାଏ, ଏନ୍ତେ ଅତେ ରେ ଦୁଲ୍ ତାଦାଏ, ଆଡୋଃ ରିମିଲ୍-ଷାଡି ଆଡୋଃ ଆୱାଜ୍ ଆଡୋଃ ବିଜ୍ଲୀ କୋ ଆଡୋଃ ଭୂକାମ୍ପ୍ ହୋବା ଏଟେଃ ଜାନା। ସାତ୍ଠୁ ତୁର୍ହୀ 6 ଏନ୍ତେ ଏନ୍ ସାତ୍ ଝାନ୍ ସିର୍ମାଦାସୀକୋ ଅକନ୍ କୋତାଃ ସାତ୍ଠୁ ତୁର୍ହୀ ତାଇକେନା, ଏନାକୋକେ ଅଙ୍ଗ୍ ଲାଗିନ୍ ସେକାଡ଼୍ ଜାନାକୋ। 7 ସିଦା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଆଡୋଃ ମାୟୋମ୍ ତେ ମେଶାକାନ୍ ଆରିଲ୍ ଆଡୋଃ ସେଙ୍ଗେଲ୍ ସିର୍ଜାଅ ଜାନା, ଆଡୋଃ ଅତେ ରେ ଦୁଲ୍ ଜାନା; ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଅତେ ଜୁଲ୍ ଜାନା, ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଦାରୁ କୋ ଜୁଲ୍ ଜାନା, ଆଡୋଃ ସବେନ୍ ତାସାଃ କୋହ ଜୁଲ୍ ଜାନା। 8 ଏଟାଃ ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଇମ୍ତା ସେଙ୍ଗେଲ୍ ଲେକା ଜୁଲୋଃତାନ୍ ମିୟାଃ ମାରାଙ୍ଗ୍ ବୁରୁ ସାମୁଦାର୍ ରେ ହୁରାଙ୍ଗ୍ ଜାନା, ଆଡୋଃ ସାମୁଦାର୍ ରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ମାୟୋମ୍ ବାଇଜାନା। 9 ଆଡୋଃ ସାମୁଦାର୍ ରେନ୍ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଜାନ୍ତୁ କୋ ଗୋଏଃ ଜାନାକୋ, ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଜାହାଜ୍ କୋ ନାଷ୍ଟ୍ ଜାନା। 10 ତିସ୍ରା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଏନ୍ତେ ମିୟାଃ ମାରାଙ୍ଗ୍ ଇପିଲ୍ ଅକନାଃ ଦିମି ଲେକା ଜୁଲୋଃ ତାଇକେନା, ସିର୍ମାଦିଶୁମ୍ ଏତେ ଉୟୁଃଜାନା, ଆଡୋଃ ନାଈ କୋରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ କୋରେ ଆଡୋଃ ଦାଆ ରାଃ ପାଝ୍ରା କୋରେ ଉୟୁଃଜାନା। 11 ଏନ୍ ଇପିଲ୍ ରାଃ ନୁତୁମ୍ ନାଗ୍ଦୋନା ତାନାଃ, ଆଡୋଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଦାଆ ନାଗ୍ଦୋନା ଲେକା ହାଡ଼୍ଆଃ ହୋବାଜାନା। ଆଡୋଃ ଥିମ୍ବାଗି ହୋଡ଼ୋକୋ ଏନ୍ ଦାଆ ରାଃ ହାଡ଼୍ଆଃ ହୋବାତେ ଗୋଏଃ ଜାନାକୋ। 12 ଚାଉଥା ସିର୍ମାଦାସୀ ତୁର୍ହୀ ଅଙ୍ଗ୍ କେଦାଏ, ଆଡୋଃ ଶିଙ୍ଗି ରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଆଡୋଃ ଚାଣ୍ଡୁଃ ରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଆଡୋଃ ଇପିଲ୍ କୋରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ କେ ବିଡ଼ା ଜାନା, ନେତାଃ ସାନ୍ତେ ଚି ଏନାରାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ଭାଗ୍ ରେ ନୁବାଃ ଜାନା, ଆଡୋଃ ସିଂଙ୍ଗ୍ସାଟୁବ୍ ରେୟାଃ ଆପି ହାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍ ରେ କାମାର୍ଶାଲ୍ ୟାନା, ହାର୍ ଏନ୍ଲେକାଗି ନିଦା ରେହ ହୋବାଜାନା। 13 ଏନ୍ତେ ଚିମ୍ତାଙ୍ଗ୍ ଇଙ୍ଗ୍ ଆଡୋଃ ନେଲ୍ କେଦାଇଙ୍ଗ୍, ଇମ୍ତା ରିମିଲ୍ଦିଶୁମ୍ ରାଃ ଥାଲା ରେ ମିୟାଃ ଗିଦ୍ଦ କେ ଆପିର୍ ତାନ୍ ହାର୍ ଜୋର୍ତେ କାଉରିତାନ୍ ନେୟା ଆୟୁମ୍ କେଦାଇଙ୍ଗ୍, “ଏନ୍ ଆପିୟା ସାରେଜାକାନ୍ ସିର୍ମାଦାସୀ କୋୱାଃ ତୁର୍ହୀ ରାଃ ଷାଡି ଚାଲ୍ତେ ଅକନ୍ କୋୱାଃ ଅଙ୍ଗ୍ ନାଆ ବାକି ମେନାଃ, ଅତେ ରେ ତାଇନ୍ ତାନ୍ କୋୱାଃ ଚେତାନ୍ ରେ ହାୟ୍, ହାୟ୍, ହାୟ୍!” |
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation