ଉଦୁବ୍‍କାଜି 14 - ମୁଣ୍ଡା ନାୱା ନିୟାମ୍

ମିଣ୍ଡୀହୋନ୍ ହାର୍ ଇନିଜାଃ 144,000 ହୋଡ଼ୋକୋ

¹ ଏନା ତାୟୋମ୍ତେ ଇଙ୍ଗ୍ ନେଲ୍ କାଦାଇଙ୍ଗ୍, ହାର୍ ନେଲେପେ, ଏନ୍ ମିଣ୍ଡୀହୋନ୍ ସିୟୋନ୍ ବୁରୁ ରେ ତିଙ୍ଗୁ କାନାଏ, ହାର୍ ଇନିଜାଃ ଲୋଃ ଏକ୍ ଲାଖ୍ ଚୌୱାଲିସ୍ ହାଜାର୍ ଝାନ୍ ହୋଡ଼ୋକୋ ମେନାକୋୱା, ଅକନ୍ କୋୱା ମୋଲୋଙ୍ଗ୍ ରେ ଇନିଜାଃ ଆଡୋଃ ଇନିଜାଃ ଆପୁ ରାଃ ନୁତୁମ୍ ଅଲାକାନା।

² ଆଡୋଃ ସିର୍ମାଦିଶୁମ୍ ଏତେ ଇଙ୍ଗ୍‍କେ ମିୟାଃ ନେକା ଆୱାଜ୍ ଆୟୁମ୍ ଜାନା ଅକନାଃଚି ଥିମ୍ବାଗି ଦାଆ ଉୟୁଗୋଃତାନ୍ ଲେକା ଆଡୋଃ ମାରାଙ୍ଗ୍ ରିମିଲ୍ ଷାଡି ଲେକା ତାଇକେନା। ଆଡୋଃ ଅକନ୍ ଷାଡି ଇଙ୍ଗ୍ ଆୟୁମ୍ କେଦାଇଙ୍ଗ୍ ଏନା ନେକା ତାଇକେନା ଜେଲେକାଚି ବୀଣା ସାଡିତାନ୍ କୋ ବୀଣା ଷାଡି ତାନାକୋ।

³ ହାର୍ ଇନ୍‍କୁ ସିଂହାସାନ୍ ରାଃ ନାଡ଼େଏ ଆଡୋଃ ଚାଇର୍ ଝାନ୍ ଜାନ୍ତୁ କୋୱାଃ ଆଡୋଃ ମାରିହୋଡ଼ୋକୋୱାଃ ନାଡ଼େଏ ରେ ମିୟାଃ ନାୱା ଦୁରାଙ୍ଗ୍-ଦୁରାଙ୍ଗ୍ ତାଇନ୍ କେନାକୋ। ହାର୍ ଏନ୍ ଏକ୍ ଲାଖ୍ ଚୌୱାଲିସ୍ ହାଜାର୍ ଝାନ୍ ହୋଡ଼ୋକୋକେ ବାଗିକେତେ, ଅକନ୍ କୋ ଅତେଦିଶୁମ୍ ଏତେ କିରିଙ୍ଗ୍ କାନ୍ ତାଇକେନାକୋ, ଜେତାଏ ହ ଏନ୍ ଦୁରାଙ୍ଗ୍ କେ ଶିଖାଅ କାକୋ ଧାଡ଼ି ତାଇନା।

⁴ ନିକୁ ଇନ୍‍କୁ ତାନ୍‍କୋ, ଅକନ୍‍କୋ କୁଡ଼ିକୋ ଲୋଃ କାକୋ ଆଶୁଦ୍ଧ୍‍କାନା, ମେନ୍ଦୋ ଡିଣ୍ଡା ଗିୟାକୋ, ନିକୁ ଇନ୍‍କୁଗି ତାନ୍‍କୋ, ଅକନକୋଚି କୋତାଃ-କୋତାଃ ମିଣ୍ଡୀହୋନ୍ ସେନ୍ ତାନାଏ, ଇନିଃକେ ଇନ୍‍କୁ ଅତୋଙ୍ଗି ତାନାକୋ; ନିକୁ ଦୋ ପାର୍ମେଶ୍ଵାର୍ ଲାଗିନ୍ତେ ସିଦା ଯଅ ଲେକା ହୁୟୋଃ ଲାଗିନ୍ତେ ହୋଡ଼ୋକୋ ଥାଲା ଏତେ କିରିଙ୍ଗ୍ କାନାକୋ।

⁵ ଇନ୍‍କୁୱାଃ ମୋଚା ଏତେ ଚିଉଲା ହ ଲୋଗୋ କାଅଡୋଙ୍ଗ୍ କାନା, ଇନ୍‍କୁ ନିର୍ଦୋଷ୍ ମେନାକୋୱା।

ଆପିୟା ସିର୍ମାଦାସୀ

⁶ ଏନ୍ତେ ଇଙ୍ଗ୍ ମିୟାଃ ଏଟାଃ ସିର୍ମାଦାସୀ କେ ରିମିଲ୍‍ଦିଶୁମ୍ ରାଃ ଥାଲା ରେ ଆପିର୍ ତାନ୍ ନେଲ୍ କିଜାଇଙ୍ଗ୍, ଅକନିଃତାଃ ରେ ଅତେ ରେ ତାଇନ୍ ତାନ୍ ସବେନ୍ ଦିଶୁମ୍ ରେନ୍ ଆଡୋଃ କିଲି ରେନ୍ ଆଡୋଃ ଭାଷା ରେନ୍ ଆଡୋଃ ହୋଡ଼ୋକୋ ନାଙ୍ଗ୍ ଉଦୁବ୍ ଲାଗିନ୍ତେ ଜାନାଓ-ଜାନାଓ ରେୟାଃ ସୁସାମାଚାର୍ ତାଇକେନା।

⁷ ଇନିଃ କାଉରି କେତେ କାଜିକେଦାଏ, “ପାର୍ମେଶ୍ଵାର୍ କେ ବୋରୋଇପେ, ଆଡୋଃ ଇନିଜାଃ ମାନାରାଙ୍ଗ୍ ଏପେ, ଚିୟାଃଚି ଇନିଜାଃ ବିଚାର୍ ରିକା ରାଃ ସାମାୟ୍ ଥେବାଃକାନା; ଆଡୋଃ ଇନିଜାଃ ଆରାଧାନା ଏପେ, ଅକନିଃ ରିମିଲ୍‍ଦିଶୁମ୍ ଆଡୋଃ ଅତେ ଆଡୋଃ ସାମୁଦାର୍ ଆଡୋଃ ଦାଆ ରାଃ ପାଝ୍ରା ବାଇ କାଦାଏ।”

⁸ ନେୟାରାଃ ତାୟୋମ୍ତେ ଆଡୋଃ ଏଟାଃ ମିୟାଃ ସିର୍ମାଦାସୀ ନେୟା କାଜିତାନ୍ ହିଜୁଃନାଏ, “ଉୟୁଃଜାନା, ଏନ୍ ମାରାଙ୍ଗ୍ ବେବିଲୋନ୍ ଉୟୁଃଜାନା, ଅକନିଃ ଆପାନାଃ ବ୍ୟାଭିଚାର୍ କାମି ରେୟାଃ ଖିସ୍ ରାଃ ବୁଲୋଃତେୟାଃ ଆଙ୍ଗୁର୍ ରାଶି ସବେନ୍ ଜାତିକୋକେ ଆନୁ କାଃକୋୱାଏ।”

⁹ ଏନା ତାୟୋମ୍ତେ ଆଡୋଃ ମିୟାଃ, ତିସ୍ରା, ସିର୍ମାଦାସୀ ଜୋର୍ତେ କାଉରି କେତେ ନେୟା କାଜିତାନ୍ ଲୋଃ ହିଜୁଃଜାନାଏ, “ଆଗାର୍ ଅକଏ ଏନ୍ ପାଶୁ ଆଡୋଃ ଇନିଜାଃ ମୁର୍ତ୍ତି କେ ପୂଜା ୟାଏ, ଆଡୋଃ ଆପାନାଃ ମୋଲୋଙ୍ଗ୍ ରେ ଚାହେ ଆପାନାଃ ତିଈ ରେ ଇନିଜାଃ ଛାପ୍ ଇଦିୟାଏ,

¹⁰ ଇନିଃ ପାର୍ମେଶ୍ଵାର୍ ରାଃ ବେଶେ ଖିସ୍ କାନ୍ ତେୟାଃ କାମେଶାକାନ୍ ଆଙ୍ଗୁର୍ ରାଶି କେ, ଅକନାଃ ଇନିଜାଃ ଖିସ୍ ରାଃ ଡୁଭ୍‍ନୀ ରେ ଦୁଲାକାନା, ଏନାକେ ନୁୱେୟାଏ ଆଡୋଃ ପାବିତାର୍ ସିର୍ମାଦାସୀ କୋୱାଃ ଆଡୋଃ ମିଣ୍ଡୀହୋନ୍ ରାଃ ନେପେଲ୍ ରେ ସେଙ୍ଗେଲ୍ ଆଡୋଃ ଗାନ୍ଧାକ୍ ରେ କାଲ୍‍ପାଅଃୱାଏ।

¹¹ ଇନ୍‍କୁୱାଃ କାଲ୍‍ପାଅଃ ରେୟାଃ ସୁକୁଲ୍ ଜାନାଓ-ଜାନାଓ ରାକାବ୍ କାତୋୱା, ଆଡୋଃ ଅକନ୍ କୋ ଏନ୍ ପାଶୁ ଆଡୋଃ ଇନିଜାଃ ମୁର୍ତ୍ତି କେ ପୂଜା ୟାକୋ, ଆଡୋଃ ଅକନ୍ କୋ ଇନିଜାଃ ନୁତୁମ୍ ରେୟାଃ ଛାପ୍ ଇଦିନାକୋ, ଇନ୍‍କୁକେ ନିଦା ଶିଙ୍ଗି ସାଥାଅ କାନାମୋଗା।”

¹² ପାବିତାର୍ ହୋଡ଼ୋକୋୱାଃ ସାହାତିଙ୍ଗ୍ ନେତାଃ ରେ ମେନାଃ, ଅକନ୍‍କୋ ପାର୍ମେଶ୍ଵାର୍ ରାଃ ଆନାଚୁ କୋକେ ମାନାତିଙ୍ଗ୍ ୟାକୋ ଆଡୋଃ ୟୀଶୁ ରେ ବିଶ୍ୱାସ୍ ମାଣ୍ଡାଅୟାକୋ।

¹³ ଏନ୍ତେ ଇଙ୍ଗ୍ ସିର୍ମାଦିଶୁମ୍ ଏତେ ନେ କାଜି ଆୟୁମ୍ କେଦାଇଙ୍ଗ୍, “ଅଲେମ୍, ପ୍ରାଭୁ ରେ ବିଶ୍ଵାସ୍ ତାନ୍ ଲୋଃ ଅକନ୍ କୋ ଗୋଜୋଃ ତାନାକୋ, ଇନ୍‍କୁ ନାଆ ଏତେ ଧାନ୍ୟା ତାନ୍‍କୋ।” ଆତ୍ମା କାଜିତାନାଏ, “ହାଁ, ଚିୟାଃଚି ଇନ୍‍କୁ ସବେନ୍ କାମି କୋଏତେ ସାଥାଅ ନାମେୟାକୋ, ହାର୍ ଇନ୍‍କୁୱାଃ କାମି ଇନ୍‍କୁ ଲୋଃ ଅତୋଙ୍ଗ୍ ଇଦିତାନାଏ।”

ଅତେ ରେୟାଃ ଯଅ କୋରାଃ ଇରୋଃ ସାମାୟ୍

¹⁴ ଇଙ୍ଗ୍ ନେଲ୍ କେଦାଇଙ୍ଗ୍, ଆଡୋଃ ନେଲେପେ, ମିୟାଃ ମାସ୍କାଲ୍ ରିମିଲ୍ ମେନାଃ, ଆଡୋଃ ଏନ୍ ରିମିଲ୍ ରେ ମାନ୍‍ୱା ରାଃ ହୋନ୍ ଲେକା ଜେତାଏ ଦୁବ୍ କାନାଏ, ଅକନିଜାଃ ବୋଅ ରେ ସୋନା ରାଃ ମୁକୁଟ୍ ଆଡୋଃ ତିଈ ରେ ଲେସେର୍ ଦାତ୍ରୋମ୍ ମେନାଃ।

¹⁵ ଏନ୍ତେ ଆଡୋଃ ମିୟାଃ ସିର୍ମାଦାସୀ ମାନ୍ଦିର୍ ଏତେ ଅଡୋଙ୍ଗ୍ କେତେ ଇନିଃକେ, ଅକନିଃ ରିମିଲ୍ ରେ ଦୁବ୍ ଲେନ୍ ତାଇକେନାଏ କାଉରି କେତେ କେଡ଼ା କିଜାଏ “ଆମାଃ ଦାତ୍ରୋମ୍ ଲାଗାଏମ୍ ହାର୍ ଇରେମ୍, ଚିୟାଃଚି ଇରୋଃ ରାଃ ସାମାୟ୍ ଥେବାଃ କାନା, ଚିୟାଃଚି ଅତେ ରାଃ ଯଅ ମାତା ଛାବାକାନା।”

¹⁶ ଏନାମେନ୍ତେ ଅକଏ ରିମିଲ୍ ରେ ଦୁବ୍ ଲେନାଏ ଇନିଃ ଅତେ ରେ ଆଜାଃ ଦାତ୍ରୋମ୍ ତେ ଇର୍ କେଦାଏ, ଆଡୋଃ ଅତେ ଇର୍ ଜାନା।

¹⁷ ଏନ୍ତେ ଆଡୋଃ ମିୟାଃ ସିର୍ମାଦାସୀ ଏନ୍ ମାନ୍ଦିର୍ ଏତେ ଅଡୋଙ୍ଗ୍ ନାଏ ଅକନାଃ ସିର୍ମାଦିଶୁମ୍ ରେ ମେନାଃ, ହାର୍ ଇନିଃତାଃ ରେହ ଲେସେର୍ ଦାତ୍ରୋମ୍ ତାଇଲେନା।

¹⁸ ଏନ୍ତେ ଆଡୋଃ ମିୟାଃ ସିର୍ମାଦାସୀ, ଅକନିଃକେ ସେଙ୍ଗେଲ୍ ଚେତାନ୍ ରେ ଆଧିକାର୍ ତାଇଲେନା, ବେଦୀ ଏତେ ଅଡୋଙ୍ଗ୍‍ନାଏ, ଆଡୋଃ ଅକନିଃତାଃ ରେ ଲେସେର୍ ଦାତ୍ରୋମ୍ ତାଇଲେନା ଇନିଃକେ କାଉରି କେତେ କେଡ଼ାକିଜାଏ, “ଆମାଃ ଲେସେର୍ ଦାତ୍ରୋମ୍ ଲାଗାଅ କେତେ ଅତେ ରେୟାଃ ଆଙ୍ଗୁର୍ ନାଡ଼ି ରାଃ ଯୋଥା କୋକେ ହାଦେମ୍, ଚିୟାଃଚି ଏନ୍ ଆଙ୍ଗୁର୍ ମାତା ଛାବାକାନା।”

¹⁹ ଏନ୍ତେ ଏନ୍ ସିର୍ମାଦାସୀ ଅତେ ରେ ଆଜାଃ ଦାତ୍ରୋମ୍ ଲାଗାଅ କେଦାଏ ଆଡୋଃ ଅତେ ରେୟାଃ ଆଙ୍ଗୁର୍ ନାଡ଼ି ରାଃ ଯଅକୋ ହାଃ କେତେ ଆଜାଃ ପାର୍ମେଶ୍ଵାର୍ ରାଃ ବେଶେ ଖିସ୍ କାନ୍ ତେୟାଃ ମାରାଙ୍ଗ୍ ରାଶିକୁଣ୍ଡା ରେ ସାଜୁତାଦାଏ;

²⁰ ଆଡୋଃ ସାହାର୍ ରାଃ ବାହାରି ରେ ଏନ୍ ରାଶିକୁଣ୍ଡା ରେ ଆଙ୍ଗୁର୍ ତିକାଜାନା, ଆଡୋଃ ରାଶିକୁଣ୍ଡା ଏତେ ନିମିନ୍ ମାୟୋମ୍ ଲିଙ୍ଗୀ ଅଡୋଙ୍ଗ୍ ଜାନା ଚି ଶାଦୋମ୍ କୋୱାଃ ଲାଗାମ୍ ସାନ୍ତେ ସେଟେର୍ ଜାନା, ହାର୍ ଶାଅ କୋଶ୍ ସାନ୍ତେ ଲିଙ୍ଗୀ ଜାନା।