ଲୁକା 2 - ମୁଣ୍ଡା ନାୱା ନିୟାମ୍ୟୀଶୁ ରାଃ ଜାନାମ୍ ( ମାତ୍ତି. 1:18-25 ) 1 ଏନ୍ ହୁଲାଙ୍ଗ୍ କୋରେ ରୋମ୍ରେନ୍ ରାଜା ଆଗାସ୍ତୁସ୍ ପାଡ଼େତେ ଆନାଚୁ ଅଡୋଙ୍ଗ୍ ଜାନା ଚି ଗୋଟା ରୋମ୍ ଦିଶୁମ୍ ରାଃ ହୋଡ଼ୋକୋୱାଃ ନୁତୁମ୍ ଅଲୋଃ କା। 2 ନେ ପାହିଲା ନୁତୁମ୍ ଅନୋଲ୍ ଏନ୍ ସାମାୟ୍ ରେ ହୋବାଜାନା, ଚିମ୍ତାଙ୍ଗ୍ କ୍ୱିରିନିଉସ୍ ସିରିୟା ଜିଲ୍ଲା ରେନ୍ ହାକିମ୍ ତାଇକେନାଏ। 3 ଏନାମେନ୍ତେ ହୋଡ଼ୋକୋ ନୁତୁମ୍ ଅହଲ୍ ନାଙ୍ଗ୍ ଆକୋୱାଃ-ଆକୋୱାଃ ପୁର୍ଖା-ଆପୁ କୋୱାଃ ହାତୁ ତେକୋ ସେନ୍ ଜାନାକୋ। 4 ଏନାତେ ଯୋଶେଫ୍ ହ ଗାଲିଲୀ ଜିଲ୍ଲା ରାଃ ନାଜ୍ରେଥ୍ ସାହାର୍ ଏତେ ୟାହୁଦୀୟା ଜିଲ୍ଲା ରାଃ ଦାଉଦ୍ ଆଃ ହାତୁ ବେଥ୍ଲେହେମ୍ ତେ ସେନ୍ ଜାନାଏ, ଚିୟାଃଚି ଇନିଃ ଦାଉଦ୍ ଅଡ଼୍ଆଃ ରେନିଃ ଆଡୋଃ ଆଜାଃ କିଲି ରେନ୍ ତାଇକେନାଏ। 5 ଏନାମେନ୍ତେ ଇନିଃ ଆଜାଃ ଲୋଟାଦାଆଃ ହୋବାକାନ୍ କୁଡ଼ି ମାରିୟାମ୍ ଲୋଃ ଅକନିଃ ହୋଡ଼ମୋ ରେ ତାଇକେନାଏ ନୁତୁମ୍ ଅହଲ୍ ରିକା ନାଙ୍ଗ୍ ସେନ୍ ଜାନାଏ। 6 ଏନ୍ ଜାଗା ରେ ତାଇତାନ୍ ଲୋଃ ବୁଗିୟୋଃ ସାମାୟ୍ ପୁରା ଜାନା। 7 ଏନ୍ତେ ମାରିୟାମ୍ ଆଜାଃ ପାହିଲା ହୋନ୍କୋଡ଼ା ଜାନାମ୍ କିଜାଏ, ଇନିଃକେ ଲିଜାଃ ରେ ଲାଟୁମ୍ଉୟୁ କେତେ ଉରିଃ କୋୱାଃ ଡାଟ୍କା ରେ ଦୋହୋକିଜାଏ, ଚିୟାଃଚି ଇନ୍କୁ ଲାଗିନ୍ତେ ବେଥ୍ଲେହେମ୍ ହାତୁ ରେ ତାଇନ୍ ଲାଗିନ୍ ଡେରା-ଅଡ଼୍ଆଃ ରେ ଜାଗା କା ତାଇକେନା। ସିର୍ମାଦାସୀକୋ ହାର୍ ମିଣ୍ଡୀ ଗୁପିକୋ 8 ଆଡୋଃ ଏନ୍ ବେଥ୍ଲେହେମ୍ ହାତୁ ରାଃ ନାଡ଼େଏ ପିଡ଼ି ରେ ଚିମିନାଙ୍ଗ୍ ମିଣ୍ଡୀ ଗୁପିକୋ ମିଣ୍ଡୀ ଗୁପି ତାଇକେନାକୋ, ଇନ୍କୁ ନିଦା ଇମ୍ତା ପିଡ଼ି ରେ ଆକୋୱାଃ ମିଣ୍ଡୀ କୋକେ ହୋରୋ ତାଇକେନାକୋ। 9 ପ୍ରାଭୁ ଆଃ ମିୟାଃ ସିର୍ମାଦାସୀ ଇନ୍କୁୱାଃ ସାମାନାଙ୍ଗ୍ ରେ ତିଙ୍ଗୁ ଜାନାଏ, ଆଡୋଃ ପ୍ରାଭୁ ଆଃ ମାସ୍କାଲ୍ ସବେନ୍ ପାଡ଼୍ ମାର୍ଶାଲ୍ ଜାନା, ଏନ୍ତେ ଇନ୍କୁ ଥିମ୍ବାଗି ବୋରୋ ଜାନାକୋ। 10 ଏନ୍ତେ ସିର୍ମାଦାସୀ ଇନ୍କୁକେ କାଜିକେଦାଏ, “ଆଲୋପେ ବୋରୋୟା, ନେଲେପେ ଇଙ୍ଗ୍ ଆପେକେ ମାରାଙ୍ଗ୍ ରାଶିକା ରାଃ ସୁସାମାଚାର୍ ଉଦୁବ୍ ପେ ତାନିଙ୍ଗ୍ ଏନା ସବେନ୍ ହୋଡ଼ୋକୋ ଲାଗିନ୍ ହୋବାୱା। 11 ଇସିଙ୍ଗ୍ ଦାଉଦ୍ ରାଜା ରାଃ ହାତୁ ବେଥ୍ଲେହେମ୍ ରେ ଆପେ ଲାଗିନ୍ ମିୟାଃ ବାଞ୍ଚାଅନିଃ ଜାନାମ୍ କାନାଏ, ଆଡୋଃ ନିଈ ଗି ମାସୀହ୍ ପ୍ରାଭୁ ତାନିଃ। 12 ଆପେ ନେଲ୍ ଉରୁମ୍ ଧାଡ଼ିୟାପେ ମେନ୍ତେ ନେୟା ମିୟାଃ ଚିହ୍ନା ତାନାଃ ଚି ମିୟାଃ କୋଡ଼ାହୋନ୍ ଲିଜାଃ ରେ ଲାଟୁମ୍ ଉୟୁକାନ୍ ଆଡୋଃ ଉରିଃ କୋୱାଃ ଡାଟ୍କା ରେ ଗିତିଃକାନ୍ ନାମିୟାପେ।” 13 ଏନ୍ତେ ଇମ୍ତାଗି ଏନ୍ ସିର୍ମାଦାସୀ ଲୋଃ ଆଡୋଃଗି ସିର୍ମାଦାସୀ କୋୱାଃ ଦାଲ୍ ନେଲ୍ ଜାନାକୋ ଏନ୍ତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ତାନ୍ ଲୋଃ ଦୁରାଙ୍ଗ୍ କେଦାକୋ। 14 “ସିର୍ମାଦିଶୁମ୍ ରେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ହାର୍ ଅତେ ରେ ଏନ୍ ହୋଡ଼ୋକୋୱାଃ ରେ ଅକନ୍ କୋକେ ଇନିଃ ସୁକୁକୋ ତାନାଏ, ଶାନ୍ତି ହୋବାଅଃକା।” 15 ଚିମ୍ତାଙ୍ଗ୍ ସିର୍ମାଦାସୀକୋ ଇନ୍କୁୱାଃ ନାଡ଼େଜେତେ ସିର୍ମାଦିଶୁମ୍ ତେ ରୁଆଡ଼୍ ଜାନାକୋ, ଏନ୍ତେ ମିଣ୍ଡୀ ଗୁପିକୋ ଆକୋ ରେ କାଜିଜାନାକୋ, “ଦୋଲାବୁ, ବେଥ୍ଲେହେମ୍ ହାତୁ ତେ ଅକତାଃ ନେୟାକୋ ହୋବାକାନା ଜେଲେକା ପ୍ରାଭୁ ଆବୁକେ ଉଦୁବାଃ କାବୁୱାଏ, ନେଲେୟାବୁ।” 16 ଏନ୍ତେ ଇନ୍କୁ ସେକାଡ଼୍ ଗି ସେନ୍ କେତେ ମାରିୟାମ୍ ଆଡୋଃ ଯୋଶେଫ୍ କେ ହାର୍ ଉରିଃ କୋୱାଃ ଡାଟ୍କା ରେ ଏନ୍ ହୋନ୍ କେ ଗିତିଃକାନ୍ ନେଲ୍ କିଜାକୋ। 17 ନେୟା ନେଲ୍କେତେ ଏନ୍ ହୋନ୍ ଅକନିଜାଃ ବିଷାୟ୍ ରେ ସିର୍ମାଦାସୀ ଇନ୍କୁକେ ଉଦୁବ୍ ଲେଦାଏ, ଏନାକେ ଉଦୁବ୍ କେଦାକୋ। 18 ଏନ୍ତେ ସବେନ୍ ଆୟୁମ୍ତାନ୍ କୋ ଏନ୍ କାଜିକୋକେ ଅକନାଃ ମିଣ୍ଡୀ ଗୁପିକୋ ଇନ୍କୁକେ କାଜିକେଦାକୋ ଆକ୍ଦାନ୍ଦା ଜାନାକୋ। 19 ମେନ୍ଦୋ ମାରିୟାମ୍ ନେ ସବେନ୍ କାଜିକୋକେ ଆୟୁମ୍କେତେ ମୋନ୍ ରେ ପାହୋମ୍ ତାଇକେନାଏ। 20 ଏନ୍ତେ ମିଣ୍ଡୀ ଗୁପିକୋ ଜେଲେକା ସିର୍ମାଦାସୀ ଇନ୍କୁକେ କାଜିଲେଦାଏ ଏନ୍ଲେକାଗି ଆୟୁମ୍ ନେଲ୍କେତେ ପାର୍ମେଶ୍ଵାର୍ ରାଃ ମାନାରାଙ୍ଗ୍ ଆଡୋଃ ଦୁରାଙ୍ଗ୍ ତାନ୍ ଲୋଃ ଆକୋୱାଃ ମିଣ୍ଡୀ କୋତାଃ ରୁଆଡ଼୍ ଜାନାକୋ। ୟୀଶୁ ରାଃ ନୁତୁମ୍ ମାଣ୍ଡାଅ 21 ଚିମ୍ତା ଆଠ୍ ଦିନ୍ ପୁରା ଜାନା ଏନ୍ତେ ଇନିଜାଃ ଖାତ୍ନା ରାଃ ଦିନ୍ ସେଟେର୍ ଜାନା, ଏଣ୍ଡେ ଇନିଜାଃ ନୁତୁମ୍ ୟୀଶୁ ମାଣ୍ଡାଅ କେଦାକୋ, ଜେଲେକା ସିର୍ମାଦାସୀ ଇନିଜାଃ ଲାହେଃ ରେ ହିଜୁଃ ସିଦା କାଜିଲେଦାଏ। ୟୀଶୁ ମାନ୍ଦିର୍ ରେ ଆଉଜାନାଏ 22 ଚିମ୍ତାଙ୍ଗ୍ ମୁଶା ନାବୀ ରାଃ ଆଇନ୍ ଲେକା ମାରିୟାମ୍ ରାଃ ଫାର୍ଚିଏନ୍ ସାମାୟ୍ ପୁରା ଜାନା, ଏଣ୍ଡେ ଯୋଶେଫ୍ ଆଡୋଃ ମାରିୟାମ୍ ଆଏଃକେ ୟୀରୁଶାଲେମ୍ ମାନ୍ଦିର୍ ରେ ପ୍ରାଭୁ ଆଃ ସାମ୍ନାଙ୍ଗ୍ ରେ ଆଉକିଜାକୋ। 23 ଜେଲେକା ମୁଶା ନାବୀ ରାଃ ଆଇନ୍ ରେ ଅଲାକାନା, “ସବେନ୍ ପାହିଲା ଜାନାମ୍ କୋଡ଼ାହୋନ୍ ପ୍ରାଭୁ ଲାଗିନ୍ ପାବିତାର୍ ହୋବାୱା।” 24 ହାର୍ ମୁଶା ନାବୀ ରାଃ ଆଇନ୍ ଲେକାତେ “ମିଃଜୁଡ଼ି ଦୁଦ୍ମୁଲ୍ ୟାଦୋ ପୁତାମ୍ ଆଃ ବାରିୟା ହୋନ୍ କିନ୍ ଆଉକେତେ ଦାଣେ ରାକାବ୍ ୟାକୋ।” ସିମିୟୋନ୍ ରାଃ ଦୁରାଙ୍ଗ୍ 25 ଏନ୍ ସାମାୟ୍ ୟୀରୁଶାଲେମ୍ ରେ ସିମିୟୋନ୍ ନୁତୁମ୍ ମିୟାଃ ହୋଡ଼ ତାଇକେନାଏ, ହାର୍ ଏନ୍ ହୋଡ଼ ଧାର୍ମୀ ଆଡୋଃ ପାର୍ମେଶ୍ଵାର୍ କେ ମାନାତିଙ୍ଗ୍ ନିଈ ତାଇକେନାଏ, ଆଡୋଃ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଶାନ୍ତି ନାମେ ୟାକୋ ମେନ୍ତେ ମାସୀହ୍ କେ ହୋରୋ ତାଇନାଏ, ଆଡୋଃ ପାବିତାର୍ ଆତ୍ମା ଇନିଜାଃ ଲୋଃ ତାଇକେନାଏ। 26 ଇନିଃକେ ପାବିତାର୍ ଆତ୍ମା ତେ ଉଦୁବାକାନ୍ ତାଇକେନା, ଚି ଜେ ହୁଲାଙ୍ଗ୍ ସାନ୍ ପ୍ରାଭୁ ଆଃ ମାସୀହ୍ କେ କାଏ ନେଲେୟାଏ ଏନ୍ ହୁଲାଙ୍ଗ୍ ସାନ୍ ଆଏ କାଏ ଗୋଜୋଗା। 27 ଏନ୍ ହୁଲାଙ୍ଗ୍ ଇନିଃ ପାବିତାର୍ ଆତ୍ମା ରାଃ ଶିଖାଅ ଲେକାତେ ମାନ୍ଦିର୍ ରେ ହିଜୁଃ ଜାନାଏ, ଆଡୋଃ ଚିମ୍ତା ବାଲେଃ ୟୀଶୁ କେ ଆଜାଃ ଏଙ୍ଗା-ଆପୁକିନ୍ ମୁଶା ନାବୀ ରାଃ ଆଇନ୍ ଲେକା ରାଃ କାମି ରିକାଲାଗିନ୍ ଭିତାର୍ ଆଉକିଜାକୋ, 28 ଇମ୍ତା ଇନିଃ ବାଲେଃ ୟୀଶୁ କେ ତିଈ ରେ ହାତାର୍ କେତେ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କାଜିକେଦାଏ, 29 “ହେ ଗୋମ୍କେ, ନାଆ ଆମ୍ ଆମାଃ ଦାସୀ ଇଙ୍ଗ୍କେ ଆମାଃ କିରିୟା ଲେକାତେ ଶାନ୍ତି ତେ ଗୋଏଃ ଲାଗିନ୍ ବିଦା ଏମାଇଙ୍ଗ୍ ମେ, 30 ଚିୟାଃଚି ଇଙ୍ଗ୍ଆଃ ମେଏଃ ଆମାଃ ବାଞ୍ଚାଅ ରିକା ନିଈ କେ ନେଲ୍କିଜାଏ। 31 ଅକଏକେ ସବେନ୍ ଦିଶୁମ୍ ରେନ୍ ହୋଡ଼ୋକୋ ଲାଗିନ୍ ବାଇ କାଇଜାମ୍। 32 ଇନିଃ ଏଟାଃଜାତି ରେନ୍ କୋକେ ମାସ୍କାଲ୍ ଏମ୍ ଲାଗିନ୍ତେ ପାର୍ମେଶ୍ଵାର୍ ଦିମି ଆଡୋଃ ଆମାଃ ନିଜ୍ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଲାଗିନ୍ ମାଇନ୍ ରାଃ କାଜି ତାନାଃ।” 33 ୟୀଶୁ ରାଃ ଏଙ୍ଗା-ଆପୁକିନ୍ ନେ ସବେନ୍ ବାକାଣ୍ କୋକେ ଅକନାଃ ସିମିୟୋନ୍ ଇନିଜାଃ ବିଷାୟ୍ ରେ କାଜିକେଦାଏ, ଆୟୁମ୍କେତେ ଆକ୍ଦାନ୍ଦାଅଃ ତାଇକେନାକିନ୍। 34 ଏନ୍ତେ ସିମିୟୋନ୍ ଇନ୍କୁକେ ଆଶିଷ୍ ଏମ୍କେତେ ଇନିଜାଃ ଏଙ୍ଗା ମାରିୟାମ୍ କେ କାଜିକେଦାଏ, “ନେଲେମ୍, ନିଈ ଦୋ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ରେ ବାହୁତ୍ କୋ ଲାଗିନ୍ ନାଶ୍ ଆଡୋଃ ବାଞ୍ଚାଅ ଲାଗିନ୍, ଆଡୋଃ ମିୟାଃ ନେଲେକା ଚିହ୍ନା ହୋବାଅଃ ଲାଗିନ୍ ମାଣ୍ଡାଅ କାନାଏ, ଅକନିଜାଃ ବିରୋଧ୍ ରେ କାଜିକୋ କାଜିୟୋଗା, 35 ନେତାଃ ସାନ୍ତେ ଚି ଆବେନାଃ ଜୀଉ ହ ତାଲ୍ୱାର୍ ଏତେ ଗୁତୁ ଫାରୋମ୍ ଲେକା ଦୁକୁ ନାମେୟାଏ, ନେୟାତେ ଥିମ୍ବାଗି ହୋଡ଼ୋକୋୱାଃ ମୋନ୍ ରାଃ ବିଚାର୍ ଉଦୁବୋଗା।” ଆନ୍ନା ରାଃ ଗୋୱା ଏମ୍ 36 ଆଶେର୍ ରାଃ କିଲି ଏତେ ଆନ୍ନା ନୁତୁମ୍ ଫାନୁଏଲ୍ ଆଃ ହୋନ୍କୁଡ଼ି ମିହୋଡ଼୍ କୁଡ଼ି ନାବୀ ତାଇକେନାଏ। ଇନିଃ ଥିମ୍ବାଗି ବୁଡୀ ତାଇକେନାଏ, ହାର୍ ଆଣାଦୀ ହୋବାକେତେ ସାତ୍ ଶିର୍ମା ଭାଇର୍ ଆୟାଃ କଡ଼ା ଲୋଃ ତାଇନ୍ ଧାଡ଼ିକେନାଏ। 37 ଇନିଃ ଚାଉରାସି ଶିର୍ମା ରେନ୍ ବିଧୋବା ତାଇଲେନାଏ, ହାର୍ ମାନ୍ଦିର୍ ନାଡ଼େଏ ଜାଗା କେ କାଏ ବାଗେ ତାଇକେନାଏ, ମେନ୍ଦୋ ଉପାସ୍ ହାର୍ ବିନ୍ତି ରିକା କେତେ ନିଦାଶିଙ୍ଗୀ ପାର୍ମେଶ୍ଵାର୍ କେ ସେୱା ତାଇକେନାଏ। 38 ହାର୍ ଇନିଃ ନେଲେକାନ୍ ସାମାୟ୍ ରେ ହେନ୍ତାଃ ହିଜୁଃ ସେଟେର୍ ନାଏ ଚିମ୍ତା ସିମିୟୋନ୍ ମାରିୟାମ୍ ହାର୍ ଯୋଶେଫ୍ ଲୋଃ ବାକାଣ୍ ତାଇନାଏ ଏନ୍ତେ ଇନିଃ ପାର୍ମେଶ୍ଵାର୍ କେ ଧାନ୍ୟାବାଦ୍ ରିକା ଏଟେଃ କେଦାଏ, ହାର୍ ଏନ୍ ସବେନ୍ କୋକେ ଅକନ୍ କୋ ୟୀରୁଶାଲେମ୍ ରେନ୍ ହୋଡ଼ୋକୋୱାଃ ଛୋଡ଼ାଓ ଲାଗିନ୍ ପାର୍ମେଶ୍ଵାର୍ ମାସୀହ୍ କେ କୁଲିୟାଏ ମେନ୍ତେ ନେଲ୍ ହୋରୋ ତାଇକେନାକୋ, ଇନ୍କୁକେ ଏନ୍ ବାଲେଃ ୟୀଶୁ ରାଃ ବିଷାୟ୍ ରେ କାଜିକେଃକୋୱାଏ। ନାଜ୍ରେଥ୍ ସାହାର୍ ତେ ରୁଆଡ଼୍। 39 ଚିମ୍ତାଙ୍ଗ୍ ଯୋଶେଫ୍ ଆଡୋଃ ମାରିୟାମ୍ ମୁଶା ନାବୀ ରାଃ ଆଇନ୍ ଲେକା ସବେନ୍ କାମି ପୁରା ଛାବା କେଦାକୋ, ଇନ୍କୁ ଗାଲିଲୀ ଜିଲ୍ଲା ରେ ଆକୋୱାଃ ହାତୁ ନାଜ୍ରେଥ୍ ସାହାର୍ ତେ ରୁଆଡ଼୍ ଜାନାକୋ। 40 ହାର୍ ବାଲେଃ ହୋନ୍ ହାରା ଇଦିୟାନାଏ, ହାର୍ ପେଡ଼େଏ ଇଦିୟାନାଏ, ହାର୍ ସେଣା ତେ ଫେରେଃ ଇଦିୟାନାଏ, ହାର୍ ପାର୍ମେଶ୍ଵାର୍ ଇନିଃ କେ ଥିମ୍ବାଗି ସୁକୁଅଃ ତାଇକେନାଏ। ହୋନ୍ ୟୀଶୁ ୟାହୁଦୀ-ମାନ୍ଦିର୍ ରାଃ ରାଚା ରେ 41 ଇନିଜାଃ ଏଙ୍ଗା-ଆପୁକିନ୍ ସବେନ୍ ଶିର୍ମା ଫାସାହ୍ ପାରାବ୍ ରେ ୟୀରୁଶାଲେମ୍ ସେନ୍ ତାଇକେନାକିନ୍। 42 ଚିମ୍ତାଙ୍ଗ୍ ୟୀଶୁ ବାରା ବାରାଶ୍ ରେନ୍ ହୋବାଜାନାଏ, ଇନ୍କୁ ପାରାବ୍ ରାଃ ନିୟାମ୍ ଲେକା ୟୀରୁଶାଲେମ୍ ତେ ସେନ୍ ଜାନାକୋ। 43 ଚିମ୍ତାଙ୍ଗ୍ ଇନ୍କୁ ପାରାବେନ୍ ହୁଲାଙ୍ଗ୍ ପୁରା କେତେ ରୁଆଡ଼୍ ନାକୋ, ଇମ୍ତାଙ୍ଗ୍ ହୋନ୍ ୟୀଶୁ ୟୀରୁଶାଲେମ୍ ରେ ତାଇଜାନାଏ, ଆଡୋଃ ଆଜାଃ ଏଙ୍ଗା-ଆପୁକିନ୍ ନେୟା କାକିନ୍ ସାରି ତାଇକେନା। 44 ଇନ୍କୁ ନେୟା ପାହୋମ୍ କେଦାକୋ, ଚି ଇନିଃ ଏଟାଃ ହୋରା ସେସେନ୍ କୋଲୋଃ ତାଇନୋଗାଏ, ଏନାମେନ୍ତେ ଇନ୍କୁ ମୁଶିଙ୍ଗ୍ ହୁଲାଙ୍ଗ୍ ରାଃ ହୋରା ସେନ୍-ସେନ୍ ଫାରୋମ୍ ଛାବା କେଦାକୋ, ଏନା ତାୟୋମ୍ତେ ଇନିଃକେ ଆକୋୱାଃ ଜାତିପେଡ଼ା ଆଡୋଃ ଚିହ୍ନାର୍-ଜାହ୍ନାର୍ କୋତାଃ ସାଙ୍ଗାର୍ ଏଟେଃ କିଜାକୋ। 45 ମେନ୍ଦୋ ଚିମ୍ତାଙ୍ଗ୍ ଇନିଃକେ କାକୋ ନାମ୍ କିଜା ଏଣ୍ଡେ ସାଙ୍ଗାର୍-ସାଙ୍ଗାର୍ ୟୀରୁଶାଲେମ୍ ସାନ୍ ଆଡୋଃଗି ରୁଆଡ଼୍ ଜାନାକୋ। 46 ଏନ୍ତେ ଆପି ହୁଲାଙ୍ଗ୍ ରାଃ ତାୟୋମ୍ତେ ଇନ୍କୁ ଇନିଃକେ ୟାହୁଦୀ-ମାନ୍ଦିର୍ ରାଃ ରାଚା ରେ ୟାହୁଦୀ ଧାରାମ୍ ଗୁରୁ କୋୱାଃ ଥାଲା ରେ ଦୁବ୍ କାନ୍, ଇନ୍କୁୱାଃ ବାକାଣ୍ ଆୟୁମ୍ ହାର୍ ଆକୋକେ କୁଲିତାନ୍ ଲୋଃ ନାମ୍ କିଜାକୋ। 47 ଏନ୍ତାଃ ଚିମିନାଙ୍ଗ୍ ହୋଡ଼ୋକୋ ଇନିଜାଃ ବାକାଣ୍ ଆୟୁମ୍ ତାଇକେନାକୋ, ଇନ୍କୁ ସବେନ୍ ଇନିଜାଃ ସେଣା, ଆଡୋଃ ଇନିଜାଃ କାଜିରୁଆଡ଼୍ କେ ଆୟୁମ୍ କେତେ ଆକ୍ଦାନ୍ଦାଅଃ ତାଇକେନାକୋ। 48 ଆଜାଃ ଏଙ୍ଗା-ଆପୁକିନ୍ ଆଏଃ କେ ନେଲ୍ କେତେ ଆକ୍ଦାନ୍ଦା ଜାନାକିନ୍ ଏନ୍ତେ ଆଜାଃ ଏଙ୍ଗାକିନ୍ ଆଏଃ କେ କାଜିକିଜାକିନ୍, “ହେ ବାବୁ, ଆମ୍ ଚିନାଃ ମେନ୍ତେ ଆଲେ ଲୋଃ ନେକା ରିକାକେଦାମ୍? ନେଲେମ୍, ଆମାଃ ଆବା ଆଡୋଃ ଇଙ୍ଗ୍ ଆମ୍କେ ଥିମ୍ବାଗି ଦୁକୁତାନ୍ ଲୋଃ ଦାଣା ବାଡ଼ାମେ ତାନାଲେ?” 49 ଇନିଃ ଇନ୍କିନ୍ କେ କାଜିକେଃକିନାଏ, “ଆପେ ଚିନାଃ ମେନ୍ତେ ଇଙ୍ଗ୍କେ ଦାଣା ବାଡ଼ାଇଙ୍ଗ୍ ତାନାପେ? ଚିନାଃ କାପେ ସାରି ତାଇନା ଚି ଇଙ୍ଗ୍କେ ଇଙ୍ଗ୍ଆଃ ଆପୁ ଆଃ ଅଡ଼୍ଆଃ ରେ ତାଇନ୍ ମେନାଃ?” 50 ମେନ୍ଦୋ ଅକନ୍ କାଜି ଇନିଃ ଇନ୍କିନ୍ କେ କାଜିକେଃକିନାଏ, ଏନା ରାଃ ମାନେ ଆକିନ୍ କାକିନ୍ ବୁଝାଅଜାନା। 51 ଏନ୍ତେ ଇନିଃ ଇନ୍କୁ ଲୋଃ ନାଜ୍ରେଥ୍ ସାହାର୍ ରୁଆଡ଼୍ ଜାନାଏ, ହାର୍ ଆକିନାଃ କାଜି ଆୟୁମ୍ କେଦାଏ, ଆଡୋଃ ଆଜାଃ ଏଙ୍ଗାକିନ୍ ନେ ସବେନ୍ କାଜିକୋକେ ମୋନ୍ ରେ ଦହ କେଦାଏ। 52 ଏନ୍ତେ ୟୀଶୁ ସେଣା ରେ ହାର୍ ହୋଡ଼ମୋ ରେ ହାରା ଇଦିୟାନାଏ ହାର୍ ପାର୍ମେଶ୍ଵାର୍ ରାଃ ଆଡୋଃ ହୋଡ଼ୋକୋୱାଃ ଆନୁଗ୍ରାହ୍ ରେ ମାରାଙ୍ଗ୍ ଇଦି ଜାନାଏ। |
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation