ୟାକୁବ୍ 1 - ମୁଣ୍ଡା ନାୱା ନିୟାମ୍ଚିଠି ରାଃ ଏନେଟେଃ କାଜି 1 ପାର୍ମେଶ୍ଵାର୍ ରାଃ ହାର୍ ପ୍ରାଭୁ ୟୀଶୁ ମାସୀହ୍ ରାଃ ଦାସୀ ୟାକୁବ୍ ଆଃ ପାଡ଼େତେ ମାସୀହ୍ ୟାହୁଦୀ କୋୱାଃ ଏନ୍ ବାରା କିଲି କୋକେ ଅକନ୍କୋ ଛିତି ଛାନ୍ ହୋବାକେତେ ତାଇନ୍ ତାନାକୋ ଇନ୍କୁକେ ଜୋହାର୍। ବିଶ୍ଵାସ୍ ହାର୍ ସେଣା 2 ହେ ଇଙ୍ଗ୍ଆଃ ହାଗାକୋ, ଚିମ୍ତାଙ୍ଗ୍ ଆପେ ରାକାମ୍ ରାଃ ପାରୀକ୍ଷା ରେ ଉୟୁଗୋଃ ୱାପେ, ଏଣ୍ଡେ ନେୟାକେ ପୁରାଃ ରାଶିକା ରାଃ କାଜି ମେନ୍ତେ ପାହୋମେପେ, 3 ନେୟା ସାରିକେତେ ଚି ଆପେୟାଃ ବିଶ୍ଵାସ୍ ରାଃ ପାର୍ଖାଅ ହୋରାତେ ସାହାତିଙ୍ଗ୍ ହାରା ଇଦିଅଃତାନା। 4 ମେନ୍ଦୋ ସାହାତିଙ୍ଗ୍ କେ ଆଜାଃ ପୁରା କାମି ରିକାନାଙ୍ଗ୍ ଏମେପେ ଏନାତେ ଆପେ ପୁରା ହାର୍ ପୋକ୍ତା କେନୋଃପେ, ହାର୍ ଆପେୟାଃ ରେ ଜେତାନ୍ କାଜି ରାଃ ଘାଟି ଆଲୋକା ହୋବାଅଃକା। 5 ମେନ୍ଦୋ ଆଗାର୍ ଆପେ କୋଏତେ ଜେତାଏ କେ ସେଣା ରାଃ ଘାଟି ମେନାଃ ରେଦୋ ପାର୍ମେଶ୍ଵାର୍ ତେ ଆସିପେ, ଅକନିଃ ବେଗାର୍ ଏଗେର୍ ତାନ୍ ସବେନ୍ କୋକେ ପୁରା ମୋନ୍ ତେ ଏମେୟାଏ, ହାର୍ ଇନିଃକେ ଏମୋଗା। 6 ମେନ୍ଦୋ ବିଶ୍ଵାସ୍ ତେ ଆସିକାଏ, ହାର୍ ଜାହାନାଃ ସାନ୍ଦେହ୍ ଆଲୋ ରିକାକାଏ, ଚିୟାଃଚି ସାନ୍ଦେହ୍ ରିକାନିଃ ସାମୁଦାର୍ ରାଃ ଲାହାର୍ ଲେକା ତାନିଃ ଅକନିଃ ହୋୟୋ ତେ ଆତୁଅଗାଏ ହାର୍ ଉଛ୍ଲାଅଗାଏ। 7 ନେକାନ୍ ହୋଡ଼ ନେୟା ଆଲୋକାଏ ବୁଝାଅଃକାଏ ଚି ଇନିଃକେ ପ୍ରାଭୁ ତେ ଜାହାନାଃ ନାମୋଗା, 8 ଏନ୍ ହୋଡ଼ ବାରିୟା ମୋନ୍ ତାନିଃ ହାର୍ ଆଜାଃ ସବେନ୍ ବାକାଣ୍ କୋରେ ଆସ୍ଥିର୍ ତାନିଃ। ଗାରିବ୍ ହାର୍ କିଶାଣ୍ 9 ଗାରିବ୍ ବିଶ୍ଵାସୀ ହାଗା କେ ରାଶିକାନ୍ ଚାହି ଜେ ପାର୍ମେଶ୍ଵାର୍ ଇନିଃ କେ ମାରାଙ୍ଗ୍ ବାଇକାଜାଏ, 10 ହାର୍ ବିଶ୍ଵାସୀ କିଶାଣ୍ କେ ରାଶିକାନ୍ ଚାହି ଜେ ପାର୍ମେଶ୍ଵାର୍ ଇନିଃ କେ ମୋନ୍ ରେ ହୁଡିଙ୍ଗ୍ଏନ୍ ବାଇକାଜାଏ ଚିୟାଃଚି ଇନିଃ ତାସାଃ ରାଃ ବାହା ଲେକା ଗାସାର୍ ଅଗାଏ। 11 ଚିୟାଃଚି ଶିଙ୍ଗି ତୁରୋଃ ତୋର୍ଷା ଥିମ୍ବା ଶିତୁମ୍ ଉୟୁଗୋଃୱା ହାର୍ ତାସାଃ କେ ରୋହଡ଼୍ ତାଆଏ, ହାର୍ ଏନାରାଃ ବାହା ଗାସାର୍ କୋଃୱା ଆଡୋଃ ଏନାରାଃ ସୁଗାଡ଼୍ ଛାବା କେନୋଗା। ଏନ୍ଲେକାଗି ବିଶ୍ଵାସୀ କିଶାଣ୍ ହୋଡ଼ ହଗି ଆଜାଃ ହୋରା ରେ ସେନ୍-ସେନ୍ ହାସା ରେ ମେଶା କେନୋଗାଏ। ପାର୍ମେଶ୍ଵାର୍ ପାରୀକ୍ଷା କାଏ ରିକାୟା 12 ଧାନ୍ୟା ଏନ୍ ହୋଡ଼ ତାନିଃ ଅକନିଃ ପାରୀକ୍ଷା ରେ ସ୍ଥିର୍ ତାଇନାଏ, ଚିୟାଃଚି ଇନିଃ ସାହାତିଙ୍ଗ୍ ଫାରୋମ୍ କେତେ ଜାନାଓ ଜୀଦାନ୍ ରାଃ ଏନ୍ ମୁକୁଟ୍ ନାମେୟାଏ ଅକନାଃ ପ୍ରାଭୁ ଆଜାଃ ଦୁଲାଡ଼୍ତାନ୍ କୋଲୋଃ କାଜିଥୋଲ୍ କାଦାଏ। 13 ଚିମ୍ତାଙ୍ଗ୍ ଜେତାଏ ହୋଡ଼ ରାଃ ପାରୀକ୍ଷା ହୋବାଅଃ ତାନା ଦୋ, ଇନିଃ ନେୟା ଆଲୋ କାଜିକାଏ ଚି ଇଙ୍ଗ୍ଆଃ ପାରୀକ୍ଷା ପାର୍ମେଶ୍ଵାର୍ ପାଡ଼େତେ ହୋବାଅଃତାନା; ଚିୟାଃଚି ନାଦୋ ଖାରାପ୍ କାଜିକୋତେ ପାର୍ମେଶ୍ଵାର୍ ରାଃ ପାରୀକ୍ଷା ହୋବା ଧାଡ଼ିୟୋଃୱା, ହାର୍ ନାଦୋ ଇନିଃ ଜେତାୟାଃ ପାରୀକ୍ଷା ଆଏଃ ରିକାୟାଏ। 14 ମେନ୍ଦୋ ମିମିୟାଦ୍ ହୋଡ଼ ଆପାନାଃ ଗି ଖାରାପ୍ ସାନାଙ୍ଗ୍ ରେ ଥାଇଃ କେତେ ହାର୍ ଫାନ୍ଦା ରେ ପାଶେ କେତେ ପାରୀକ୍ଷା ରେ ଉୟୁଗୋଃୱାକୋ। 15 ଏନ୍ତେ ଏତ୍କାନ୍ ସାନାଙ୍ଗ୍ ହୋଡ଼ମୋ ସାବ୍ କେତେ ପାପ୍ କେ ସିର୍ଜାଅ ଏୟାଏ ହାର୍ ପାପ୍ ଚିମ୍ତାଙ୍ଗ୍ ହାରା କେନୋଗାଏ ଦୋ ଗୋନୋଏଃ କେ ଜାନାମ୍ ୟାଏ। 16 ହେ ଇଙ୍ଗ୍ଆଃ ଦୁଲାଡ଼ାନ୍ ହାଗାକୋ, ଆଲୋପେ ହିହିଡ଼ୋଗା। 17 ଚିୟାଃଚି ସବେନ୍ ବୁଗିନ୍ ବାର୍ଦାନ୍ ହାର୍ ସବେନ୍ ବୁଗିନ୍ ଦାନ୍ ସିର୍ମାଦିଶୁମ୍ ଏତେଗି ହିଜୁଗା, ହାର୍ ମାସ୍କାଲ୍ କୋରାଃ ଆପୁ ପାଡ଼େତେ ନାମୋଗା, ଅକନାଃ ରେ ନାଦୋ ବାଦ୍ଲାଅ ହୋବା ଧାଡ଼ିୟୋଃୱା ହାର୍ ନା ଆଦ୍ଲି ବାଦ୍ଲି ରାଃ ହୋରାତେ ଏନାରେ ଉମ୍ବୁଲ୍ ବାନୋଃୱା। 18 ଇନିଃ ଆଜାଃଗି ସାନାଙ୍ଗ୍ ଲେକାତେ ଆବୁ କେ ସାର୍ତି ରାଃ ବାଚାନ୍ ହୋରାତେ ଜାନାମ୍ କେଃବୁୱାଏ, ଏନାତେ ଆବୁ ଇନିଜାଃ ବାଇକାନ୍ ଜିନିଷ୍ କୋଏତେ ମିଃ ରାକାମ୍ ରାଃ ପାହିଲା ଯଅ ହୋବାଅଃୱାବୁ। ଆୟୁମେପେ ହାର୍ ରିକାଏପେ 19 ହେ ଇଙ୍ଗ୍ଆଃ ଦୁଲାଡ଼ାନ୍ ହାଗାକୋ, ନେ ବାକାଣ୍ ଆପେ ସାରିକେପେ: ସବେନ୍ ମିପୀୟାଃ ହୋଡ଼ ସେକାଡ଼୍ଗୀ ଆୟୁମ୍ କାଏ ହାର୍ ଦେରି ତେ କାଜି କାଏ ହାର୍ ଦେରି ତେ ଖିସୋଃକାଏ, 20 ଚିୟାଃଚି ହୋଡ଼ ରାଃ ଖିସ୍ ପାର୍ମେଶ୍ଵାର୍ ରାଃ ଧାରାମ୍ ହୋରା ରେ ସେସେନ୍ କାଏ ଏମେୟାଏ। 21 ଏନାମେନ୍ତେ ସବେନ୍ କାଫାର୍ଚି କାଜିକୋକେ ହାର୍ ଏତ୍କାନ୍ କାଜିକୋକେ ବାଗିକେତେ, ପାର୍ମେଶ୍ଵାର୍ ରାଃ ଏନ୍ ବାଚାନ୍ କେ ଲେବେଃ ମୋନ୍ ଏତେ ଗ୍ରାହାନ୍ ଏପେ ଅକନାଃ ଆପେୟାଃ ରେ ହେର୍ କାନା ହାର୍ ଅକନାଃ ଆପେୟାଃ ଜୀଉ କେ ବାଞ୍ଚାଅ ଧାଡ଼ିୟାଏ। 22 ମେନ୍ଦୋ ପାର୍ମେଶ୍ଵାର୍ ରାଃ ବାଚାନ୍ ରେ ସେସେନ୍ ନିଃ ବାଇଏନ୍ ପେ, ଆଡୋଃ ଖାଲି ଆୟୁମ୍ ନିଃ କାହା ଅକନିଃ ଆଏଃ ଆପାନ୍ କେଗି ଲୋଗୋ ୟାଏ। 23 ଚିୟାଃଚି ଅକଏ ବାଚାନ୍ କେ ଆୟୁମ୍ ନିଃ ତାନିଃ ହାର୍ ଏନାରେ ସେସେନ୍ ନିଃ କାଏ ବାଇଏନ୍ ତାନାଏ, ଦୋ ଇନିଃ ଏନ୍ ହୋଡ଼ ଲେକା ମେନାଇଜା, ଅକନିଃ ଆଜାଃଗି ହୋଡ଼ମୋ ରାଃ ମେଏଃମୁହାଡ଼୍ କେ ଆଏନା ରେ ନେଲ୍ ତାନାଏ। 24 ଏନାମେନ୍ତେ ଚି ଇନିଃ ଆଏଃ ଆପାନ୍ କେ ନେଲ୍କେତେ ସେନୋଃ କୋୱାଏ ହାର୍ ଇମ୍ତାଗି ରିଡ଼ିଙ୍ଗ୍ କୋଃୱାଏ ଚି ଆଏଃ ଚିଲ୍କା ନେଲୋଃ ତାଇକେନାଏ। 25 ମେନ୍ଦୋ ଅକନ୍ ହୋଡ଼ ପାର୍ମେଶ୍ଵାର୍ ରାଃ ପୁରାକାନ୍ ଆଇନ୍ ରେ ଧ୍ୟାନ୍ କେତେ ତାଇନ୍ ତାନାଏ, ଇନିଃ ଆଜାଃ କାମି ରେ ଏନାଲାଗିନ୍ ଆଶିଷ୍ ନାମେୟାଏ ଚି ଆୟୁମ୍କେତେ କାଏ ରିଡ଼ିଙ୍ଗ୍ ତାନାଏ, ମେନ୍ଦୋ ଏନ୍ଲେକାଗି କାମି ତାନାଏ। 26 ଆଗାର୍ ଜେତାଏ ଆଏଃ-ଆଏଃକେଗି ପାର୍ମେଶ୍ଵାର୍ କେ ମାନାତିଙ୍ଗ୍ ନିଃ ଆଟ୍କାର୍ ତାନାଏ ଆଡୋଃ ଆଜାଃ ଆଲାଙ୍ଗ୍ ରେ ଲାଗାମ୍ କାଏ ଏମେୟାଏ ମେନ୍ଦୋ ଆପାନାଃ ମୋନ୍ କେ ଲୋଗୋ ତାନାଏ, ଏଣ୍ଡେ ଇନିଜାଃ ଧାରାମ୍ କାମି ସାମାଗୀ ତାନାଃ। 27 ଆବୁୱାଃ ପାର୍ମେଶ୍ଵାର୍ ଆଡୋଃ ଆପୁ ଆଃ ନାଡ଼େଏ ଫାର୍ଚି ହାର୍ ନିୟାର୍ ଧାରାମ୍ କାମି ନେୟା ତାନାଃ ଚି ଟୁରା ହାର୍ ବିଧୋବା କୋୱାଃ ଦୁକୁ ରେ ଇନ୍କୁକେ ଦେଙ୍ଗା କୋକାଏ, ହାର୍ ଆଏଃ-ଆପାନ୍ କେ ଅତେଦିଶୁମ୍ ଏତେ ଫାର୍ଚି ଜୀଦାନ୍ ତାଇନୋଃକାଏ। |
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation