କୁଲୁସିୟୋରେନ୍ 4 - ମୁଣ୍ଡା ନାୱା ନିୟାମ୍1 ହେ ଗୋମ୍କେ କୋ, ଆପେ ଆପେୟାଃ ଦାସୀ କୋଲୋଃ ନ୍ୟାୟ ତେ ଆଡୋଃ ଠିକ୍-ଠିକ୍ ବେଓହାର୍ ଏପେ, ନେୟା ସାରିକେତେ ଚି ସିର୍ମାଦିଶୁମ୍ ରେ ଆପେୟାଃ ହଗି ମିୟାଃ ଗୋମ୍କେ ମେନାଇଜା। ଚିମିନାଙ୍ଗ୍ ମାନାତିଙ୍ଗ୍ କାଜିକୋ 2 ବିନ୍ତି ରେ ତାଇନ୍ କାନୋଃପେ ଆଡୋଃ ଧାନ୍ୟାବାଦ୍ ତାନ୍ ଲୋଃ ଏନାରେ ଏୟୋନ୍ କାନ୍ ତାଇନ୍ପେ; 3 ଆଡୋଃ ଏନାଲୋଃ ଆଲେୟାଃ ଲାଗିନ୍ ହଗି ବିନ୍ତି କାତେପେ ଚି ପାର୍ମେଶ୍ଵାର୍ ଆଲେ ଲାଗିନ୍ ବାଚାନ୍ ଉଦୁବ୍ ନାଙ୍ଗ୍ ନେକା ଦୁହାର୍ ଖଲାଅ ତାଆଏ, ଚି ଆଲେ ମାସୀହ୍ ରାଃ ଏନ୍ ଉକୁକାନ୍ କାଜି ରାଃ ବିଷାୟ୍ ରେ କାଜି ଧାଡ଼ିୟାଲେ ଅକନାଃ ନାଙ୍ଗ୍ ଇଙ୍ଗ୍ ଥୋଲାକାନ୍ ମେନାଇଙ୍ଗ୍ୟା। 4 ହାର୍ ଏନାକେ ନେକା ଉଦୁବେୟାଇଙ୍ଗ୍, ଜେଲେକା ଇଙ୍ଗ୍କେ ରିକା ଠାଉକା ମେନାଃ। 5 ସାମାୟ୍ କେ ବୁଗିନ୍ ଲେକାତେ କାମି ରେ ଆଉୱେପେ ଆବିଶ୍ଵାସୀ କୋୱାଃ ସାମାନାଙ୍ଗ୍ ରେ ସେଣା ତେ ସେନେପେ। 6 ଆପେୟାଃ ବାକାଣ୍ ସବେନ୍ ହୁଲାଙ୍ଗ୍ ଆନୁଗ୍ରାହ୍ ଲୋଃ ହାର୍ ଆୟୁମ୍ ଲାଗିନ୍ ଶିବିଲ୍ ହୋବାଅଃକା ଏନାତେ ଆପେକେ ସବେନ୍ ହୋଡ଼ୋକୋକେ ଠାଉକା ଲେକାତେ କାଜିରୁଆଡ଼୍ ଏମ୍ ସାରିୟାପେ। ଚିଠି ରାଃ ଟୁଣ୍ଡୁ କାଜିକୋ 7 ଦୁଲାଡ଼ାନ୍ ହାଗା ହାର୍ ବିଶ୍ଵାସେ ଲେକାନିଃ ଦାସୀ, ତୁଖିକୁସ୍, ଅକନିଃ ପ୍ରାଭୁ ରେ ଇଙ୍ଗ୍ଆଃ ଲୋଃ ଗାତି କାମିନିଃ ତାନିଃ, ଇଙ୍ଗ୍ଆଃ ସବେନ୍ କାଜିକୋ ଆପେକେ ଉଦୁବ୍ ତାପେୟାଏ। 8 ଇନିଃକେ ଇଙ୍ଗ୍ ନେୟାମେନ୍ତେ ଆପେତାଃ କୁଲ୍ କାଦିଙ୍ଗ୍ ଚି ଆପେ ଆଲେୟାଃ ଦାଶା କେ ସାରିକେପେ ହାର୍ ଇନିଃ ଆପେୟାଃ ମୋନ୍ ରେ ବିଶ୍ଵାସ୍ କେ କେଟେଃ ପେୟାଏ। 9 ଇନିଃ ଲୋଃ ଇଙ୍ଗ୍ ଉନେସିମୁସ୍ କେହ କୁଲ୍ କାଇଜାଇଙ୍ଗ୍ ଅକନିଃ ବିଶ୍ଵାସ୍ ଲେକାନିଃ ଆଡୋଃ ଦୁଲାଡ଼ାନ୍ ହାଗା ହାର୍ ଆପେୟାଃ ହାତୁ ଏତେ ଗି ତାନିଃ; ନିକିନ୍ ଆପେକେ ନେତାଃ ରାଃ ସବେନ୍ କାଜିକୋ ଉଦୁବ୍ ତାପେୟାକୋ। 10 ଆରିସ୍ଥାର୍ଖୁସ୍, ଅକନିଃ ଇଙ୍ଗ୍ଆଃ ଲୋଃ ବାନ୍ଦିଅଡ଼୍ଆଃ ରେ ଥୋଲାକାନ୍ ମେନାଇଜା, ହାର୍ ମାର୍କୁସ୍ ଅକନିଃ ବାର୍ନାବାସ୍ ରାଃ ହାଗା ଠୋଗୋଗାଏ (ଅକନିଜାଃ ବିଷାୟ୍ ରେ ଆପେ ଆନାଚୁ ନାମ୍ ଲେଦାପେ ଚି ଆଗାର୍ ଇନିଃ ଆପେୟାଃ ନାଡ଼େଏ ହିଜୁଃ ରେଦୋ ଇନିଃକେ ବୁଗିନ୍ ଲେକାତେ ସ୍ଵାଗାତିପେ), 11 ହାର୍ ୟୀଶୁ ଅକନିଃ ୟୁସ୍ତୁସ୍ କାଜିୟୋଗାଏ, ଆପେକେ ଜୋହାର୍ ପେତାନାଏ। ୟାହୁଦୀ ଖାତ୍ନାକାନ୍ ହୋଡ଼ କୋଏତେ ଏସ୍କାର୍ ନିଈ ଗି ପାର୍ମେଶ୍ଵାର୍ ରାଃ ରାଇଜ୍ ଲାଗିନ୍ ଇଙ୍ଗ୍ଆଃ ଗାତି କାମିନିଃ ହାର୍ ଇଙ୍ଗ୍ଆଃ ଜୀଉସୁକୁ ରାଃ କାରାନ୍ ତାନିଃ। 12 ଇପଫ୍ରାସ୍ ଅକନିଃ ଆପେୟାଃ ହାତୁ ଏତେ ଗି ତାନିଃ ହାର୍ ମାସୀହ୍ ୟୀଶୁ ରାଃ ଦାସୀ ତାନିଃ, ଆପେକେ ଜୋହାର୍ ପେତାନାଏ ହାର୍ ସାଦାଏ ଆପେ ଲାଗିନ୍ ରାଶିକା ତେ ବିନ୍ତି କାତେୟାଏ, ଏନାତେ ଆପେ କେଟେଃ ହୋବା କେତେ ପୁରାଃ ବିଶ୍ୱାସ୍ ଲୋଃ ପାର୍ମେଶ୍ଵାର୍ ରାଃ ସାନାଙ୍ଗ୍ ରେ ବାଇତାଇନୋଃପେ। 13 ଇଙ୍ଗ୍ ଇନିଜାଃ ଗୋୱା ତାନିଙ୍ଗ୍ ଚି ଇନିଃ ଆପେୟାଃ ଲାଗିନ୍ ହାର୍ ଲୌଦିକିୟା ସାହାର୍ ହାର୍ ହିୟରାପୁଲିସ୍ ସାହାର୍ ରେନ୍ କୋ ଲାଗିନ୍ ଥିମ୍ବାଗି ରାଶିକା ତେ ବିନ୍ତି କାତେୟାଏ। 14 ଦୁଲାଡ଼ାନ୍ ବାଈଦ୍ ଲୁକା ହାର୍ ଦେମାସ୍ ଆପେକେ ଜୋହାର୍ ମେତାନାକିନ୍। 15 ଲୌଦିକିୟା ସାହାର୍ ରେନ୍ ବିଶ୍ଵାସୀ ହାଗାକୋକେ, ହାର୍ ନୁମ୍ଫାସ୍ ହାର୍ ଆକିନାଃ ଅଡ଼୍ଆଃ ରେନ୍ କାଲିସିୟା କୋକେ ଜୋହାର୍ ମେତାକୋମ୍। 16 ଆଡୋଃ ଚିମ୍ତାଙ୍ଗ୍ ନେ ଚିଠି ଆପେୟାଃ ତାଃ ପାଢ଼ାଅ କେନୋୱା ଦୋ ନେଲେକା ରିକାଏପେ ଚି ଲୌଦିକିୟା ସାହାର୍ ରେନ୍ କାଲିସିୟା ରେ ହଗି ପାଢ଼ାଅଃଚା, ଆଡୋଃ ଏନ୍ ଚିଠି ଅକନାଃଚି ଲୌଦିକିୟା ସାହାର୍ ଏତେ ହିଜୁଗା ଏନାକେ ଆପେ ହଗି ପାଢ଼ାଅଃପେ। 17 ଆଡୋଃ ଆର୍ଖିପ୍ପୁସ୍ କେ କାଜିୟାଇପେ ଚି “ଅକନ୍ ସେୱା ପ୍ରାଭୁ ରେ ଆମ୍କେ ଜିମାକାନା ଏନାକେ ହୋସିଆର୍ ତେ ପୁରାଏମେ।” 18 ଇଙ୍ଗ୍ ପାଉଲୁସ୍ ଆଃ ଇଙ୍ଗ୍ଆଃ ତିଈ ତେ ଅଲାକାନ୍ ଜୋହାର୍। ଇଙ୍ଗ୍ଆଃ ଥୋଲାକାନ୍ କେ ମୋନେ ମାଣ୍ଡାଏପେ। ଆପେ ଚେତାନ୍ ଆନୁଗ୍ରାହ୍ ହୋବା ଇଦିଅଃକା। ଆମୀନ୍। |
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation