୧ ତିମଥି 2 - ମୁଣ୍ଡା ନାୱା ନିୟାମ୍

ଆରାଧାନା ରିକା ରାଃ ନିୟାମ୍

¹ ନାଆ ଇଙ୍ଗ୍ ସବେନାଃ ତେ ସିଦାରେ ନେୟା ସାନାଙ୍ଗ୍ ତାନିଙ୍ଗ୍ ଚି ଆର୍ଜି, ବିନ୍ତି, ଏଟାଃକୋୱାଃ ନାଙ୍ଗ୍ ବିନ୍ତି ହାର୍ ଧାନ୍ୟାବାଦ୍ ସବେନ୍ ହୋଡ଼ୋକୋ ଲାଗିନ୍ ରିକାଅଃକା,

² ରାଜାକୋ ଲାଗିନ୍ ଆଡୋଃ ସବେନ୍ ମାପ୍‍ରାଙ୍ଗ୍ ପାଦ୍ ରେ ତାଇନ୍ ତାନ୍‍କୋ ଲାଗିନ୍, ନେୟାମେନ୍ତେ ଚି ଆବୁ ଆରାମ୍ ରେ ଆଡୋଃ ଜୀଉସୁକୁ ଲୋଃ ପୁରା ପାର୍ମେଶ୍ଵାର୍ କେ ବୋରୋ ତାନ୍‍ଲୋଃ ହାର୍ ମାଇନ୍ ନାମେ ତାନ୍‍ଲୋଃ ଜୀଦାନ୍ ଜୀହିଦାବୁ।

³ ନେୟା ଆବୁୱାଃ ବାଞ୍ଚାଅନିଃ ପାର୍ମେଶ୍ଵାର୍ କେ ବେଶ୍ ଆଦାଇୟା ଆଡୋଃ ସୁକୁୱାଇୟା,

⁴ ଅକନିଃ ନେୟା ସାନାଙ୍ଗ୍ଆଏ ଚି ସବେନ୍ ହୋଡ଼ୋକୋୱାଃ ବାଞ୍ଚାଅ ହୋବାଅଃକା, ହାର୍ ଇନ୍‍କୁ ସାର୍ତିକେ ବେଶ୍ ଲେକାକୋ ନେଲ୍ ଉରୁମେକାକୋ।

⁵ ଚିୟାଃଚି ପାର୍ମେଶ୍ଵାର୍ ମିୟାଃ ଗିୟାଏ, ଆଡୋଃ ପାର୍ମେଶ୍ଵାର୍ ହାର୍ ହୋଡ଼ୋକୋୱାଃ ଥାଲା ରେ ମିୟାଃଗି ଥାଲାରେନିଃ ମେନାଇଜା, ମାନେ ମାସୀହ୍ ୟୀଶୁ ଅକଏ ଚି ହୋଡ଼ ତାନିଃ।

⁶ ଅକଏ ଆଏଃ ଆପାନ୍ କେ ସବେନ୍ କୋୱାଃ ଛୋଡ଼ାଓ ରାଃ ଗୋନୋଙ୍ଗ୍ ଲେକାତେ ଏମ୍‍ତାଦାଏ, ଆଡୋଃ ଇନିଜାଃ ଗୋୱା ଠିକ୍ ସାମାୟ୍ ରେ ଏମ୍ ଜାନା।

⁷ ଇଙ୍ଗ୍ ସାର୍ତି କାଜିତାନିଙ୍ଗ୍, କାଇଙ୍ଗ୍ ହିଡ଼୍‍ତାନା, ଚି ଇଙ୍ଗ୍ ଏନ୍ କାଜି ଲେକାତେଗି ପାର୍ଚାର୍ ହାର୍ କୁଲାକାନ୍ ଚେଲା ହୋବାନାଇଙ୍ଗ୍ ଆଡୋଃ ଏଟାଃଜାତିକୋ ଲାଗିନ୍ ବିଶ୍ଵାସ୍ ହାର୍ ସାର୍ତି ରାଃ ଉପ୍‍ଦେଶ୍ ଏହେମ୍ ନିଈ ବାଇଜାନାଇଙ୍ଗ୍।

⁸ ଏନାମେନ୍ତେ ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍ ଚି ସବେନ୍ ଜାଗା ରେ କଡ଼ାକୋ, ବେଗାର୍ ଖିସ୍ ହାର୍ ଏପେଗେର୍ ତେ ପାବିତାର୍ ଜୀହିଦୋଃ ତାନ୍‍କୋ ତିଈ କୋକେ ଉଠାଓକେତେ ବିନ୍ତି କାକୋ।

⁹ ଏନ୍‍ଲେକାଗି କୁଡ଼ିକୋ ହଗି ଗିୟୁଃ ଆଡୋଃ ମୋନ୍ କେ ବୁଝାଅ କେତେ ଠାଉକା ଲେକାନ୍ ସାଧାରାନ୍ ଲିଜାଃତେ ଆପାନ୍ କେ ସିଙ୍ଗାରେନ୍ କାକୋ; ଉବ୍ ଗାଲାଙ୍ଗ୍ଏନ୍ତେ ଆଡୋଃ ସୋନା ତେ, ଆଡୋଃ ମୋତି କୋଏତେ ଆଡୋଃ ଗୋନୋଙ୍ଗାନ୍ ଲିଜାଃ କୋଏତେ ଦୋ କାହା,

¹⁰ ମେନ୍ଦୋ ବୁଗିନ୍ କାମି କୋଏତେ, ଚିୟାଃଚି ପାର୍ମେଶ୍ଵାର୍ କେ ମାନାତିଙ୍ଗ୍ ତାନ୍ କୁଡ଼ି କୋକେ ନେୟାଗି ଠାଉକା ତାନାଃ।

¹¹ କାଲିସିୟା ସାଭା ଇମ୍ତା ରେ କୁଡ଼ି କେ ହାପା-ହାପା ପୁରା ସବେନ୍ କାଜିକୋରେ ହୁଡିଙ୍ଗ୍ଏନ୍ ତାନ୍‍ଲୋଃ ଶିଖାଅନ୍ ଚାହି।

¹² ଇଙ୍ଗ୍ କୁଡ଼ି କେ ଶିଖାଅ ଏମ୍ ନାଙ୍ଗ୍ ହାର୍ କଡ଼ା ଚେତାନ୍ ରେ ଆଧିକାର୍ ମାଣ୍ଡାଅନାଙ୍ଗ୍ କାଇଙ୍ଗ୍ ଆଚୁଇତାନା, ମେନ୍ଦୋ ହାପାକାନ୍ ତାଇନ୍ କାଏ।

¹³ ଚିୟାଃଚି ସିଦାରେ ଆଦାମ୍ ବାଇନାଏ, ଏନାରାଃ ତାୟୋମ୍ତେ ହାବ୍ବା।

¹⁴ ହାର୍ ଆଦାମ୍ କାଏ ହିଡ଼୍ ଜାନାଏ, ମେନ୍ଦୋ କୁଡ଼ି ହିହିଡ଼୍ ଜାନ୍ତେ ପାପ୍ ରେ ଉୟୁଃ ଜାନାଏ।

¹⁵ ଏଣ୍ଡେ ରେହ କୁଡ଼ି କେ ପାର୍ମେଶ୍ଵାର୍ ହୋନ୍‍ଗାଣା ଜାନାମେ ଇମ୍ତା ବାଞ୍ଚାଅ ୱିୟାଏ, ଆଗାର୍ ଇନିଃ ଆୟାଃ ମୋନ୍ କେ ବୁଝାଅ ତାନ୍‍ଲୋଃ ବିଶ୍ଵାସ୍, ଦୁଲାଡ଼୍ ଆଡୋଃ ପାବିତାର୍ ରେ ବାଇତାଇନୋଗାଏ।