1 ପାତ୍ରାସ୍ 4 - ମୁଣ୍ଡା ନାୱା ନିୟାମ୍1 ଏନାମେନ୍ତେ ଯାବ୍ ଚି ମାସୀହ୍ ହୋଡ଼ମୋ ରେ ତାଇକେତେ ଦୁକୁ ସାହାଅ କେଦାଏ ଦୋ ଆପେ ହ ଏନ୍ଲେକାଗି ମୋନ୍ ତେ ହୋବାକେତେ ଏନାକେ ହାତ୍ୟାର୍ ବାଇୟେପେ, ଚିୟାଃଚି ଅକଏ ମାସୀହ୍ ନାଙ୍ଗ୍ ହୋଡ଼ମୋ ରେ ଦୁକୁ ସାହାଅ କେଦାଏ ଇନିଃ ପାପ୍ କାମି କେ ବାଗେ ତାଦାଏ, 2 ଏନାତେ ଆୟୁର୍ ତେ ନେ ଅତେ ରେ ଆପାନାଃ ଜୀଦାନ୍ ରାଃ ସାରେଜାକାନ୍ ହୁଲାଙ୍ଗ୍ କୋକେ ହୋଡ଼ମୋ ରାଃ ଏତ୍କାନ୍ ସାନାଙ୍ଗ୍ କୋ ଲେକାତେ କାହା ମେନ୍ଦୋ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ଜୀଦୋଃୱାଏ। 3 ଚିୟାଃଚି ଏଟାଃଜାତି କୋୱାଃ ସାନାଙ୍ଗ୍ ଲେକା କାମି ରିକା, ଆଡୋଃ ବ୍ୟାଭିଚାର୍ ରେ ତାଇନୋଃ, ଏତ୍କାନ୍ ସାନାଙ୍ଗ୍, ବୁନୁଲ୍, ଏତ୍କାନ୍ ରିଜ୍-ରାଙ୍ଗ୍ ରେ ରାଶିକାଏନ୍, ଥିମ୍ବାଗି ଇଲିଆରଖି ନୁ, ଆଡୋଃ ହିଲାଙ୍ଗାନ୍ ମୂର୍ତିପୂଜା ରେ ଅକେଣ୍ଡେ ରେ ଆବୁ ସିଦା ସାମାୟ୍ ଆଃଦ୍ କେଦାବୁ, ହେନାକୋ ଢେର୍ ହୋବାଜାନା। 4 ନେୟାତେ ଇନ୍କୁ ଆକ୍ଦାନ୍ଦାଅଃ ୱାକୋ, ଚି ଆପେ ନେକାନ୍ ପୁରା ଏତ୍କାନ୍ ସେସେନ୍ ରେ ଇନ୍କୁ ଲୋଃ କାପେ ଗାତିୟୋଃୱା, ଆଡୋଃ ଏନାମେନ୍ତେ ଇନ୍କୁ ରାକାମ୍ ରାଃ ବାଦ୍ନାମ୍ କାଜି କାଜିୟାକୋ; 5 ମେନ୍ଦୋ ଇନ୍କୁ ଇନିଃକେ ଅକଏ ଜୀହିଦ୍ ତାନ୍ କୋୱାଃ ହାର୍ ଗୋଜାକାନ୍ କୋୱାଃ ବିଚାର୍ ଲାଗିନ୍ ସେକାଡ଼୍ ମେନାଇଜା, ହିସାବ୍ ଏମେୟାକୋ। 6 ଚିୟାଃଚି ଗୋଜାକାନ୍ ବିଶ୍ଵାସୀ କୋକେ ହ ଚିମ୍ତାଙ୍ଗ୍ ଜୀହିଃ ତାଇକେନାକୋ ସୁସାମାଚାର୍ ନେୟାମେନ୍ତେ ଉଦୁବ୍ ଜାନା, ଚି ହୋଡ଼ମୋ ରେଦୋ ହୋଡ଼ୋକୋ ଲେକା ଇନ୍କୁୱାଃ ବିଚାର୍ ହୋବାଅଃକା, ମେନ୍ଦୋ ଆତ୍ମା ରେ ଇନ୍କୁ ପାର୍ମେଶ୍ଵାର୍ ମୋନେ ଲେକାତେ ଜୀହିଃ ତାଇନାକୋ। ପାର୍ମେଶ୍ଵାର୍ ରାଃ ବୁଗିନ୍ ଭାଣ୍ଡାରୀ 7 ସବେନ୍ କାଜି କୋରାଃ ଟୁଣ୍ଡୁ ସେକାଡ଼୍ଗୀ ହୋବାଅଃ ରାଃ ମେନାଃ; ଏନାମେନ୍ତେ ବୁଗିନ୍ ମୋନ୍ ତେ ପାହୋମେପେ ହାର୍ ମୋନ୍ କେ ବୁଝାଅ କେତେ ବିନ୍ତି ଲାଗିନ୍ତେ ଏୟୋନ୍ କାନ୍ ତାଇନ୍ପେ। 8 ସବେନାଃ ତେ ଠାଉକା କାଜି ନେୟା ତାନାଃ ଚି ମିହୋଡ଼୍ ଏଟାଃ ନିଈ ଲୋଃ ଥିମ୍ବା ଦୁଲାଡ଼୍ ଦୋହୋଏପେ, ଚିୟାଃଚି ଦୁଲାଡ଼୍ ଥିମ୍ବାଗି ପାପ୍ କୋକେ ହାରୁବ୍ ତାଆଏ। 9 ସୁକୁ ମୋନ୍ ତେ ମିହୋଡ଼୍ ଏଟାଃ ନିଃକେ ପେଡ଼ାକୋ ଲେକା ସେୱା-ମାଇନ୍ ଏପେ। 10 ଅକଏକେ ଅକନ୍ ବାର୍ଦାନ୍ ନାମାକାନା, ଇନିଃ ଏନାକୋ ପାର୍ମେଶ୍ଵାର୍ ରାଃ ରାକାମ୍-ରାକାମ୍ ରାଃ ଆନୁଗ୍ରାହ୍ ରାଃ ବୁଗିନ୍ ଭାଣ୍ଡାରୀ କୋୱାଃ ଲେକା ମିହୋଡ଼୍ ଏଟାଃ ନିଜାଃ ସେୱା ରିକାଏପେ। 11 ଆଗାର୍ ଜାହାଁଏ କାଜି ରେଦୋ, ନେକା କାଜିଚାଏ ଚି ପାର୍ମେଶ୍ଵାର୍ ରାଃ ବାଚାନ୍ ତାନାଃ; ଆଗାର୍ ଜାହାଁଏ ସେୱା ରିକାୟାଏ, ଏଣ୍ଡେ ଏନ୍ ପେଡ଼େଏ ଲେକାତେ ରିକା ଚାଏ ଅକନାଃ ପାର୍ମେଶ୍ଵାର୍ ଏମ୍ ତାନାଏ; ଅକନାଃ ତେ ସବେନ୍ ବାକାଣ୍ ରେ ୟୀଶୁ ମାସୀହ୍ ରାଃ ହୋରାତେ, ପାର୍ମେଶ୍ଵାର୍ ରାଃ ମାନାରାଙ୍ଗ୍ ଉଦୁବଃଚା। ମାନାରାଙ୍ଗ୍ ଆଡୋଃ ପେଡ଼େଏ ଜାନାଓ-ଜାନାଓ ଇନିଜାଃ ଗି ତାନାଃ। ଆମୀନ୍। ମାସୀହ୍ ରାଃ ଦୁକୁ କୋରେ ମେଶାଏନ୍ 12 ହେ ଦୁଲାଡ଼୍କୋ, ଅକନ୍ ଦୁକୁ ଲେକାନାଃ ସେଙ୍ଗେଲ୍ ଆପେକେ ପାର୍ଖାଅ ଲାଗିନ୍ ଆପେୟାଃ ଚେତାନ୍ ରେ ଜୁଲାକାନା, ଏନାତେ ଆଲୋପେ ଆକଦାନ୍ଦାଅଃ ୱା ଚି ଚିଉଲା ହ କାଆୟୁମ୍ କାନ୍ କାଜି ଆପେୟାଃ ରେ ହୋବାଅଃ ତାନା। 13 ମେନ୍ଦୋ ଜେଲେକା-ଜେଲେକା ମାସୀହ୍ ରାଃ ଦୁକୁ ରେ ମେଶାଅଃ ତାନାପେ, ରାଶିକାଅଃ ପେ, ଏନାତେ ଇନିଜାଃ ମାନାରାଙ୍ଗ୍ ହୋବାଅଃ ରାଃ ସାମାୟ୍ ରେହ ରାଶିକା ଆଡୋଃ ଥିମ୍ବାଗି ସୁକୁ ତାଇନୋଃ ୱାପେ। 14 ଆଡୋଃ ଆଗାର୍ ମାସୀହ୍ ରାଃ ନୁତୁମ୍ ଚାଲ୍ତେ ଆପେକେ ନିନ୍ଦା ରିକାଅଃତାନା ଏଣ୍ଡେ ଆପେ ସୁକୁତାନଗି ତାନ୍ପେ, ଚିୟାଃଚି ମାନାରାଙ୍ଗ୍ ରାଃ ଆତ୍ମା, ଅକନିଃ ପାର୍ମେଶ୍ଵାର୍ ରାଃ ଆତ୍ମା ତାନିଃ, ଆପେ ରେ ଉମ୍ବୁଲ୍ ତାନାଏ। 15 ଆପେ ହେତେ ଜାହାଁଏ ହୋଡ଼ ହାତ୍ୟାରା ୟାଦୋ କୁମ୍ଡ଼ୁ ୟାଦୋ ଗୁନାଃ କାମିନିଃ ହୋବାଅଃ ରେହ, ୟାଦୋ ଏଟାଃ କୋୱାଃ କାମି ରେ ତିଈ ସାଜୁ ଚାଲ୍ତେ ଦୁକୁ କାଏ ନାମ୍ ତାନାଏ। 16 ମେନ୍ଦୋ ଆଗାର୍ ଖ୍ରୀଷ୍ଟିୟାନ୍ ହୋବାକାନ୍ ରାଃ ଚାଲ୍ତେ ଦୁକୁ ନାମ୍ ତାନାଏ, ଏଣ୍ଡେ ଆଲୋ ଗିୟୁଗୋଃକାଏ, ମେନ୍ଦୋ ନେ କାଜି ଲାଗିନ୍ ପାର୍ମେଶ୍ଵାର୍ ରାଃ ମାନାରାଙ୍ଗ୍ ରିକା ଚାଏ। 17 ଚିୟାଃଚି ହେନ୍ ସାମାୟ୍ ହିଜୁଃ ସେଟେର୍ କାନା ଚି ସିଦା ପାର୍ମେଶ୍ଵାର୍ ରାଃ ହୋଡ଼ୋକୋୱାଃ ନ୍ୟାୟ ହୋବାଅଃକା; ଆଡୋଃ ଯାବ୍ ଚି ବିଚାର୍ ରାଃ ଏଟେଃ ଆବୁ ତେଗି ହୋବାଃୱା ଏଣ୍ଡେ ହିନ୍କୁୱାଃ ଚିନାଃ ହାଲ୍ ହୋବାଃୱା ଅକନ୍ କୋ ପାର୍ମେଶ୍ଵାର୍ ରାଃ ସୁସାମାଚାର୍ କେ କାକୋ ମାନାତିଙ୍ଗ୍ ତାନା? 18 ଆଡୋଃ “ଆଗାର୍ ଧାର୍ମୀ ହୋଡ଼ ଗି କେଣ୍ଟେଃ ତେ ବାଞ୍ଚାଅ ନାମେୟାଏ, ଏଣ୍ଡେ ପାର୍ମେଶ୍ଵାର୍ କେ କାଏ ବୋରୋତାନ୍ କୋୱାଃ ହାର୍ ପାପୀ କୋୱାଃ ଚିନାଃ ହୋବାୱା?” 19 ଏନାମେନ୍ତେ ଅକନ୍ କୋ ପାର୍ମେଶ୍ଵାର୍ ରାଃ ସାନାଙ୍ଗ୍ ଲେକାତେ ଦୁକୁ ସାହାଅ ତାନାକୋ, ଇନ୍କୁ ବୁଗିନାଃ ରିକାତାନ୍ ଲୋଃ ଆକୋୱାଃ-ଆକୋୱାଃ ଜୀଉ କେ ବିଶ୍ଵାସେ ଲେକାନିଃ ଶିର୍ଜାଅନିଜାଃ ତିଈ ରେ ସୋମ୍ପାଅୱେ କାକୋ। |
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation