MAREKO 1 - Miriam Mer Gospels 1902

¹ Abele ditimedilu Iesu Keriso ra debe merkem, Ade ra Uerem.

² Mokakalam gaire perofeta detali, kega, Kaka emarida karbara merkem mara op, ko paret mara gab;

³ Le kodo ereretikri soge purge, kega, Paret Iehoua ra gab, barditug abara gab giz.

⁴ Ioane ko bapataiso abele soge purge, a marau bapataiso ra obazgeda ko detue adud giz.

⁵ Iako abim bakeuare le Iudaia uridili, a uiaba Ierusalemalam, E uiabi bapataiso uridili, abele Ioridano dodo, uiaba detaut uiaba adud giz.

⁶ Kamela mus Ioane ra am uali, abara uak kau ra paur; E pem ereg a isas ra sumes are:

⁷ E marau, kega, Nerute kara sorge ekas adigir kari tumge, kaka nole abkoreb eparisili a detue abara teter gab mukub.

⁸ Kaka uabi bapataiso nilam; E dali uabi bapataiso Lamar Zogolam.

⁹ Abele kerker ge, Iesu ekasereder Nazaretalam Galilaiage, Iesu Ioane de bapataiso abele Ioridano ge.

¹⁰ E nilam ekueilu, E egremalu kotor nakesmulu, a Lamar Zogo epereda abi tumge, mokakalam dibadib:

¹¹ Iako kodo mer uataba kotorlam, kega, Mama kara Uerem nasge, kaka mari sererege.

¹² Dudumge Lamar Zogo abi emarida soge purem.

¹³ Foate gaire gerger E soge purge emeri, Satana de abi mirem; abi dog gaire ebur marmar; angela giz abara memeg.

¹⁴ Emetu Ioane didbari, Iesu bakeamulu Galilaiaem, ko marau Ade ra debe merkem, kega,

¹⁵ Kerker ge tabarki, a Ade ra baselaia maike; uaba obazgeda, a debe merkem oituli.

¹⁶ E ekas keper dege Galilaia, E dasmer Simona a Anederea tabara keimer net gurem dikri: abelelam ui darali umele larem.

¹⁷ Iesu ui darali daratager, kega, Kari narmili, kaka uabi depegemelu ko le asaperem.

¹⁸ Ui darali dudum net dekaerei, a abi irmilei.

¹⁹ E ko kebikebi ekasereder, E dasmer Iakobo Zebedaio ra uerem, a Ioane abara keimer, nar ge muigi, a net euelei.

²⁰ E sobkak ui darali ereretikrei: ui darali Zebedaio uiaba aba dekaerei nar tumge, a gaire memeg, a abi irmilei.

²¹ Uiaba Kapernauma tabakeuare; sabath ge E dudum sunago tabao, a ereuerem.

²² Tabara ereuerem uiaba damered: abelelam E uiabi ereuerem mokakalam le pardale, a nole mokakalam aotale giz.

²³ Nerute le nagri sumes lamar muige abele sunago; E ereretikri, kega,

²⁴ Iesu Nazaretalam, keriba nako marim? nako, mama tabarki keribi adem dipit? kaka mari opasereret, Ade ra Zogo.

²⁵ Iesu abi daisumdalu, kega, Bamer, a teosmeda abielam.

²⁶ Abele sumes lamar abi ezagri, a au ereretikri, epe teosmed abielam.

²⁷ Uiaba uridili damered, a mer atager, kega, Nalu pedali? nako abele kerkar ereuerem? abelelam sumes lamar giz E sirdam adigir, uiaba abi asoli.

²⁸ Epe sobkak E ekoseli gaire ged ge Galilaia deraueili.

²⁹ Uiaba teosmeda sunagolam, sobkak uiaba tabarot kemem Ioane a Iakobo metaem, abele Simona a Anederea ra meta.

³⁰ Simona kosker ra apu uteid, gem urueri: uiaba sobkak abi etomelu.

³¹ E keitekas abi tag erpeilu; sobkak urueri dekaida, E uiabi memeg le.

³² Kikem, lem baraigida, uiaba abim taraisare gaire, gim le, a gaire le sumes lamar nagri.

³³ Gaire ged uridili netate gedim op meta.

³⁴ E idigiri gaire tonar gim le, a imuda sumes lamar giz; E nole gaire demoni emarida ko mer egali, abelelam uiaba abi opasereret.

³⁵ Nede be iuaokaer, E ekueilu a teosmeda, a nogutebem bakeamud, abele esorerapare.

³⁶ Simona, a abara boai, abi irmilare.

³⁷ Uiaba abi erdali, uiaba abi detager, kega, Ui uridili mari naraimeli.

³⁸ E uiabim detaut, kega, Minabakeuare gaire maiged, a kaka marau abele; abelelam kara dorge dali.

³⁹ E marau muige gaire uiaba sunago Galilaia uridili, a demoni giz imuda.

⁴⁰ Abim keitoabuki nerute lepera, a abim ermeder, abi detager, kega, Ese mama laglag, mama umele kari nadgiri.

⁴¹ E abi omare, a tag itrimuda, a abi ituti, a abi detager, kega, Kara lag; ma idigiri

⁴² E emetu detager abele mer, sobkak lepera dekaida abielam, E idigir.

⁴³ E abi mer tigri, a abi emarida,

⁴⁴ A abi detager, kega, mamor dasmer, atager kak nerute le; bakeamuda, mabu natomelu abi zogo tarim le, a ikuar gaire lu Mose mer tigri uiabim; atamelam mama emetu idigir.

⁴⁵ E bakeamuda, a ditimeda ko daratagerare, a detager deraueili, abelelam Iesu nole umer kak paret kak ekas abele ged, E soge purge emeri; gaire le abim tabakeuare abgedlam.