TASALUNIIKI ’DE 1 - Uduk New Teatament and OT Portions

Monthe Me’d mo

¹ ABuulus dhala Silwaanus dhala Ṯimuṯẖawuus. Eya ḵaniisa gi Pan Tasaluniiki mo eya Arumgimis jin ta’da Baba mo dhali Tap̱a Yesus Ḵrisṯẖos mo. A’the e um mo dhali moŋḵu’th is mo be.

Moŋgam Gwo Is gi ’Kwani gi Pan Tasaluniiki mo dhali She/mm kun Tana Uni mo

² Aman c̱ikina mo jin ’boruwa ’bor bwa i is mo eya Arumgimis isa yempa/ mo gom umi ’baar mo mmoṯikir gway bum mmoka e eya ’thom bam mo,

³ mmoka e ibwambor ma Arumgimis bana mo dhali Ababa mo gom miim bum gi moŋgam gwo is mo dhali miin to kun miina um ki mo/en mo dhali mmoṯel sho’k mo e mo ma ’teŋ kap̱e/ e Tap̱a Yesus Ḵrisṯẖos bana mo be.

⁴ Haali/ aman misha mo iwaḵ mo, um kun enu ka Arumgimis mo, me’d jin kwanykina a’di um mo

⁵ haali/ gwom ’borgam bam p̱u’dki’d e um mo jasi ki gwo yisa, hili si’da/ ki mom’bi’th mo dhali ki Shi/in Dheleladhelel mo dhali ki gwo jin ’tu’du’d mo ki mo jin suguwa du mo. Um mishkin ki aman tana ’kwani kun wakata kun nyo/kunu mo e bwam um mo gom gway bum mo.

⁶ Dhali um warkin ki imanthoḵ aman mii mo dhali gom Tap̱a mo haali/ um bu’thki gwo mo ki mo gi isa nyor jin ’kosho’d kagahara mo ki moŋ’kuny bwa mo jin ta moshi/irr ki Shi/in Dheleladhelel mo.

⁷ Wakan ki um warkin ki uni gun ta she/mm goma ris uni kun gamki gwo is mo e Pam Makiduniyya mo dhali e Pa Aḵaa/iya mo be.

⁸ Haali/ gwo gi Tap̱a yisa igwoki’d mo jasi ’peni um e Pam Makiduniyya mo dhali Pa Aḵaa/iya mo hili si’da/ moŋgam gwo is bum si’da/ eya Arumgimis mo a’di yaki’d ka pije/ eya ris mo ’baar mo. Wakan ki aman yisa mina ta gi toŋ kamu/ mmo/o mo.

⁹ Haali/ uni ki is buni be’dki isi gwo mo gom aman mo gom han jin hankunu aman mo e bwaman um mo dhali gom mom bum jin ṯu’kkina um mo eya Arumgimis mo ’peni aris tomp̱inycon mo mmomii to gom a’di jin di ki e mo, a’di jin ta’da Arumgimis gana/ mo be,

¹⁰ dhali mmoc̱or Ya/m piti ’peni momis mo, a’di jin cukina a’di mis mo ’peni mowu mo, a’di jin ta’da Yesus jin midi ’cuḵ ana mo ’pena nyor jin midi p̱u’du/ mo be.