GWAY GI IDAWUU’D 80 - Uduk New Teatament and OT Portions

Eya manyuḵ gway, isi ki gwo gom jandin to mo. Gom gwo jin c̱inu goma Asap̱ mo. A’di jin ta gway mo.

¹ C̱iyi ’ce mo ma, ayy Amanhil Ḵa’bal ma Israyiil mo, /e jin shukina Yuusup̱ bway ka pije/ me’da ma’diny ḵa’bal mo. /E jin karkunu mo mmoc̱a’ba p̱o/ ḵursi ma maliḵ mo ap̱owa c̱arabiim kun ’thup̱a ḵursi is ka bim buni mo tani, kushi mo mo

² ibwambor ma Ep̱rayim mo dhali bwambor ma Benyamiin mo dhala Manassa mo. Piri mo ma dem dem pini is mo dhali yayu/ mo mmota am is ki me’d mo.

³ Waru/ am is mo, ayy Arumgimis. Dhalki bwam/em pini kushu mo mo, ki am minu ta is ki me’d mo.

⁴ Ayy Tap̱a Arumgimis gi momis mo, anyor pini midi di p̱u’d kakasja gom mon’tho gi ’kwanim pini mo?

⁵ /E ki c̱i uni tonṯe/ jin shwana uni jin ta jabu’th mo, dhali /e ki c̱i uni jabu’th mmop̱i mo ki sheŋ kwa jin ’tu’du’d mo.

⁶ /E ki dhu am ki imannyaḵ ’kom bam mmoc̱i am gura/ mo, dhali uni gun ta ’kup̱ ki am mmop̱e’th e bwaman is buni mo.

⁷ Waru/ am is mo, ayy Arumgimis gi momis mo. Dhalki bwam/em pini kushu mo mo, ki am minu ta is ki me’d mo.

⁸ /E ki ḵal cwalman ka pije/ ’peni Pam Masir mo, dhali /e ki ura ris kal gi ’kwaniny’cesh ka pije/ mo dhali c̱u’th a’di mo.

⁹ /E ki kara ’cesh eya tente/ gom a’di mo. A’di ki guwa birman piti ka luŋgu’b e mo jin ’kula’kul mo dhali a’di ki ’tu’d mony’cesh mo.

¹⁰ Dhali ’kuwosha turga/ uni ’tu’dkunu mo ka lam piti mo, cwa kun wana e ka bwanyayiis kun c̱a’bki dem dem nyaḵka bim piti mo.

¹¹ A’di ki hash ka bim piti ntagi ḵumma/ yi’de/ mo dhala birman piti mmoya gam yi’de/ a’cesh mo.

¹² Goma tinta sa/ i’ce’dkina /e agaŋgaram piti ka ’cesh mo wakan ka ris uni gun iikin ki iimpe e bway piti mo tani hoki maman piti mo?

¹³ Abogo’b gi bwaasho a’di ha’thki a’di ki ’twa/ mo, dhali aris to gwansan kun ’kon mmoḵal ya e bwam bunto mo tani shwaki a’di mo.

¹⁴ Ṯuku mo doḵ/e, ayy Arumgimis gi momis mo. Hili mo ka luŋgu’b ’peni momis mo dhali p̱ar mo e mo. Hili cwalman ma mura’th yan mo ma,

¹⁵ a’di jin koṯẖki’d jin sikina /e ka bim poros pini mo.

¹⁶ Uni c̱i’thki a’di ki o’d mo dhali uni ki jep̱ uni ka ’cesh mo. Dhalki uni ’ce’d sho’k mo e mo jin ḵucura ḵucur mo jin ta jis/em pini mo.

¹⁷ Hili dhalki me’d pini a’di di’da p̱o/ wathi/ jin ta me’da bim poros pini mo, a’di jin ta ya/ gi wathi/ jin karkina /e mmo’bitha’bi’th gom is pini mo.

¹⁸ Dhali yan’ko’d am mina mol doḵ ka nyaŋ’ko’d ’peni /e ki sule/ mo. C̱i am moŋ’koki/e mo dhali am mina yer gway pini mo.

¹⁹ Waru/ am is mo, ayy Tap̱a Arumgimis gi momis mo. Dhalki bwam/em pini kushu mo mo, ki am minu ta is ki me’d mo.