GWAY GI IDAWUU’D 54 - Uduk New Teatament and OT Portions

Eya manyuḵ gway mo ka shu/ kun buḵu gway mo. Gway ma Dawuu’d jin yetha a’diya ye’th sho’k mo me’d jin p̱u’dkina ’Kwani gi Pan Siip̱ mmoṯora Shawuul gwo mo ka Dawuu’d bagki’d e bwam am mo.

¹ Tayi aha/ is ki me’d mo ma, ayy Arumgimis mo, ki gway pini mo, dhali yeyi aha/ mo ki mo ma dem dem pini mo.

² Ciḵi mon’thom pem mo ma, ayy Arumgimis. C̱iyi ’cem pini ki gwo gi ’twa/ pem mo.

³ Haali/ iman/ush ’kwani ga/ mo tani uni cu mis ap̱o/ aha/ mo, dhali imangora bwa ki gor mo tani uni ŋap̱ki mondiki/em pem mo. Dhali uni ’koki kara Arumgimis ibwambori jis/em buni mo. Doshi ma dhali ’cunycuri yan mo.

⁴ Hili mo mo ma, Arumgimis ta’da manwoṯẖ pem mo, dhali Tap̱a a’di ta’da manṯel aha/ mondiki/em pem sho’k mo.

⁵ A’di midi ri’c ’kwani kun ta ’kup̱ ki aha/ ki tonthus mo. Dhali e mii ma isiŋ ganam pini mo tani /e mini daḵ uni ’pemen buni ’kup̱ mo be.

⁶ Ki bwam pem jin di ’baḵany mo tani aha/ c̱ina to jin ’ciṯẖu/ ’kus mmomiiya bas ki /e mo. Dhali aha/ mina c̱i mo jin ’boruwa ’bor bwa i is ki gway pini mo, ayy Tap̱a, haali/ mii yan a’di ’boro’d mo be.

⁷ Haali/ /e ’cuḵki aha/ mo ’pena ris monṯo’c bwam pem mo, dhali em pem hilki mo jin p̱inu mii e ap̱o/ ’kwani gun ta ’kup̱ ki aha/ mo be.