GWAY GI IDAWUU’D 5 - Uduk New Teatament and OT Portions

Eya manyuḵ gway mo gom imanp̱iya ṯẖaṯẖar mo. Gway ma Dawuu’d.

¹ C̱iyi ’cem pini ka ris gwom pem mo ma, ayy Tap̱a, yip̱i /e ’kup̱ mo gom ohon pem jin ohonkika/ mo.

² Ciḵi kony cuuwam pem jin gwoka/ mo ma, aMaliḵ pem dhali Arumgimis pem, gom e /e mo tani aha/ ’thona mo.

³ Ayy Tap̱a, e mon’thamo/ mo tani /e ciḵki ’twam pem mo, e mon’thamo/ mo tani aha/ ’ciṯẖa to ’kus gom /e mo dhali tima tim mo.

⁴ Haali/ /e diki ta Arumgimis jin ’kunya bwa mo e tonthus jin miikunu mo. tonthus midi diki nyaḵ di ki /e mo.

⁵ Iman’theḵ ’ba/i mis mo mini ’koki doshi bwambori jis/em pini mo, /e shi/kina ris imanmii tonthusi e mo.

⁶ /E ’ce’dki uni gwansan sho’k mo kun oki gwo ma ṯor mo. Tap̱a shi/i uni gwansani e kun budha ṯe/ jasi goma bas mo dhali ’kwani kun tana he’k e ka he’k e mo.

⁷ Hili aha/ ki mo/en pini jin ṯelu sho’k mo jin ishki’d ka enthus mo tani aha/ mina cic̱ gu’b pini mo, dhali aha/ mina luŋa luŋ ka ḵarambuye/ gi gu’b gi mondheleladhelel pini mo ki moŋḵo/ /e mo.

⁸ Shuyi aha/ bway mo ma, ayy Tap̱a, e mii ma ḵar/em pini mo haali/ gom ’kup̱ pem tana ris mo, kari bway pini ka ji sho’k mo ibwambori aha/ mo.

⁹ Haali/ gwoŋ gana/ yisa di’da e ’twam buni mo, adum buni ’ce’dkunu sho’k mo, ’kus buni wana e ki moŋ’kup̱aje jin ḵa’du ’twa/ mo, dhali uni ko ’kus ka le’d buni mo.

¹⁰ Dhuyi uni mmoḵal tom buni kun ’ko uni i’ba/ mo, ayy Arumgimis, dhalki uni biṯkin ki gwom buniŋ gana/ gun ’ko uni ibwa mo, haali/ goma dhiŋ gwom buni ka ris mo tani ṯaki uni ka pije/ mo, haali/ uni walkin ki ṯas ṯas ap̱o/ /e mo.

¹¹ Hili dhalka ris uni gwansan kun huri jwa mo e /e mo tani ’kunya bwa mo. Dhalki uni yuḵ gway ki sule/ gom moŋ’kuny bwa mo, dhali /e a’di imina uni jeṯṯ me’di cine/ mo, ki uni gwansan kun en gway pini mo tani mina bwa i/ii imis gom /e mo.

¹² Haali/ /e ’borki uniŋ ḵar/e mii mo, ayy Tap̱a, /e kumki uni ki mo ma ’them pini me’da goŋgoro/ mo.