GWAY GI IDAWUU’D 34 - Uduk New Teatament and OT Portions

Gway ma Dawuu’d, ki a’di ki mii me’d wathi/ jin gus ma du mo ibwambor ma Abimaalik mo. Wakan a’di urki a’di ka pije/ mo dhali a’di ki ’kosh ya mo.

¹ Aha/ ’bora Tap̱a mii isa yempa/ mo. Momaŋ midi di isa yempa/ e ’twam pem mo.

² Aḵashiram pem kar is ki ca e Tap̱a mo. Dhalki uni gwansan kun ’koshu ki isa nyor ciḵ a’di mo dhali ’bor bwa mo.

³ Ayy kari Tap̱a ki ca nyaḵki aha/ mo, dhali dhalki ana kara gway piti ki ca imonṯal ’de/ mo.

⁴ Aha/ ŋap̱kina Tap̱a mo dhali a’di thoḵki aha/ ’twa/ mo, dhali ’cuḵ aha/ mo ’pena ris moŋḵo/ is pem mo.

⁵ Hili ’kup ki a’di mo dhali kushi mo mo wakan ki bwam/em bum mini ’koki ’ko ki mo ma ’the is mo.

⁶ Wathi/ ha’th’ko’d yan gwoki’d mo dhali Tap̱a ciḵki a’di mo dhali ta a’di is ki me’d mo ’pena ris monṯo’c bwam piti mo.

⁷ Aman’doyu gwo gi Tap̱a ’kamki’da ’kam ka kul is gom uni gwansan kun ḵo/ki a’di mo, dhali ’cuḵ uni mo.

⁸ Ayy nyoḵi ma dhali p̱ar e ki Tap̱a ’boro’d mo. Mom’bor bwa gom wathi/ jin bu’thki mo jin huru jwa e a’di mo.

⁹ Ayy ḵoki Tap̱a mo um piti kun dhunu ki she/ ki dhelel dhelel mo, haali/ uni gwansan kun ḵo/ki a’di mo tani ’kona ton tiya ki har mo.

¹⁰ Ushi dhuruca dhop̱ uni hari to mo haali/ uni ’kosha ṯe/ mo hili uni gwansan kun simmki Tap̱a e mo tani uni ’koki har tom ’boro’da kamu/ mo.

¹¹ Iiyu/ ma, ayy iya/ mo, ciḵi gwo ’peni aha/ mo. Aha/ mina ṯor um gwo gom moŋḵo/ is gom Tap̱a mo.

¹² Wathi/ jana i/ona bwa ki mondiki/e mo, dhali ’thoṯẖ bwa ka yempa/ ki a’di mina bwa ’kuny ka yempa/ gom tom ’boro’d mo?

¹³ Nona le’d pini ’twa/ ’peni gwon thus mo dhali ’twam pini mmo/o gwo ka he’k e mo.

¹⁴ Ḵwa/i bwa mo ’peni tonthus mo dhali miiyi ki ’bore/ mo. Simmi moŋḵu’th is e mo dhali uri a’di isho’k mo.

¹⁵ E gi Tap̱a a’di di’da p̱o/ uni kun miin ka ḵar/e mo dhali ’cem piti ’kup̱ ki kom buni mo.

¹⁶ Bwam/e gi Tap̱a di’da p̱o/ imanmii tonthus mo, ki uni minu ’ciṯẖ ’twa/ mo ki uni minu ’koki doḵ/e ka e e mony’cesh mo.

¹⁷ Ki uni kun mii miiŋḵar/e gwokin gom mowoṯẖ mo tani Tap̱a ciḵki uni mo dhali ’cuḵ uni mo ’peni aris monṯo’c bwam buni mo.

¹⁸ Tap̱a ’disha’dish ka yempa/ e uni kun ’ce’dkunuwa du mo dhali ta uni is ki me’d mo uni kun siri’ckunu shi/in ki sho’k mo.

¹⁹ Monṯo’c bwa tana ris gom a’di jin mii miiŋḵar/e mo, hili Tap̱a ’cuḵki a’di ’peni uni ’baar mo.

²⁰ A’di ki dhuwa risa simam piti ’baar mo. Simam pitiŋ kamu/ yisa ’ce’dkunuwa.

²¹ Tonthus jin miinu midi ’kosha manmii tonthus mo, dhali uni gwansan kun shi/ki ’kwani kun mii miiŋḵar/e i e mo tani minu waḵ mo be.

²² Tap̱a a’di wanki mondiki/e gi c̱iŋkinam piti ’ba/ mo. Jan ṯal ’deŋ kamu/ ’peni uni gwansan kun bu’thki mo jin huru jwa e a’di mo tani minu ’koki waḵ mo be.