GWAY GI IDAWUU’D 3 - Uduk New Teatament and OT Portions

Gway jin yuḵu mo mmoka mo jin miinuwa mii e mo jin ta jim ma Dawuu’d mo me’d jin guskina a’di mo ’peni ya/m piti ka Abshaluum mo.

¹ Ayy Tap̱a, ’kwani kun ta ’kup̱ gi aha/ wana risa! Uni tana ris ka ris kun cuna p̱o/ aha/ mo.

² Uni tana ris o gwo gom aha/ mo ki: mowoṯẖa/ kamu/ midi di gom a’di eya Arumgimis yisa. Doshi ma dhali ’cunycuri yan mo.

³ Hili /e, ayy Tap̱a, itana goŋgoro/ gom aha/ mo, dhali monycam pem mo dhali aman’de’k ’kup̱ pem ki mis mo.

⁴ Aha/ ’thera cuuwa/ ki nyanye/ e Tap̱a mo, dhali a’di thoḵki aha/ ’twa/ ’peni ’kuwosh piti jin ḵogu mo. Doshi ma dhali ’cunycuri yan mo.

⁵ Aha/ isha ’ko’da ’cesh dhali ish e mo. Aha/ mera e doḵ/e mo, haali/ Tap̱a a’di ṯeki aha/ mo.

⁶ Aha/ dinaki ḵo/ is gom ’kwani kun ’koni alaap̱i ’kume’d mo uni gun doshkin ki is buni ap̱o/ mo mmo’kama ’kam mo.

⁷ Cuyi mis mo ma, ayy Tap̱a. ’Cuḵi aha/ mo ma, ayy Arumgimis pem. Haali/ /e dorkina ris uni gun ta ’kup̱ ki aha/ e peshe/ mo, dhali /e ki ’ce’d she/ gi uni gun ta thus ki thus mo.

⁸ Mo jin ’cuḵuwa ’cuḵ mo tani a’di ta ji gi Tap̱a mo, mom’bor miim pini a’di midi di ap̱o/ ’kwanim pini mo. Doshi ma dhali ’cunycuri yan mo.