GWAY GI IDAWUU’D 144 - Uduk New Teatament and OT Portions

Gway ma Dawuu’d.

¹ Mom’bor mii midi di gom Tap̱a mo, a’di jin ta wosh pem mo, a’di jin ṯo’kki me’d pem gom mo ma mee mo, dhali ŋwal me’d pem mmo/asa as mo,

² a’di jin ta wosh pem dhali acur pem mo, dhali acur pem jin ṯenu gwo mo dhali aman’cuḵ aha/ mo, dhala goŋgorom pem mo dhali a’di jin bu’thka/ mo jin hurga/ jwa mo, a’di jin ’dap̱ki’da ris ’kwani e bwaŋ’kwariny piti mo.

³ Ayy Tap̱a, ki wathiny’cesh jana sa/ imina bwa o /e ki a’di mo, walla ya/ gi wathiny’cesh jana imina /e kulum gwo ibwa gom a’di mo?

⁴ Wathiny’cesh wana e ka wulp̱e/ mo, ateem piti wana e ka ḵashira la jin peki’d mo.

⁵ Goŋi momis pini is ka ’cesh mo, ayy Tap̱a, dhali p̱u’du/ ka ’cesh mo. Tayi wosha turga/ is ki me’d mo ki uni mini iiya ku’d mo.

⁶ Biliṯi/ uni mmoshwayi mo mmomiiya war mo dhali c̱eker uni bwa mo. Dhali peper ka risa thop̱am pini bwa mo dhali miiya ’bala’c ’bala’c dhan mo yin mo.

⁷ Hethi me’d pini ’peni mo jin ḵa’dama/ ḵa’dam mo, ’cwami aha/ mo dhali ’cuḵi aha/ mo ’pena ris yi’de/ mo, dhali ’peni me’d gi ’kwani gi bampan tiya mo,

⁸ uni kun tana ’twa/ buni aṯor ka ṯor mmo/o gwo mo, dhali uni gun tana me’da bim poros buni abim poros jin ta thus ki thus mo.

⁹ Aha/ mina yuḵ gway jin ta gway this gom /e mo, ayy Arumgimis, ap̱owa dheŋdhenye/ jin ’kon ma shu/i ’kume’d mo aha/ mina p̱i a’di gom /e mo,

¹⁰ a’di jin c̱iki mo jin p̱inu mii e ki imaliḵ mo, a’di jin ’cwamki c̱iŋkinam pini ka Dawuu’d mo.

¹¹ ’Cwami aha/ ’peni gandal gi ’kwani kun ta maṯṯ ki maṯṯ mo dhali ’cuḵi aha/ mo ’peni me’d gi ’kwani kun ta ’kwani gi bampan tiya mo, uni kun tana ’twa/ buni aṯor ka ṯor mmo/o gwo mo, dhali uni gun tana me’da bim poros buni abim poros jin ta thus ki thus mo.

¹² Dhalki iya/m bam e dhuru’c buni mo wana e ki cwalman kun dhethadhe’th mo, walla i’bwa/m bam mmowa e ka ḵa’dum gu’b mo kun jep̱kunu mo mmonyaŋ gu’b ma maliḵ mo.

¹³ Dhalki themes bam ’tu’du/ ki piny piny mo mmo’tu’da risa lakaŋ gu’b kun dhuna am to mo. Dhalki ḵa’bal bam dhodhon ka alip̱ mo dhali ka alaap̱i ’kume’d mo e buntom bam mo.

¹⁴ Dhalki bip̱ bam ’tu’d mo ki ushan mo, jin mina is ’koki ’kosh uni ka nyor gom ’ba’th mo walla ta a/ulul is mmodho’th ushan mo. Dhalku/ ki mii dhal ko jin gwonu ki ko ma c̱is bway mo mmodi e bway tur bam mo.

¹⁵ ’Kwani kun biṯa mo jin ’boru mii wakana p̱o/ mo tani uni i’bora bwa mo. ’Kwani kun tan ga Arumgimis jin ta Tap̱a mo tani uni i’bora bwa mo.