Luk'a 1 - Udi

Girke T'eofileynak' śamesun

¹ Hörmətlü T'eofil, gelet'ine beş arane baki əşurxoxun śamsuna çalışake.

² T'e belxun həysət'inəl śirik' Mǔq Xavara içoğoy piin ak'i şot'o q'ulluğbit'oğon me əşurxo yax exlət'p'i k'inək'

³ zuval t'e belxun bitova yönbəri fikir tadi mot'oğo vaynak' belxun ošel śamsuna lazımez avabaki.

⁴ Metər ki, hun vi zombakit'oğoy düz baksuna tam věbakan.

K'unuk'bal İoani nanaxun baksuna saturběš avabakest'un

⁵ İudeyin padçağ İrodi vədinest'a Avia dəst'inəxun bakala Zəkəriyə s'iyen sa běyinše buy, iz çuuxal Aaroni nəsiləxuney, şot'ay s'i Elizabet'ey.

⁶ Şorox p'ǒğə̌l Buxačuğoy piyes düzgün amdarxoney, Buxačuğon laxi buyruğxo q'a q'aydoğo bitova əyitsuz bex p'ap'est'unbsay.

⁷ Ama Elizabet' ərəmik' baksuna görə içoğoy əyel tene buy. Şot'oğoy p'rannayal yəş geleney.

⁸ Sa ği Zəkəriyən iz dəst'in navadast'a Buxačuğoy běš běyinšluği q'ulluğane taşt'ay.

⁹ Xrama baśi şaat' adeğala buxur bok'osbsunal me dönüş içune koft'ey (běyinšxoy ədəten mot'aynak' çöpt'un bost'ay). Zəkəriyə xramane baśi,

¹⁰ amdarxon isə me vədine xrame məəlne çurpi afırıt'unney.

¹¹ Me vədə q'urban eçala gane yön tərəf Zəkəriyəynak' Buxačuğoy sa angele ak'eśi.

¹² Zəkəriyən şot'o ak'i q'ı̌nebi, içu aç̌esebi.

¹³ Angelen isə şot'o pine: «Ma q'ǐba, Zəkəriyə! Buxačuğon vi afırına inebaki. Vi çuux Elizabet'en vaynak' sa ğar eçale. Hunal iz s'iya İoan laxa.

¹⁴ Şot'in vaynak' mǔqluğ eçale, vi ük' mǔqluğen buy bakale. Amdarxoy geloval şot'ay dünyəne eysuna görə mǔq bakale,

¹⁵ şot'aynak' ki, şo Q'ončuğoy piyes kala ak'eğale. Şot'in sal sa vədə nə fi, nəəl q'erəz finağoybala ǔğǔnxo tene ǔğə̌l, hələ nanay tapane amaq'un Ǐvel Urufen buy bakale.

¹⁶ Şot'in israilluğoy gelet'u Q'ončuğoç, içoğoy Buxačuğoç qaydale.

¹⁷ Şo xavareçal İlyay urufen q'a zoren Q'ončuğoy běš tağale, bavoğo içoğoy əyloğoç, tərst'oğo düzgün yaq'aç yönbi, azuk'a Şot'ay eyseynak' həzirbale.

¹⁸ Zəkəriyən angela pine: «P'oy zu mot'oğoy bex p'ap'suna hetərez avabakon? Axıri zuval gele q'ojazu, bez çuğoyal ene yəş c'ovakene».

¹⁹ Angelen şot'o coğabe tadi: «Zu Buxačuğoy běš çurk'ala Gavriilzu, me mǔq xavaral va upseynak'ez yaq'abake.

²⁰ Həysə isə, hun bezi pit'oğo nu věbaksuna görə, me əyitmux bex p'ap'ala ğinal śirik' əyitp'es ten bakal, lal bakalnu».

²¹ Qavuna çurpi amdarxon isə Zəkəriyəy yaq'at'un běğsay, şot'ay xramaxun het'u görə metər c'əyi c'eysuna tet'un q'amişaksay.

²² Şo xramaxun c'ere, ama amdarxoxun əyitp'es tene baki. Amdarxonal q'amişt'unbaki ki, şot'o xrama hik'ənesa ak'eśene. Şot'in amdarxoxun kiin-biine əyitey, şot'aynak' ki, laley.

²³ Zəkəriyəy q'ulluği vaxt' çark'at'an şo iz k'oyane qaybaki.

²⁴ Samal oşa isə iz çuux Elizabet' əyeləne mandi, qo xaşal iz k'oyaxun tene c'eri.

²⁵ Şot'in nexey: «Mot'o zaynak' Q'ončuğone bi. Şot'in za eyex badi amdarxoy arane ç̌omə̌yin manst'axun çark'esedi».

İsus Xrist'osi nanaxun baksuna saturběš avabakest'un

²⁶ Elizabet' ǔq xaşin bǐhi bakat'an Buxačuğon angel Gavriila Galileyina bakala Nazaret' şəhəre,

²⁷ iz s'i Mariya bakala ərgən sa xuyəri t'ǒğǒle yaq'abi. Me xuyər Davidi nəsiləxun bakala İosif s'iyen sa amdaraxun nišanluney.

²⁸ Angelen şot'ay t'ǒğǒl hari pine: «Xeyirq'an baki, ay Buxačuğoy piyes şaat' ak'eğalo! Q'ončux vaxune».

²⁹ Mariya me əyitmoğon çəşt'irişebi, me əyitmoğoy k'ə upsuni baradane fikirbsa burqi.

³⁰ Angelen isə şot'o pine: «Ma q'ı̌ba, Mariya, şot'aynak' ki, hun Buxačuğoy piyes şaat'en ak'eśe.

³¹ Hun bǐhi baki sa ğar eçalnu. Şot'ay s'iya İsus laxalnu.

³² Şo kala Amdar bakale, Ala Arśit'ay Ğar k'aleğale. Q'ončux Buxačuğon Şot'o İz bava Davidi taxt'a tadale.

³³ Şo İak'ovi nəsili loxol həmişəluğ padçağ bakale. İz padçağluğiyal axır tene bakal».

³⁴ Mariyan angela pine: «Mo hetəre bakes bakon? Axıri zu hələ işq'ara tezu».

³⁵ Angelen coğab tadi şot'o pine: «Ǐvel Uruf vi loxol śiğale, Ala Arśit'ay kala zoren vi loxol xoji sakale. Kot'aynak'al vaxun bakala Əyel Buxačuğoy Ğar k'aleğale, Şo ı̌vel bakale.

³⁶ Běğa, vi q'oom Elizabet'al iz yəşlu vədine ğar əyeləne mande. Şot'o ərəmik't'un nexey, ama şo ene ǔqxaşin bǐhine.

³⁷ Şot'aynak' ki, Buxačuğoynak' mümkün nu bakala şey tene bu».

³⁸ T'e vədə Mariyan pine: «Zu Q'ončuğoy nökərzu, barta za vi pi k'inək'q'an baki». Angelenal şot'o barti taneśi.

Mariyay q'a Elizabet'i suna aksun

³⁹ T'e vədə Mariya hayzeri kap İudeyani burux ganxo bakala sa şəhərene yaq'a baft'i.

⁴⁰ Şo Zəkəriyəy k'oyane hari. Baśi Elizabet'a «Xeyirq'an baki!» pine.

⁴¹ Elizabet'en Mariyay əyitə ibakat'an, içust'a bakala körpə mǔq baki galepi. Elizabet'al Ǐvel Urufen buybaki

⁴² alloy səsen harayepi: «Hun çupuğoy boş xeyir-bərəkət haq'iyonu, vast'a bakala əyelal xeyir-bərəkət haq'iyone.

⁴³ Mo hetəre bakes bakon? Bez Q'ončuğoy Nana bez t'ǒğǒle hare!

⁴⁴ Běğa, vi əyitə ibakat'an zast'a bakala əyelal mǔqluğaxun galepi.

⁴⁵ Q'ončuğon içu pi əyitmoğoy bex p'ap'suna věbakala çuux he bəxt'əvərə!»

Mariyay alxışbala mə̌ğ

⁴⁶ Mariyan isə pine:

⁴⁷ «Bez ük'en Q'ončuğoy s'iyane alabsa, Bez elmuxal za Çark'est'ala Buxačuğo görə mǔqebaksa,

⁴⁸ Şot'aynak' ki, Şot'in İzi me gorox k'ulane ak'i. İsəəl bütüm nəsilxon za bəxt'əvər hesabbale,

⁴⁹ Şot'aynak' ki, Bitova Başarbalen zaynak' kala sa əşe biq'i, Şot'ay s'i ǐvele!

⁵⁰ Şot'ay yaq'en tağalt'oğoynak'al İz ük' bok'osbsun nəsiləxun-nəsiləne c'ovakon.

⁵¹ Şot'in İz zorba kiin gele kala əşurxone biq'i, İçoğo ala efalt'oğo oq'ane saki.

⁵² Kalaluğbalxo taxt'axune śivk'i, Goroxt'oğo isə alanebi.

⁵³ Busat'oğo neymət'xon boşevk'i, Varlut'oğo isə kul ams'ine yaq'abadi.

^54-55 Q'ončuğon Avrahama q'a şot'ay nəsilə Həmişə İz ük' bok'osbsuna ak'est'i, Beş bavoğoyal tadi əyitə eyex badi İz nökər İsraila köməyebi».

⁵⁶ Mariya Elizabet'i t'ǒğǒl xib xaşa ı̌ša mandit'uxun oşa iz k'oyane qaybaki.

K'unuk'bal İoani nanaxun baksun

⁵⁷ Elizabet'i vaxt' hari p'anep'i, şot'in sa ğare eçeri.

⁵⁸ Şot'ay q'oom-q'onşiğon Q'ončuğoy şot'aynak' me kala ük' bok'osbsuna ak'i, içuxun sagala mǔqt'un baksay.

⁵⁹ Muğumci ğine körpə sünnətbsat'un hari. Şot'ay s'iya iz bava k'inək' Zəkəriyət'un laxsun çuresay.

⁶⁰ Əylin nanan isə pine: «Təə, kot'ay s'i İoan bakale».

⁶¹ Şot'o pit'un: «Axıri vi q'oomxoy arane metər s'i bakala sa amdar tene bu».

⁶² T'e vədə kiin-biin q'andrişi əylin bavaxunt'un şot'in iz ğare s'iya k'ə laxsun çuresuna xavar haq'i.

⁶³ Zəkəriyənəl sa daxt'ak'i k'ot'or çureśi iz loxol śamepi: «Kot'ay s'i İoane».

⁶⁴ Hat'e saad şot'ay muz qayeśi, şot'inal Buxačuğo alxışbsane burqi.

⁶⁵ T'iya bakala q'onşiğo isə kala qǐyene haq'i, me baki əşurxoy barada exlət'xoval İudeyani bito burux ganxo yəymişebaki.

⁶⁶ İbakalt'oğonal "axıri me əyel kala baki şu bakala?" pi fikirət'un taysay. Şot'aynak' ki, Q'ončuğoy kul şot'ay loxoley.

Zəkəriyəy xavareçalluğbsun

⁶⁷ Əylin bava Zəkəriyəy loxol Ǐvel Urufe śiri, şot'inal metəre xavareçalluğbi:

⁶⁸ «Alxışq'an baki İsraili Buxačux Q'ončuğo! Şot'aynak' ki, İz azuk'a eyex badi şot'o çark'esedi,

⁶⁹ Şot'in İz nökər Davidi nəsiləxun Yaynak' zorba Çark'est'ale p'ap'esp'i.

⁷⁰ Gele vaxt' mot'oxun běš İz ı̌vel xavareçalxoxun avabakest'i k'inək'

⁷¹ Beş düşmənxoy q'a yax aksun nu çureğalt'oy kiyexune çark'est'i.

⁷² Hametər beş bavoğo ük' bok'osp'suna ak'est'i İz ı̌vel irəzuluğane eyex badi.

⁷³ Hetəre beş bava Avrahama elasp'i əyit tadey ki,

^74-75 Yan beş düşmənxoy kiyexun çark'eśi Beş yəşəyinşi axıral śirik' hik'k'alaxun q'ǐbinut' Q'ončuğoy běš ı̌velluğen q'a düzgünluğen yəşəyinşi Şot'o q'ulluğbes bakalyan.

⁷⁶ Hun isə, ay bez bala, Ala Arśit'in yaq'abi xavareçal k'aleğalnu, Şot'aynak' ki, Q'ončuğoy běš tağalnu, Şot'ay yaq'a həzirbalnu,

⁷⁷ Şot'ay azuk'a içoğoy günaxxo bağışlayinşaksunen Çark'esuni barada avabakest'alnu.

⁷⁸ Axıri beş Buxačux ük' bok'osp'ale, Şot'ay me ük' bok'osp'sunen Alloyaxun yaynak' t'etər sa Běğ c'eğale ki,

⁷⁹ Bisuni xojina saal bayinq'luğa arśalt'oğoy ç̌oyel işiğ sakane, Beş turmoğo şip'luği yaq'a yönbane».

⁸⁰ Körpəl kalabaksunen iz uruf zorbane baksay. Şo israilluğoy běš c'eğala ğinal śirik' çölöne manst'ay.