Ǐvel mə̌ğurxo 8 - Udi

8-ci Ǐvel mə̌ğ

Mə̌ğk'alxoy dəst'in kalat'aynak'. Git't'iten mə̌ğěğala Davidi Ǐvel mə̌ğ.

¹ Ay Həmişə Bakalo, ay beşi Q'ončux! Vi kala s'i dirist' oç̌ali ç̌oyel t'ap'esa! Vaynak' k'aleğala tərifi səs göynule c'eysa,

² Lap körpə əyloğo q'a döş ukala əyloğoval əyitp'esenst'a! Vi düşmənxoynak', Vi əleyinə c'eri vaynak' yaği bakalt'oğoynak' sa q'alan baki! Şoroxal hari t'e q'alina laft'i əfçit'unbaki!

³ Vi yaratmişi me göyə q'a Vi kiin laxi me xaşa q'a muč'uliğo běğat'an,

⁴ Fikirezbsa ki, amdar hik'k'ale! Ama Hun p'urumal şot'o eyexun ten c'evksa! İnsan şuva ki? Ama Hun p'urumal şot'ay fikirən zap'e!

⁵ Şot'o yaratmişat'an saycə göynul bakala angelxoxunen oq'a biq'i, Şot'o taxt'an arśevk'i, kalaluğa iz kiyelen tadi.

⁶ Şot'o Vi yaratmişit'oğoy loxol kalon laxi, Şot'ay kiin oq'ane bito:

⁷ Eğelxo, keçiyox, öküzxo, Lap ə̌qnə heyvanxoval.

⁸ Göynul purk'ala q'uşurxo q'a dənizə bakala çəliyoxal, Xene oq'a bakala k'ə bunesa bito.

⁹ Ay Həmişə Bakalo, ay beşi Q'ončux! Vi kala s'i dirist' oç̌ali ç̌oyel t'ap'esa!