Ǐvel mə̌ğurxo 4 - Udi

4-ci Ǐvel mə̌ğ

Mə̌ğk'alxoy dəst'in kalat'aynak'. Simlə ət't'əcxon farpi mə̌ğěğala Davidi Ǐvel mə̌ğ.

¹ Ay bezi taxsırsuz baksuna ç̌oyel c'evk'es bakala Buxačux, Va k'alk'at'an za ibaka! Hun bez t'ar ğine za p'ap'alonu, Za gorox eki, bez afırına ibaka!

² Ay insanxo, bəse ene bezi s'iya batevk'iyo, Bəse efi ams'i şeymoğo bul k'os'bi əfçin qoşt'an taśiyo!

³ Axıri düzgünt'u Q'ončuğon İçeynak' c'ək'p'ene, Zu Q'ončuğo k'alk'at'an, Şot'in za inebaksa.

⁴ Q'ı̌banan, günax ma banan, Ef bula bernu laxat'an şip' baki saal ef ük'e bakalt'u yoxlayinşanan.

⁵ Q'urbanxo Q'ončuğon pi k'inək' eçanan, Hər şeya Şot'in yönə badale.

⁶ Gelet'ine "şuva yax t'e şaat'luğ tadalo" nex, Ay Q'ončux, barta yan Vi ük'e bask'en!

⁷ Bol arum q'a fi bakalt'oğoy mǔqluğ Vi za tadala mǔqluği t'ǒğǒl hik'k'ale!

⁸ Bezi bula bernu laxi bask'at'anal hik'k'alaxun tez q'ı̌bal, ay Q'ončux, Şot'aynak' ki, Hunen za Vi q'ənədi oq'a ext'i!