Ǐvel mə̌ğurxo 3 - Udi

3-ci Ǐvel mə̌ğ

Davidi iz ğar Avşalomi kiyexun t'it'at'an śampi Ǐvel mə̌ğ.

¹ Ay Q'ončux, heq'ədər gele düşmənzax bu! Bez əleyinə gele amdare ěqeśe!

² Bez barada gelet'ine nex: «Buxačuğon kot'o tene çark'est'al».

³ Ama Hun, ay Q'ončux, za q'orişalonu, Zaynak' hörmət eçalonu, Bez bula ala efalo Hunnu!

⁴ Zu Q'ončuğo ost'aar k'alezney, Şot'inal İz ı̌vel buruğoxun za coğabe tast'ay.

⁵ Zu basezksay, nep'axezsay, P'urum muğurezbaksay, şot'aynak' ki, Q'ončuğon za köməyebsay.

⁶ Bez hərrəminə biq'est'i amdarxoy Geleluğaxun tez q'ı̌bsa.

⁷ Hetər ki Hun bez düşmənxoy çəninəxun dunğsay, Pist'oğoy uluxxo śinney, Həysəəl bez bač'ane çurpa, ay Q'ončux Çark'est'a za, bez Buxačux!

⁸ Çark'esun Q'ončuğoxune. Barta Vi xeyir-bərəkət Vi azuk'i loxolq'an baki!