Ǐvel mə̌ğurxo 141 - Udi

141-ci Ǐvel mə̌ğ

Davidi Ǐvel mə̌ğ.

¹ Ay Q'ončux, Vaz k'ale zu, eki p'ap'a! Bezi xoyinša ibaka!

² Barta bezi afırı hari Va p'ap'eq'an, Şaat' adeğala oyurxoy bok'uni k'üün hari Va p'ap'ala k'inək'. Bezi Vaç alabi kulmoğo nu aksuna ma laxa, Biyəsin šameğala q'urban k'inək' q'abulba şot'oğo.

³ Ay Q'ončux, bez ǰomoy q'aroola zapa, Bez muza girba.

⁴ Za pis yaq'en taysa ma barta, Pist'oğo gərbaki şər əşur biq'sa, Şot'oğoy ukalt'oğo şərik baksa ma barta za.

⁵ Barta düzgünt'ay kiyel t'ap'eğaz - avabakoz ki, mot'o za çuresaxune bsa, Barta bez taxsıra za ak'est'eq'an - mot'o mǔqluğenez q'abulbon! Mot'oğoy saycət'in bez pula hateneq'sa. Ama pist'oğoy axır eyseynak'ez afırıne zu:

⁶ Barta şot'oğoy kalat'oğo q'ayanaxun oq'aq'at'un boseri, T'e vədə avabakalt'un şot'oğon bezi pit'oğoy bito seri baksuna.

⁷ T'e vədə ak'alt'un içoğoy ǔq'enxo oç̌alen sa xuribaki barst'una, Hetər ki, kötəni ǰomo tağala oç̌al xuribaki barala k'inək'.

⁸ Vi kiyelez běğsa, ay bitot'uxun üst'ün bakala Q'ončux Buxačux, Vaz umud zu, za bisa ma barta.

⁹ Pist'oğon zaynak' laxi təloğoxun, Şot'oğon zaynak' kašp'i kururxoxun ə̌xilba za.

¹⁰ Barta zaynak' laxi tora içanq'at'un baft'i, Zu isə xata-bələsuz c'ovaki tağaz.