Zekaraya 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iveve Kpahe Jerusalẹm re che Vwo Rhivwi Rhe

¹ Ota Ọrovwohwo rẹ otuofovwi na de bru uvwe rhe, ta nẹ,

² E nẹ Ọrovwohwo rẹ otuofovwi tare: Me reoma rode na kpahe Zayọn, ivuemiovwo rode na Me vwọ reoma kpahọ

³ E nẹ Ọrovwohwo tare: Mi che rhivwi kpo Zayọn, ke Me dia uherevie ri Jerusalẹm, ke se Jerusalẹm orho rẹ uyota, ugbenu rẹ Ọrovwohwo rẹ otuofovwi na, ugbenu ọfuanfọn.

⁴ E nẹ Ọrovwohwo rẹ otuofovwi tare: Ekpako rẹ eshare vẹ ekpako re eya cha rhoma tidia irhuvwu ri Jerusalẹm, dohwo dọkpọ vwẹ obọ fiki rẹ ọghwo.

⁵ Irhuvwu rẹ orho na cha vọn vẹ emeshare kugbe emetẹ re heha vwẹ irhuvwu rọye.

⁶ E nẹ Ọrovwohwo rẹ otuofovwi tare. O da dianẹ ọ dia emuigbunu vwẹ aro rẹ imihwo ri chekọ vwẹ edẹ nana, ọ jẹ dia emuigbunu vwẹ aro Mẹ, Ọrovwohwo rẹ otuofovwi tarọ?

⁷ E nẹ Ọrovwohwo rẹ otuofovwi tare: Nighere, mi che sivwi ihwo Mẹ nẹ orho rẹ obaro ọnre vwo nẹ orho rẹ obuko ọnre rhe,

⁸ ke Me reyọ ayen rhe vwọ dia uherevie ri Jerusalẹm ayen ke dia ihwo Mẹ ke Me je dia Ọghẹnẹ rayen, vwẹ uyota vẹ ọsoso.

⁹ E nẹ Ọrovwohwo rẹ otuofovwi tare: We jẹn abọ rẹ ovwan gan, ovwan ri nyo eta nana ri nẹ unu rẹ emraro rhe na, rhanwe ẹdẹ ra vwọ tọn uchivwo rẹ uwevwi rẹ Ọrovwohwo rẹ otuofovwi phihọ nu na, rere a vwọ bọn uwevwi rẹ Ọghẹnẹ na.

¹⁰ Kidie rẹ ẹdẹ yena ki rhi te ohwo eyẹ eranvwe ro vwo osa herọ-ọ, ọfuvwegbe nẹ abọ rẹ ọvweghrẹ herọ kẹ ohwo rọ yan ruọ yan no-o, kidie Me vwẹ ohwohwo vwọ so ohwo.

¹¹ Ẹkẹvuọvo Asakiephana mi rhe ru ihwo ri chekọ kirobo mi ru ihwo rẹsosuọ na-a, Ọrovwohwo rẹ otuofovwi tarọ.

¹² Kidie ekọn rẹ ufuoma cha dia, vain cha mọ emamọ rọye, otọ na cha ghwẹ ebuo rọye rhe, idjuvwu che rho irho ki mi che ru imihwo ri chekọ vwọ reuku rẹ emu nana ejobi

¹³ Kirobo wọ vwọ dia ehwẹjẹ vwe ohri rẹ ẹgborho na, E uwevwi ri Juda vẹ uwevwi rẹ Izrẹl, eriyin mi che sivwi uwe ku wọ dia ebruba. Wọ djẹ oshọ-ọ, ẹkẹvuọvo jẹn abọ wẹn gan.

¹⁴ Kidie e nẹ Ọrovwohwo rẹ otuofovwi tare: Ọtiobo Me je iroro umwemwu kpahe owẹ, rẹ esẹ re ovwan vwo kpare ovwẹ ophu, mi ku iroro rhẹriẹ-ẹ. Ọrovwohwo re otuofovwi tare,

¹⁵ ọtiọye rhe Me jẹ iroro vwẹ ẹdẹ nana mi vwo ru Jerusalẹm vẹ uwevwi ri Juda yoyovwi; wọ djẹ oshọ-ọ.

¹⁶ Enana he emu wo che ru, Wa ta uyota kẹ ohwohwo, wo bru orhiẹn rẹ uyota vẹ ọ rẹ ufuoma vwẹ inurhorọ rẹ ovwan,

¹⁷ we roro iroro umwemwu vwẹ udu rẹ ovwan vwọ kpahe Ọrovwohwo-o, wo duvwu iyori rẹ efia-an, kidie emu nana ejobi tu vwe oma, Ọrovwohwo tarọ.

¹⁸ Ota Ọrovwohwo rẹ otuofovwi de bru uvwe rhe, ta nẹ

¹⁹ E nẹ Ọrovwohwo rẹ otuofovwi tare Owenẹ owẹvwe rẹ echiro rẹ emeranvwe rẹne, re fi ọriyori, vẹ ọrighwrẹ, re te ọrihwe, cha dia vwẹ uwevwi ri Juda ọke rẹ oghọghọ vẹ omavwerhe kugbe orẹ rẹ omavwerhe, ọtiọye na gba guọnọ uyota vẹ ufuoma.

²⁰ E nẹ Ọrovwohwo rẹ otuofovwi tare. Ihwo je cha rhe, ekpuyovwi rẹ ihwo rẹ irere buebu,

²¹ Ihwo rẹ orere ọvo che bru ọrivẹ ra, ta nẹ, Jẹn a yanran ẹsiẹvo ra yare ẹroesiri mie Ọrovwohwo, re a je guọnọ Ọrovwohwo rẹ otuofovwi na; Me yanran.

²² Ihwo buebu vẹ ẹgborho gangan cha rhe rhe guọnọ Ọrovwohwo rẹ otuofovwi na vwi Jerusalẹm, cha yare ẹroesiri mie Ọrovwohwo.

²³ E nẹ Ọrovwohwo rẹ otuofovwi tare: Vwẹ ẹdẹ yena eshare ihwe che nẹ ẹgborho rẹ ephẹrẹ Kephere rhe cha yọnre ewun rẹ ohwo ri Ju, ta ne, Jẹn avwanre nene uwe, kidie Me nyori nẹ Ọghẹnẹ vẹ ovwan herọ.