Zekaraya 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ekpẹrẹ Ẹne na

¹ Me da rhoma kpare opharo Me da mrẹ, nighe ekpẹrẹ ẹne de ne uvwre rẹ igbenu ive na rhe, igbenu na kẹ igbenu rẹ ẹrovwo.

² akpẹrẹ rẹsosuọ vwọ iyesi evwavware, ọrivẹ vwọ iyesi ibiebi.

³ Ọ rerha vwo iyesi efuanfon, akpẹrẹ rẹne de vwo iyesi re fuan bule bule.

⁴ Etiyin Me da ta kẹ amakashe ro nene uvwe ta ota na, Enana kidie vwo, ọrovwovwe?

⁵ Amakashe na da kpahe kẹ vwẹ, Enana yanran kpo igogo ẹne rẹ akpọ na, siẹrẹ ayen da vwẹ oma rayen nẹ vwẹ obaro rẹ Ọrovwohwo rẹ akpọ na ejobi nu.

⁶ Akpẹrẹ ro vwo iyesi ibebi na da yan hirhe aro ku orho rọ hẹ obọhwere ọnre, e re efuanfon na da yan hirhe aro ku orho rọ hẹ obuko ọnre, e re pha gbrogbro na da yan hirhe aro ku orho rọ he obọhwẹre ọnre.

⁷ Ọke rẹ iyesi na vwọ yan rhe re, ayen ke pharhoma re ayen vwo ki akpọ na. Ọ da ta, yanran re ki akpọ na. Eriyin ayen de ki akpọ na.

⁸ Etiyin o de kperi se vwe, nighe, e re yan hirhe aro ku orho rẹ obọhwẹre ọnre na nẹrhẹ oma fu Erhi Mẹ vwẹ orho rọ hẹ obọhwẹre ọnre na.

Oka rẹ Erhu Evwotughe ri Joshua

⁹ Ota rẹ Ọrovwohwo de bru uvwe rhe.

¹⁰ Reyọ Hẹldai, Jobaja, vẹ Jedaya ri ne Babilọn rhe na nẹ usun re otu re he imu na; re we kpo uwevwi ri Josaya vwe ẹdẹ ọvo na, ọmọ rẹ Zẹfanaya.

¹¹ Wo mie ayen idọnọ ọfuanfọn vẹ oro, vwo ru erhu rẹ ovie ọvo, re wo vwo tughẹ uyovwi ri Joshua, ọmọ ri Jehozadak, orherẹn ro kpenu na,

¹² re wọ ta kẹ, E nẹ Ọrovwohwo rẹ otuofovwi na tare, nighe, ohwo rẹ odẹ rọye dia Oghọn na: kidie ọ cha rho vwẹ ẹdia rọye, ọ cha bọn uwevwi rẹ Ọrovwohwo na.

¹³ Ọye he ohwo ro cha bọn uwevwi rẹ ẹga rẹ Ọrovwohwo na, ke mu ọghọ rẹ ovie kẹ, ko che tidia de sun vwẹ ekete rọye Orherẹn kọ cha dia akakọ rẹ ekete rọye na, ẹruọ rẹ ufuoma kọ cha dia uvwre rẹ ayen ivẹ.

¹⁴ Erhu rẹ uvie na kọ cha dia evun rẹ uwevwi rẹ Ọrovwohwo na rọ dia ẹkarohọ kẹ Hẹldai, Jobaja, Jedaya, kugbe Josaya ọmọ rẹ Zefanaya.

¹⁵ Otu re he ogboko jovwo na ke cha rhe rhi nene ayen bọn uwevwi rẹ Ọrovwohwo na; ku wọ cha riẹn nẹ Ọrovwohwo rẹ otuofovwi na ri ji vwe bru we rhe. Ọnana che ru, o da dianẹ wọ vwẹ oma kpotọ nyo urhuru rẹ Ọrovwohwo Ọghẹnẹ wẹn na .