Zekaraya 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ekpirhi rẹ Ọbe rọ Rhan

¹ Me da rhoma kpare opharo mẹ, me da mrẹ, gbe nighe, ọbe re kpirhiri rọ rhan!

² Ọ da ta kẹ vwẹ Die wọ mrẹre? Me da kpahe, Me mrẹ ekpirhi rẹ ọbe rọ rhan; ugrogro rọye kubit uje, ohẹhẹre rọye kubit ihwe.

³ Etiyin ọ da ta kẹ vwẹ, Ọnana ekan ro mu nene otọ na ejobi rhe; kidie kohwo kohwo ro cho uji ke etinẹ, yanran ke sio nẹ otu kerẹ obo rọ epha, kohwo kohwo ro ji duvwu iyori re efian ke ji sio nẹ otu kirobo rọ epha.

⁴ Mi che jo rhe, Ọrovwohwo rẹ otuofovwi na tare, kọ cha ro uwevwi rẹ oji, vẹ uwevwi rẹ ohwo rọ vwẹ odẹ Mẹ duvwa iyori rẹ efian; ọ cha dia uwevwi rọye ọ mẹ ghwọrọ, te ephapha vẹ eragha ejobi.

Aye rọ Hẹ evun rẹ Efah

⁵ Etiyin amakashe ro nene uvwe ta ota na da yanrhe obaro ọ da ta kẹ vwẹ, kpare opharo wẹn, rere wọ mrẹ Ọnana rọ yan phia na.

⁶ Me da ta, Didi emu ọ iputusẹ? Ọ da ta, Ọnana ovwanvwọn rọ yan phia na. O da rha ta, Ọnana orukuruku vwẹ otọ na ejobi

⁷ Gbe nighe, a kpare urhurho rẹ isiruka na no, aye ọvo tidia evun rẹ iputusẹ na!

⁸ Ọ da rha ta, Ọnana Umwemwu O de gere teyọ evun re iputusẹ na, ọ da reyọ isinika ọhọhọ na rhurhu unu rọye.

⁹ Etiyin Me da kpare opharo Me da mrẹ, gbe nighere, eya ivẹ herọ yan cha vwẹ obaro! Odju he ibekpe rayen; ayen vwẹ ibekpe họhọ ibekpe rẹ ogomugoro, ayen kpare iputusẹ na kpenu rọ hẹ uvwre rẹ akpọ vẹ odjuvwu.

¹⁰ Etiyin Me da ta kẹ amakashe ro nene uvwe ta ota na, Bovọ ayen reyọ iputusẹ na ra vwo?

¹¹ Ọ da ta kẹ vwẹ, Vwo kpo otọ ri Shina, rere a bọn uwevwi kẹ; ọke ra da rhuẹrẹ ọnana nu, ayen ki mu ovwanvwọn na kpahe otọ vwẹ asan rọyen.