Zekaraya 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ogburhukpẹ na Kugbe Urhe rẹ Oliv

¹ Amakashe ro nene uvwe ta ota na da rhoma rhe, ọ da rhọvwọ ovwẹ kerẹ ohwo ra rhọvwọ nẹ ovwerhe rọye rhe.

² O da ta kẹ vwẹ, Die wọ mrẹre? Me da ta, nighere, Me mrẹ ogburhukpẹ ọvo vẹ udjokpo vwẹ enu rọye, kugbe irhukpẹ ighwrẹ re he enu rọye, irhukpẹ ighwrẹ re hẹ enu rọye na ọvuọvo vwo inu ighwrẹ.

³ Irhe rẹ oliv ivẹ dia kẹrẹ, ọvo hẹ obọrhe rẹ udjokpo na ọrivẹ hẹ obọhwẹre rọye.

⁴ Me da ta kẹ amakashe ro nene uvwe ta ota na, Enana kidie vwo, ọrovwovwe?

⁵ Etiyin amakashe ro nene uvwe ta ota na da kpahe kẹ vwẹ, Wọ riẹn obo re enana epha-a? Me da ta, Ẹjo, ọrovwovwe.

⁶ Etiyin ọ da ta kẹ vwẹ, Ọnana ota rẹ Ọrovwohwo ta kẹ Zerubabẹl: Ọdia ẹgba-a, yẹrẹ oganga-an, ẹkẹvuọvo Erhi Mẹ, Ọrovwohwo rẹ otuofovwi tarọ.

⁷ Die wọ epha, E ugbenu rode na? Wo che hirhe phihọ asan ro she-aton vwẹ obaro rẹ Zerubabẹl, kọ cha vwẹ oragha rọ hẹ obenu na vwẹ ohri rẹ edo nẹ Ẹserọphẹ; ẹserọphẹ kẹ.

⁸ Ota rẹ Ọrovwohwo da rhoma bru uvwe rhe, ta nẹ,

⁹ Abọ rẹ Zẹrubabẹl ri mu uchivwo rẹ uwevwi nana vi; abọ rọye ji che ruo gba. Etiyin ku wọ cha riẹn nẹ Ọrovwohwo rẹ otuofovwi ri ji uvwe bru we rhe.

¹⁰ Kidie ohwo rọ jẹ ẹdẹ re emu itete Mẹ fia cha ghọghọ, ọ cha mrẹ ovwanvwọn rẹ okokodo vwẹ obọ ri Zerubabẹl. Enana ighwrẹ na he ibiẹro rẹ Ọrovwohwo, ro vwo nẹ akpọ na ejobi duvwẹ.

¹¹ Etiyin Me da ta kẹ, Irhe rẹ oliv ivẹ nana re hẹ obọrhe vẹ obọhwẹre rẹ ogburhukpẹ na ke rha vwi die vwọ?

¹² Obọ rivẹ Me da ta kẹ, Eghọn rẹ oliv ivẹ nana die vwo? re kẹre iphrophro rẹ oro ivẹ na rẹ evwri na de suẹ cha na?

¹³ Ọ da ta kẹ vwẹ, Wọ riẹn obo rẹ enana rayen epha-a? Me da ta, Ẹjo, ọrovwovwe.

¹⁴ Etiyin ọ da ta, Enana ivẹ na ra vwẹ ori ghworo ri mudia kẹre Ọrovwohwo rẹ akpọ soso na.