Zekaraya 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọmraro na Mrẹ Emramrẹ rẹ Ohwo Kugbe Ubiurhe rẹ Ovwavwon

¹ Me da kparo me da mrẹ, gbe nighe, ọshare ọvo yọnrọn ufi rẹ ovwanvwọn vwẹ obọ rọye!

² Ọye Me da ta, Bovọ wọ ra vwo? Ọ da ta kẹ vwẹ, Me ra vwanvwe Jerusalẹm, ra vwo mrẹ ohẹhẹre rọye vẹ ugrogro rọye.

³ Gbe nighe, amakashe ro nene uvwe ta ota na da yanrhe obaro, amakashe ọfa da yanrhe rhe vwa,

⁴ ọ da ta kẹ, Djẹ, ra vuẹ emeghene yena, A cha dia Jerusalẹm kerẹ ẹko ri jẹ igbẹhẹ evwo, fiki rẹ otu rẹ ihwo vẹ uchuru re herọ.

⁵ Kidie Me cha dia igbẹhẹ rẹ erhanre riariẹ phihọ, Ọrovwohwo tarọ, me cha dia urinrin vwẹ evun rọye.

E Se Otu rẹ Ighuvwu

⁶ E! E! Djẹ nẹ otọ rẹ obọrhe ọnre, Ọrovwohwo tare; kidie Me hra wẹ ro asan ejobi vwe igogo ẹne rẹ akpọ na, Ọrovwohwo na tare

⁷ E! Djẹ kpo Zayọn, ovwan re vẹ ọmọtẹ ri Babilọn gba dia na.

⁸ Kidie enẹ Ọrovwohwo rẹ otuofovwi na tare, rẹ urinrin rọye vwo ju vwe bru ẹgborho ri gborho ovwan, kidie ohwo rọ vwẹ obọ te ovwan, yẹ ọ vwẹ obọ te ọmẹro rọye:

⁹ Nighere, mi che kpogho obọ Mẹ phihọ ayen, ihwo re ga ayen jovwo ke cha rhoma gborho ayen. Ko wọ cha riẹn nẹ Ọrovwohwo rẹ otuofovwi na ri ju uvwe.

¹⁰ So une wọ ghọghọ, E ọmọtẹ ri Zayọn; kidie gbe nighe, Me rhere Me rhe dia uherevie wẹn, Ọrovwohwo tare.

¹¹ Ẹgborho buebu che kuoma rayen gbe Ọrovwohwo vwẹ ẹdẹ yena, ke cha dia ihwo Mẹ; ke Me dia uherevie wẹn ko wọ riẹn nẹ Ọrovwohwo rẹ otuofovwi na re cha vwe ji uvwe bru uwe rhe.

¹² Ọrovwohwo na kọ vwẹ Juda reuku kerẹ ẹkẹn rọye vwẹ otọ ọfuanfon na, kọ rhoma jẹ Jerusalẹm reyọ.

¹³ Ihwo ejobi, fọ gbiẹi vwẹ obaro rẹ Ọrovwohwo; kidie ọ kpare oma rọye nẹ ẹdia ọfuanfọn rọye rhire.