Zẹfanaya 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Umwemwu ri Jerusalẹm Kugbe Ẹtanhirhe

¹ Ekan kẹ ọ ro muẹkpahe ihwo ro gbe ihwo kuẹ orere rẹ oshenyẹ na!

² Ọ kerhọn rẹ urhuru ọvuọvọ-o, ọ reyọ obo re dje kẹ-ẹ. Ọ vwẹ ẹro so Ọrovwohwo-o, o si kẹrẹ Ọghẹnẹ rọye-e.

³ Inotu rọye re dia evun rọye epha kerẹ ikpohrokpo re guan, iguẹdjọ rọyẹ epha kerẹ ikpohrokpo rẹ ovwọnvwọn ri jẹ emuọvo vwo hẹrhẹ irhiọke-e.

⁴ Emraro rọye ihwo ogbarogba, i vwo esegbuyota-a, irherẹn rọye gbe obo re fonro ẹgua, ayen zighẹ urhi na.

⁵ Ọrovwohwo rọ hẹ evun rọye na ọvwata o ruẹ, o ruẹ obo re chọrẹ-ẹ; kirhiọke kirhiọke o vwo dje ọsoso rọye phia, ọke rọ rhieri chọ obọ-ọ; ẹkẹvuọvo ohwo rọ dia ọsosọ-ọ riẹn omaẹvuọ-ọ.

⁶ Me nyavwe ẹgborho buebu kufia, ekuakua rẹ ofovwi rayen buebu ghwọrọ kufia; Me vwe irhuvwu rayen ejobi te otọ riae ọtiọye na ohwo ọvuọvo rha sa yan vwẹ aye-en, ẹgborho rayen ejobi rhi hirhe oma phihọ ọfefe, kaka ohwo, o vwo ohwo ọvuọvo rọ dia-a.

⁷ Me da ta, uyota kọ djẹ oshọ mẹ kọ cha reyọ obo re dje kẹ emu ejobi ri mi dje kẹ o gbi ni ayen kuerofia-a. Jẹ urhuru rẹ emu umwemwu rayen ji sie ayen phihọ ke rhoma miovwẹ phihọ.

⁸ Fiki rẹ ọtiọye na gba hẹrhẹ ovwẹ, eriyin Ọrovwohwo na tare, vwẹ ẹdẹ ri mi de che vrẹn rhe kerẹ oseri. Kidie orhiẹbro mẹ na mi se ẹgborho na koko, me me ghwẹ uvie na koko, ki mi che ku ivuemiovwo mẹ ku ayen, ọrhorho rẹ ophu mẹ na, kidie vwẹ evun rẹ erhanre rẹ omeriọ rẹ ophu mẹ na akpọ na ejobi kọ cha tọrhe re.

⁹ Uyota, vwẹ ọke yena ki mi che ku ephẹrẹ rẹ ihwo na rhẹriẹ vwo kpo omamọ rẹ ephẹrẹ, rere ayen ejobi vwo se se odẹ rẹ Ọrovwohwo re ayen ku evun gbe ọvo vwọ ga.

¹⁰ Nẹ abọ oboyi rẹ irhie rẹ Itiọpia ihwo re rẹ vwẹ na, ọmọtẹ rẹ ihwo mẹ re hrabọ na, ke cha vwẹ ẹkpẹvwẹ rhe vwe.

¹¹ Vwẹ ẹdẹ yena oma gbe cha vo vwẹ-ẹ fiki re uruemu ru we vwo mukpahe ovwẹ; kidie vwẹ ọke yena ki mi che kpono nẹ ohri rẹ ovwan ihwo rẹ ovwan ri herẹ ri mu oma kpenu na, wọ gbe cha dia ohwo rẹ ogbarogba ọfa vwẹ ugbenu ọfuanfon mẹ na-a.

¹² Kidie ki mi che ji ihwo evo vwẹ uherevie rẹ ovwan ihwo dẹndẹn re vwẹ oma kpotọ. Ayen ke cha djẹ sioma nu vwẹ ọde rẹ Ọrovwohwo na,

¹³ Ayen otu ri chekọ vwẹ Izrẹl, gbi che ru oru chọ-ọ ayen gbe cha vwọrọ efia-an, eyẹ a gbe cha mrẹ ẹrẹnvwe rọ vwọrefia vwẹ unu raye-en. Kidie ayen che sun igegede rayen ayen ki shevwerhe te otọ, ohwo ọvuọvo gbe vwẹ oshọ mu aye-en.

¹⁴ Van sọ une, E ọmọte ri Zayọn; kperi, E Izrẹl! Ghọghọ re wọ vwẹ udu wẹn ejobi mu oma kpenu, E ọmọtẹ ri Jerusalẹm!

¹⁵ Ọrovwohwo si orhiẹ rẹ obruhwe we nẹ uwe oma, ọ djẹ ivwighrẹ wẹn nẹ uwe oma Ovie rẹ Izrẹl na, Ọrovwohwo na, ọ hẹ uherevie wẹn, wọ gbe djẹ oshọ rẹ umiovwo ọfa-a.

¹⁶ Vwẹ ẹdẹ yena kọ ta kpahe Jerusalẹm, wọ djẹ oshọ-ọ, E Zayọn, wọ jẹn abọ rhọ wẹ-ẹn.

¹⁷ Ọrovwohwo na Ọghẹnẹ wẹn, ọ hẹ uherevie wẹn, ọgba rẹ ofovwi rọ kẹ ohwo obọẹkparọ, kọ ghọghọ aghọghọ riarie owe phihọ, kọ vwẹ ẹguọnọ rọye ru we phihọ ọkpọkpọ, kọ sọ une rẹ aghọghọ riariẹ owẹ phihọ

¹⁸ kere ẹdẹ rẹ orẹ. Ki mi si ughwu nẹ uwe oma, vwẹ ọtiọye na wo gbe mrẹ omaephọphọ-ọ.

¹⁹ Nighẹ, vwẹ ọke yena ki mi hirhe opharo ku otu ri shenyẹ wẹ. Ki mi sivwi ukpono ki mi se otu ra djẹ kufia koko, ki mi wene omaevuọ rayen phihọ ejiro ki mi kperi usi vwẹ akpọ na.

²⁰ Vwẹ ọke yena ki mi se we kpo uwevwi, vwẹ ọke yena ri mi de che se ovwan koko; e, ki mi ru we vwo kperi usi re de jiri uwe vwẹ ohri rẹ ihwo rẹ akpọ na, re me da vwẹ ughwẹ rẹ ovwan rhivwi rhe vwẹ irharo rẹ ovwan na, eriyin Ọrovwohwo na tare.