Zẹfanaya 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹdẹ rẹ Ophu rẹ Ọrovwohwo

¹ Ota rẹ Ọrovwohwo ro bru Zẹfanaya rhe ọmọ ri kushi, ọmọ ri Gẹdalaya, ọmọ rẹ Amaraya, rẹ ọmọ ri Hẹzikaya, vwẹ ọke ri Jọsaya ọmọ rẹ Amọn, ovie ri Juda.

² Mi che hwerhe kemu kemu ejobi re kakare nẹ enu rẹ akpọ na, eriyin Ọrovwohwo na tare.

³ Mi hwerhe ohwo vẹ eranvwe kufia; mi hwerhe emephran rẹ obenu kufia kugbe eri rẹ abadi na. Me guọghọ ohwo umwemwu fiọtọ kakare, me nyavwẹ ohwo rẹ akpọ kufia nẹ enu rẹ akpọ na, eriyin Ọrovwohwo na tare.

⁴ Ke me riẹn obọ mẹ kpahe Juda, vwọ kpahe ihwo re dia Jerusalẹm; ke me nyavwẹ umuku ri Baal ro chekọ nẹ etinẹ kugbe odẹ rẹ irherẹn re gọ edjọ na.

⁵ Otu ri diguẹ phihọ ọkpọ rẹ uwevwi vwọ kẹ otu rẹ obenu, otu ri diguẹ ayen mie duvwe iyori kẹ Ọrovwohwo ye ayen je vwẹ ode ri Milkọn duvwẹ Iyori.

⁶ Otu ri chuko ku ri gbi nene Ọrovwohwo-o, re gbe guọnọ Ọrovwohwo-ọ eyẹ ri gbi duotọ rẹ emu vwẹ obọ rọye-e.

⁷ Rhurhu unu vwẹ obaro rẹ Ọrovwohwo Ọghẹnẹ! Kidie ẹdẹ rẹ Ọrovwohwo na te otọ re; Ọrovwohwo rhuẹrẹ izobo kpahe Ọ nabọ ru erhorha rọye fuanfon.

⁸ Vwẹ ẹdẹ rẹ izobo rẹ Ọrovwohwo na– Ki mi che hwe inotu na vẹ emọ rẹ ovie na kugbe ayen otu re vwẹ emwa erhorha vwo rhuo.

⁹ Vwẹ ẹdẹ yena ki mi hwe kohwo kohwo ro pho wan ugana vrẹn, kugbe ayen otu re ghwẹ ozighi vẹ ọghware vọn uwevwi rẹ onini rọye.

¹⁰ Vwẹ ẹdẹ yena, Eriyin Ọrovwohwo na tare, ke che nyo unuebo vwẹ obo Anurhoro rẹ Eri na, oviẹ ko che nẹ ubro rẹ orho rivẹ rhe, edo gbragada ko nẹ obo ugbenu na rhe.

¹¹ Beroma, E ihwo re dia obo Maktesh! Kidie ineki na ejobi gbe herọ-ọ; ihwo re vwanvwẹ idọnọ efuanfon ejobi a nyavwẹ ayen kufia.

¹² Vwẹ ọke yena kẹ urhukpẹ me vwọ guọnọ Jerusalẹm, ki mi hwe eshare na otu re kerhọn rẹ uyono esiri ọkpokpo na-a, otu re ta vwẹ udu rayen nẹ, Ọrovwohwo se ruẹ obo ri yoma-a, eyẹ o ji se ruẹ ọbo ri miovwiri-i.

¹³ E che gborho ekuakua rayen reyọ, ka kua iwevwi rẹ ayen fiotọ. Owene ayen bọn iwevwi dede, ayen cha sa dia aye-en; owenẹ ayen kọn ogba ri vain, ayen cha sa da udi ro hwẹ no rhe-e.

¹⁴ Ẹdẹ rode rẹ Ọrovwohwo na si kẹri re ọ kẹrire ọ cha vẹ ọkpakpa; edọ rẹ ẹdẹ rẹ Ọrovwohwo o muenu korokoro, ọgba rode na kperẹ phia vwẹ etiyin.

¹⁵ Ẹdẹ yena ẹdẹ rẹ ophu, ẹdẹ rẹ ọdjorho vẹ ivuemiovwo, ẹdẹ rẹ ẹghwọrọ vẹ ekua fiotọ, ẹdẹ rẹ ebri vẹ okuku hwi, ẹdẹ rẹ egho vẹ ebri gbae.

¹⁶ Ẹdẹ rẹ owanre ehworo vẹ unuebo rẹ ofovwi vwọ so irere ra gba ogba riariẹ ogba ri kpenu ra gba hẹrhẹ ofovwi.

¹⁷ Me cha vwẹ omaẹghwọrọ vwọ ihwo na, ọtiọye na ayen ke yan divwi divwi kerẹ irhuẹro, fikiridie ayen ru imwemwu kpahe Ọrovwohwo; ka mwavwe ọbara rayen kuotọ kerẹ iwurhie, uvwo rayen kerẹ isọn.

¹⁸ Idọnọ efuanfọn rayen eyẹ iro rayen che se sivwi aye-en vwẹ ẹdẹ rẹ ophu rẹ Ọrovwohwo na-a. Vwẹ erhanre rẹ ophu rẹ omaẹriọ rọye, otọ na ejobi ke torhẹ muotọ. Rọ vwọ gba, kpregede ọye ọ che vwo oba kẹ ọtiọye otu re dia otọ na ejobi cha dia.