Uvwerhe 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌIphiẹrohọ rẹ Omaephen rọ Wan Arodọvwẹ rẹ Ọrovwohwo Rhe 1 Mẹvwẹ hẹ ohwo rọ re oja vwẹ otọ rẹ ọkpọ rẹ ophu rọye. 2 Ọ djẹ vwẹ ọ da reyọ ovwẹ phihọ evun rẹ ebri ro jẹ orẹmrẹ evwọ; 3 Omuẹro ọ rhẹriẹ obọ rọye ku vwe enenẹ vwẹ ẹdẹ na ejobi. 4 Ọ da nẹrhẹ uvwo mẹ kugbe ohọroma mẹ dọn, o de vwirhi ibeku mẹ. 5 Ọ rhiẹ imu ọ hwaphihọ riariẹ ovwẹ vẹ ukpokpogho rọ yara korokoro. 6 Ọ da nẹrhẹ ovwẹ dia evun rẹ ebri, kerẹ ohwo ro ghwru rhahae. 7 Ọ vwẹ igbẹhẹ gba ogba riariẹ ovwẹ phihọ rere mi vwo jẹ sa djẹ vabọ. O de kru ejọnrọn ehọhọ nyẹ vwẹ; 8 Obo ri mi kperi se ukẹcha te na, Ọ kerhọn rẹ erhovwo mẹ-ẹ. 9 Ọ vwẹ elanọ re sheri vwo gbe idjerhe mẹ di, O de ru idjerhe mẹ gugunu. 10 Ọ da họhọ okorhi ro fiọnko, kere okpohrokpo ro sioma nu. 11 O sun vwe ghwru nẹ idjerhe mẹ ọ da chẹghẹ ovwẹ kẹnẹ kẹnẹ; Ọ da nẹrhẹ ovwẹ dia ofefe. 12 O wurhu umurhabo rọye ọ da vwẹ ovwẹ ru uko rẹ ubigẹ rọye. 13 Ọ da sa ibige rẹ ekpo rọye i de kporo ro udu mẹ; 14 Mi hirhe phihọ ehwẹjẹ kẹ ihwo ejobi, ko mẹvwẹ ayen sua kọke kọke. 15 Obo re yara ọye ọ vwọ vọn evun mẹ, Ọ da vwẹ akoro vwọ vọn vwẹ evun. 16 Ọ da reyọ ako mẹ vwọ chẹghẹ ibiekpẹn, ọ da vwẹ ovwẹ gbule iwurhie. 17 Erhi mẹ gbe riẹn ufuoma-a, aghọghọ da chọrọ ovwẹ ẹro. 18 Kọye me vwọ ta, “urinrin mẹ reri, otiọye ji te iphiẹrohọ mẹ nẹ obọ rẹ Ọrovwohwo rhe.” 19 Karophihọ oma ẹlaghọ mẹ vẹ eyarọ mẹ, akoro kugbe akrasa. 20 Erhi mẹ roro vwẹ ọke ejobi, oma de ru vwe kuọrọ. 21 Ẹkẹvuọvo ọna me rhe karohọ, ọ da nẹrhẹ ovwẹ vwo iphiẹrohọ. 22 Ẹguọnọ ro jẹrhẹriẹ rẹ Ọrovwohwo na o re-e, arodọvwẹ rọye vwo oba-a. 23 Okpokpọ ọ dia kirhiọke kirhiọke, uyota wẹn ọ pha rhuarho. 24 “Ọrovwohwo ọye hẹ ẹkẹn mẹ” ọtiọye erhi me tare, fiki rẹ ọtiọye na ki mi phi ẹro phihọ. 25 Ọrovwohwo yoma kẹ otu re sa hẹrhẹ, vwọ kẹ erhi rọ guọnerọ. 26 Oyoma rere ohwo hwe oma mu hẹrhẹ esivwo rẹ Ọrovwohwo na. 27 Oyoma rere ohwo vwọ ghwa urhekpe rọye vwẹ ọke rẹ emoha rọye. 28 E jẹn ọye ọvo tidia fọ gbiei siẹ ro de muo nyẹ nu. 29 Jẹn ọ bọvwọn unu rhu ekpẹn ọke ọvo iphiẹrohọ me rhe dia vwohọ. 30 Jẹn ọ reyọ ọhwa rọye vwọ kẹ ọrọ teyọ na, rere ọ vọn vẹ isọn-ẹriọ. 31 Kidie Ọrovwohwo sa djẹ kufia bẹdẹ-ẹ, 32 ẹkẹvuọvo, owene ọ vwẹ oja riọ dede o ji ni arodọvwẹ kirobo rẹ ẹguọnọ rọye ro jẹrhẹriẹ na bute. 33 Kidie ọ di mu ohwo ọvuovo lagha-a eyẹ ọ nẹrhẹ ophu di muẹ emọ rẹ ihwo-o. 34 Rere o vwo chiyi otu re mu phihọ uwodi vwẹ akpọ na muotọ, 35 rere o vwo dje ẹkẹn ute ro te ohwo kufia vwẹ obaro rẹ Ọro Me kpenu na, 36 rere ọ vwọ rhẹriẹ iroro rẹ ohwo rẹ Ọrovwohwo rhọvwe phihọ-ọ. 37 Ono ri ji urhi o de ghine ruo gba, jokpa nẹ Ọrovwohwo vwi ro mu. 38 Ọ dia unu rẹ Ọro me kpenu na ọye uyoyovwi vẹ umiovwo nurhe? 39 Die ohwo ọkpokpọ vwo brenu, rẹ ohwo vwọ ta ota rẹ ehwe fiki rẹ imwemwu rọye? 40 E jẹn avwanre davwẹ idjerhe rẹ avwanre ni, rere e rhivwi bru Ọrovwohwo na 41 E jẹn avwanre kpare udu vẹ abọ rẹ avwanre kpenu, bru Ọghẹnẹ vwẹ obo odjuvwu 42 “Avwanre gbe urhi avwanre ji mukpahọ, yi wo ji vwo ghovwo-o. 43 Wọ vwẹ ophu phopho oma wọ da vwọ tua avwanre, wọ da vwẹ aroesio hwe avwanre; 44 Wọ vwe egho phopho oma wẹn rere ẹrhovwo ọvuọvo vwo je sa wan vrẹn. 45 Wọ vwẹ avwanre ru ekuakua rẹ erhurhu vwẹ ohri rẹ ihwo na. 46 Ivwrighrẹ rẹ avwanre ejobi ra gbọ kuẹ avwanre. 47 Uguegue vẹ oshọemuo de rhurhu avwanre muotọ, ẹkuafiotọ kugbe ẹghwọrọ 48 ẹro mẹ ke djẹ ọkẹre kerẹ ame rẹ urhie fiki rẹ ẹghwọrọ rẹ ọmọtẹ rẹ ihwo mẹ. 49 Ẹro mẹ djẹ ọkere ro jẹ ẹka, o vwo omaerovwo-o; 50 bẹsiẹ re Ọrovwohwo vwọ dia odjuvwu de ni je mrẹ; 51 ẹro mẹ kọ nẹrhẹ ivun miovwo uvwe fiki rẹ urhiẹvwe rẹ emetẹ rẹ orere mẹ. 52 Ivwighrẹ mẹ ke de djẹ uyo mẹ ekueku kerẹsiẹ ra djẹ uyo rẹ ọphran, 53 ayen do vwe ọkpokpọ phihọ ukpotọ ayen da vwẹ ibieragha phi vwe, 54 ame revwe phihọ me da ta nẹ, Mi ghwruru. 55 Mi de se odẹ wẹn Ọrovwohwo, nẹ obotọ rẹ ukpotọ na rhe, 56 Wo de ghine nyo orẹ mẹ, Wo di erhọn wẹn kẹ ekperẹ rẹ ukoẹcha mẹ-ẹ. 57 Wo de ghine sikẹrẹ ovwẹ vwẹ ọke re mi vwo se we, wọ da ta, ‘Wọ djẹ oshọ-ọ!’ 58 Wọ da chọ ochọ mẹ, E Ọrovwohwo, wọ da tan arhọ mẹ hirhe. 59 Wọ mrẹ obo re ruvwe chọ te, E Ọrovwohwo, gbe bru orhiẹn na kẹ vwẹ 60 Wọ mrẹ ihriẹriọ rayen ejobi, iroro rayen jẹ kpahe ovwẹ. 61 “Wo nyo ọjẹfia rayen E Ọrovwohwo, iroro rayen je kpahe ovwẹ. 62 Ẹbẹrunu vẹ iroro rayen otu ri hwe vwe na e vwọ so vwẹ ọke ejobi 63 Nighe etidia kugbe evrẹn rayen, Mẹvwẹ ayen vwọ sua ine rayen. 64 Hwa osa ke ayen, E Ọrovwohwo, kirobo rẹ iruo rẹ abọ rayen epha. 65 Wọ vwẹ udu rẹ ibeghe vwọ ke ayen; ekan wẹn kọ dia enu rẹ ayen. 66 Wọ vwọ tua ayen vwẹ ophu wẹn wọ me ghwọrọ ayen nẹ otọ rẹ idjuvwu wẹn na, E Ọrovwohwo.” |
Bible in Urhobo © United Bible Societies, 1977.
Bible Society of Nigeria