Uvwerhe 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọja ri Zayọn na Obo rẹ Ọrovwohwo O nu Rhe

¹ Mavọ Ọrovwohwo vwọ vwẹ ophu rọye phi ọmọtẹ ri Zayọn phihọ otọ re egho! Obo odjuvwu o de phi erhuvwu rẹ Izrẹl teye akpọ na, Ọ gbe karohọ asan rọ ghwẹ awọ rọye phihọ vwẹ ẹdẹ rẹ ophu rọye-e.

² Ọrovwohwo rhe vwo arodọvwẹ vwẹ ọke rọ vwọ guọghọ ẹdia ri Jakọp ejobi-i; vwẹ ọphu rọye ọ da guọghọ te otọ ogba ọgangan rẹ ọmọtẹ ri Juda, o siro ghwiotọ vẹ ophọphọvwe uvie kugbe isun rọye.

³ Ọ guọghọ ogangan rẹ Izrẹl ejobi vwẹ evun rẹ ophu ọgangan rọye. O de si obọrhe rọye nẹ ayen oma vwẹ obaro rẹ ivwighrẹ; na, kọ torhẹ kere ogidi erhanre vwi Jekọp, ejobi kọ torhẹ riariẹ

⁴ O wurhu umurhabọ rọye kere ọvweghrẹ. Ọ vwẹ obọrhe rọye sio phihọ kerẹ ọvweghrẹ, ọ da guọghọ eheri rọ hẹ opharo rẹ avwanre vwẹ utughẹ rẹ ọmọte ri Zayọn, Ọ kpare ophu rọye ku kerẹ erhanre.

⁵ Ọrovwohwo rhe rhoma họhọ ọvweghrẹ re, Ọ da rhe guọghọ Izrẹl; ọ rhe guọghọ ighẹn rọye ejobi, hirhe ogba ọgangan rọye phihọ erhurhu, O ki rhe ru omaemuohọ vẹ oviẹ buphihọ vwẹ evun rẹ ọmọtẹ ri Juda.

⁶ Ọ guọghọ ọgarivi rọye te otọ kere ogba rẹ ekankọn. Ọ ke je guọghọ ẹdia rẹ orẹ re bruru na phihọ erhurhu, Ọrovwohwo da nẹrhẹ ẹdorẹ re bruru kugbe ẹdidjala re vwẹ evun ri Zayọn. Vwẹ evun rẹ ophu ọgangan rọye na ọ da siẹn ivie vẹ irherẹn.

⁷ Ọrovwohwo na reyọ agbada rọye vwọ jehwẹ ọ da siẹn ẹshẹ rọye. O phi igbẹhẹ rẹ ighẹn rọye phihọ obọ rẹ ivwighrẹ rọye, Ọsẹghẹ de rhi she vwẹ uwevwi rẹ Ọrovwohwo kerẹ ẹdorẹ re bruru.

⁸ Ọrovwohwo jẹ iroro ro vwo hirhe igbẹhẹ rẹ ọmọtẹ ri Zayọn phihọ erhurhu, O de si usi vwo gbere ughwru phihọ, Ọ da obọ rẹ ẹghwọrọ rọye ji-i; ọ da nẹrhẹ udio vẹ igbẹhẹ viẹ, ayen re koko vwere oma.

⁹ Inurhoro rọye kporo ro otọ; Ọ ghwọre o vwirhi egba rọye ovie vẹ isun rọye hẹ ohri rẹ ẹgborho na, urhi gbe herọ-ọ. Emraro rọye gbe mrẹ emramrẹ nẹ obọ rẹ Ọrovwohwo cha-a.

¹⁰ Ekpako rẹ ọmọtẹ ri Zayọn tidia tẹ otọ fọ gbiei. Ayen tuẹ iwurhie ku iyovwi rayẹn, ayen da vwẹ isisio rhuo; Emetẹ ri Jerusalẹm gbe iyovwi rayen phihọ otọ.

¹¹ Ibiẹrọ mẹ sunka vẹ oviẹ; erhi mẹ re kpọghọ; udu mẹ vọnre vẹ uvweri fiki rẹ ẹghwọrọ rẹ ọmọtẹ rẹ ihwo mẹ, fikiridie imitete vẹ emọboba hiro sherua vwẹ evun rẹ irhuvwu rẹ orere na.

¹² Ayen viẹ se ini rayen tanẹ, “Tivọ emu kugbe udi epha?” rẹ ayen vwo sherua kerẹ ihwo re wan oma vwẹ evun rẹ irhuvwu rẹ orere na. Ayen re ghwẹ phihọ abọ rẹ oni rayen.

¹³ Kidie me sa ta kẹ wẹ, eyẹ kidie mi vwo dje we, E ọmọtẹ ri Jerusalẹm? Didi emu mi vwo dje we rere mi se vwo bru uwe uche, E ọmọtobẹ ri Zayọn? kidie ẹghwọrọ wẹn hẹre kere abadi; kono se sivwi uwe?

¹⁴ Emraro wẹn mraro rẹ efian vẹ ọphiẹnvwẹ kẹ wẹ, ayen se tue orukuruku wẹn phia-a rọ vwẹ ughwe wẹn rhivwi rhe, ẹkẹvuọvo kẹ ayen bọ epha rẹ efian ro suẹn ohwo ghwrẹ.

¹⁵ Otu re wan idjẹrhe na vrẹn ejobi da fa abọ kẹ owẹ, ayen fiunu ji kpogho uyovwi kẹ ọmọte ri Jerusalẹm, “Ọ nana tobọ hẹ orere re se nẹ erhuvwu rọ ghare na aghọghọ rẹ akpọ na ejobi na?”

¹⁶ Ivwighrẹ wẹn ejobi herọ ghwọ ku we, ayen fiunu ayen ria akọ, ayen kperi avwanre guọgherọ Ẹhẹn ọnana ẹdẹ rẹ avwanre rhẹro rọye na, asakiephana o te avwanre obọ re avwanre mrẹrẹ re!

¹⁷ Ọrovwohwo ru obo ro rori ọ vwẹ oshọ rọ djle mu ayen na vwo ru iruo re; kirobo rọ guọnọre nẹ ọdia rhabae rhe, ọ ghwọre ọ rha re ehrọre-e; Ọ nẹrhẹ ivwighrẹ na mrẹ wẹ ghọghọ, O de ru ẹgba rẹ ivwighrẹ wẹn na rho phihọ.

¹⁸ Va kperi se Ọrovwohwo! E ọmọte ri Zayọn! Jẹn ameoviẹ dje wotọ kerẹ ọkẹre te ason te uvo. Wo rovwo oma-a, wo jẹ ẹro wẹn rovwo oma rhe-e.

¹⁹ Evrẹn, kperi vwẹ ason, vwẹ ẹtuọhọ rẹ orhẹrẹ na! Kpare udu wẹn ku kerẹ amẹ vwẹ obaro rẹ Ọrovwohwo! Kpare abọ rẹ ovwan kpenu kẹ fiki rẹ arhọ rẹ emọ wẹn ri sherua fiki rẹ owẹvwe vwẹ obo oba rẹ urhuvwu kurhuvwu.

²⁰ Nighe, E Ọrovwohwo rere wọ mrẹ! Ono wọ vẹ ọye gbe ru imu nana vwọ? Kẹ eya re emọ rayen, emọ rẹ ayen vwọ bele na? Eyẹ ke hwe irherẹn vẹ emraro ghwu vwẹ ẹshẹ rẹ Ọrovwohwo?

²¹ Vwẹ evun rẹ iwurhie rẹ irhuvwu na ighene vẹ emare de gbule; emetẹ mẹ kugbe emeshare mẹ de ghwu ughwu rẹ ọlọkọ, wo hwe ayen vwẹ ẹdẹ rẹ ophu wẹn, ihwehwe ro vwo arodọvwẹ-ẹ.

²² Wọwẹ ri se avwanre kpo ẹdorẹ re bruru uguegue vwi kabọ kabọ; vwẹ ẹdẹ rẹ ophu rẹ Ọrovwohwo ohwo ọvuọvo sa vabọ-ọ eyẹ ke sa rhọ-ọ, Ayen otu re me fẹnre re me ghẹre ivwighrẹ mẹ mie vwe ghwọrọ.