Ukeri 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Izobo Fiki rẹ Irhierhie rẹ agbada na

¹ Vwẹ ẹdẹ ri Mosis vwọ bọn ọgarivi na nu, rọ vwọ vwẹ evwri ghworo ro vwo ruo fon nu kugbe ekuakua ra vwọ rhuẹrẹ ejobi, rọ vwọ vwẹ evwri ghworo agbada na kugbe ekuakua re herọ ejobi ro vwo ruo fon nu,

² isun rẹ ihwo rẹ Izrẹl, ilori rẹ uwevwi rẹ esẹ rayen ọvuọvo, isun rẹ orua ọvuọvo, re vwo mu phihọ enu rẹ ihwo re keri na,

³ ayen da ghwẹ izobo rayen rhe ri ze kẹ Ọrovwohwo, ekpẹrẹ esan re rhurhuru kugbe irhuẹn ihwivẹ, ekpẹrẹ ọvuọvo vwọ kẹ isun ivẹ, ọvuọvo kẹ rha erhuẹn ọvo; ayen da vwẹ ayen ze izobo vwẹ obaro rẹ ọgarivi na.

⁴ Etiyin Ọrovwohwo da ta kẹ Mosis,

⁵ Reyọ enana mie ayen, rere a vwẹ ayen ru iruo vwẹ evun rẹ utughẹ ra da vwa oma na, rere wọ vwẹ ayen kẹ ihwo ri Livae, vwo kẹ ohwo ọvuọvo kirobo rẹ iruo rẹ ohwo yena epha.

⁶ Etiyin Mosis da reyọ ekpẹrẹ na kugbe irhuẹn na, ọ da vwẹ ayen kẹ ihwo ri Livaẹ na.

⁷ Ekpẹrẹ ivẹ kugbe irhuẹn ẹne eye ọ vwọ kẹ emọ ri Gẹrshọn, kirobo rẹ iruo rayen epha;

⁸ kugbe ekpẹrẹ ẹne kugbe irhuẹn ẹrenren eye ọ vwọ kẹ emọ rẹ Merari, kirobo rẹ iruo rayen epha, kirobo rẹ Itamar rẹ ọmọ rẹ Erọn rẹ orherẹn na djere kẹ ayen.

⁹ Ẹkẹvuọvo vwọ kẹ emọ ri Kohat ọ gbe kẹ ayen emuọvo-o, fikiridie ayen a vwẹ emu efuanfon na kẹ re vwẹ ẹro te ekuakua re mu kpahe igabọ.

¹⁰ Isun na de ze izobo fiki rẹ irhierhie rẹ agbada na vwẹ ẹdẹ rẹ a vwẹ evwri ghworo na; isun na de ze izobo rayen vwẹ enu rẹ agbada na.

¹¹ Ọrovwohwo da ta kẹ Mosis, Ayen che ze izobo rayen na, osun ọvo ẹdẹ ọvo fiki rẹ irhierhie rẹ agbada na.

¹² Ohwo ro ze izobo rọye vwẹ ẹdẹ rẹ ẹsosuọ da dia Nahshọn rẹ ọmọ rẹ Amminadab, rẹ orua ri Juda;

¹³ izobo rọye da dia ọsete rẹ idọnọ rọ họhọ te shekẹl ujosa gbẹ ihwe, oze ọvo rẹ idọnọ rọ họhọ te ovwanvwọn ri shekẹl ujorha gbẹ ihwe, kirobo rẹ shekẹl rẹ ẹshẹ dia, ayen ivivẹ na nabọ vọn vẹ eyagha rẹ ọka ra nabọ nọ ra vwẹ evwri gua vwo ze izobo rẹ ọka;

¹⁴ egebule rẹ oro ọvo ri shekẹl ihwe, rọ vọnre vẹ ugboduma;

¹⁵ upene rẹ erhuẹn ọshare ọvo, egbo ọvo, omogodẹ rẹ ọsharẹ ọvo upene rẹ ẹgbukpe ọvo, fiki rẹ izobo rẹ ẹtorhẹ;

¹⁶ ẹkpro ọvo re vwo ze izobo fiki rẹ umwemwu;

¹⁷ ọ re rhe vwo ze izobo rẹ ufuoma, kẹ irhuẹn ive, egbo iyori, ẹkpro iyori, kugbe upene rẹ egbo iyori rẹ ẹgbukpe ọvo. Ọnana kọye izobo ri Nahshọn rẹ ọmọ rẹ Amminadab.

¹⁸ Vwẹ ẹdẹ rivẹ Nethunẹl rẹ ọmọ ri Zuar, osun rẹ Isaka, de ze izobo;

¹⁹ ọ da vwẹ ọsete rẹ idọnọ ọfuanfon vwo ze izobo rọye na, rẹ ẹhọhọ rọye dia shekẹl ujosan gbe ihwe, oze rẹ idọnọ efuanfon rọ họhọ te shekẹl ujorha gbe ihwe, kirobo ri shekẹl rẹ ẹshẹ na epha, ivivẹ na vọnre vẹ eyagha rẹ ọka ra vwẹ evwri gua re vwo ze izobo rẹ ọka;

²⁰ egebule rẹ oro ri shekẹl ihwe, ro vọnre vẹ ugboduma;

²¹ upene rẹ erhuẹn ọshare ọvo, egbo ọvo, ogodẹ rẹ ọshare upene rẹ ẹgbukpe ọvo, re vwo ze izobo rẹ ẹtorhẹ;

²² ẹkpro ọvo re vwo ze izobo fiki rẹ umwemwu;

²³ kugbe izobo rẹ ufuoma, irhuẹn eshare ivẹ, egbo iyori, ẹkpro iyori, kugbe igodẹ rẹ eshare iyori upene rẹ ẹgbukpe ọvo. Ọnana kọye hẹ izobo ri Nethanẹl rẹ ọmọ ri Zuar.

²⁴ Vwẹ ẹdẹ rẹ erha Eliab rẹ ọmọ ri Hẹlọn, osun rẹ ihwo ri Zẹbulọn:

²⁵ izobo rọye da dia ọsete ọvo rẹ idọnọ ọfuanfon rẹ ẹhọhọ rọye dia shekẹl ujosa gbe ihwe, oze rẹ idọnọ ọfuanfon ọvo ri shekẹl ujorha gbẹ ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha rẹ ọka ra nabọ vwẹ evwri gua re vwo ze izobo rẹ ọka;

²⁶ egebule rẹ oro ọvo ri shekẹl ihwe, rọ vọnre vẹ ugboduma;

²⁷ upene rẹ erhuẹn ọvo rẹ ọshare, egbo ọvo, omogodẹ ọvo upene rẹ ẹgbukpe, re vwo ze izobo rẹ ẹtorhẹ;

²⁸ ẹkpro ọvo re vwo ze izobo rẹ umwemwu;

²⁹ kugbe ọ rẹ vwo ze izobo rẹ ufuoma, irhuẹn eshare ivẹ, egbo iyori, ẹkpro iyori, kugbe imigodẹ iyori upene rẹ ẹgbukpe ọvo. Ọnana kọye hẹ izobo rẹ Eliab rẹ ọmọ ri Hẹlọn.

³⁰ Vwẹ ẹdẹ rẹ ẹne Elizur rẹ ọmọ ri Shedeur, osun rẹ ihwo ri Rubẹn:

³¹ izobo rọye da dia ọsete rẹ idọnọ ọfuanfon ọvo rẹ ẹhọhọ rọye te shekẹl ujosan gbẹ ihwe, oze ọvo rẹ idọnọ ọfuanfon ro te shekẹl ujorha gbe ihwe, kirobo ri shekẹl rẹ ẹshẹ epha, ivivẹ na vọnre vẹ omamọ rẹ eyagha rẹ ọka ra nabọ vwẹ evwri gua kugbe rọ dia izobo rẹ ọka;

³² egebule rẹ oro ọvo ri shekẹl ihwe, rọ vọnre vẹ ugboduma;

³³ upene rẹ erhuẹn ọshare ọvo, egbo ọvo, omogodẹ rẹ ọshare ọvo upene rẹ ẹgbukpe, re vwo ze izobo rẹ ẹtorhẹ;

³⁴ ẹkpro ọvo re vwo ze izobo fiki rẹ umwemwu;

³⁵ kugbe vwọ kẹ izobo rẹ ufuoma, irhuẹn eshare ivẹ egbo iyori, ẹkpro iyori, kugbe imigodẹ rẹ eshare upene rẹ ẹgbukpe ọvo. Ọnana kọye hẹ izobo rẹ Ẹlizur rẹ ọmọ ri Shedeur.

³⁶ Vwẹ ẹdẹ rẹ iyori Shẹlumiẹl rẹ ọmọ ri Zurishaddai, osun rẹ ihwo ri Simiọn:

³⁷ izobo rọye da dia ọsete rẹ idọnọ ọfuanfon ọvo, rẹ ẹhọhọ rọye te shekẹl ujosan gbẹ ihwe, oze rẹ idọnọ ọfuanfon ọvo rọ họhọ te shekẹl ujorha gbe ihwe, kirobo ri shekẹl rẹ ẹshẹ ẹpha, ivivẹ na vọnre vẹ eyagha rẹ ọka ra vwẹ evwri gua kugbe re vwo ze izobo rẹ ọka;

³⁸ egebule rẹ oro ọvo ri shekẹl ihwe, rọ vọnre vẹ ugboduma;

³⁹ upene rẹ erhuẹn rẹ ọshare ọvo, egbo ọvo, omogodẹ rẹ ọshare ọvo upene rẹ ẹgbukpe ọvo, re vwo ze izobo rẹ ẹtorhẹ;

⁴⁰ ẹkpro ọvo re vwo ze izobo rẹ umwemwu;

⁴¹ kugbe re vwo ze izobo rẹ ufuoma irhuẹn ọshare ivẹ, egbo iyori, ẹkpro iyori, kugbe imigodẹ rẹ eshare iyori upene rẹ ẹgbukpe ọvo. Ọnana kọye hẹ izobo ri Shẹlumiẹl rẹ ọmọ ri Zurishaddai.

⁴² Vwẹ ẹdẹ rẹ esan Eliasaf rẹ ọmọ ri Deuẹl, osun rẹ ihwo ri Gad:

⁴³ izobo rọye da dia ọsete rẹ idọnọ ọka, rẹ ẹhọhọ rọye dia shekẹl ujosan gbe ihwe, oze rẹ idọnọ ri shekẹl ujorha gbe ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha re ọka ra vwẹ evwri gua kugbe re vwo ze izobo rẹ ọka;

⁴⁴ egebule rẹ oro ọvo ri shekẹl ihwe rọ vọnre vẹ ugboduma;

⁴⁵ upene rẹ erhuẹn ọshare ọvo, egbo ọvo, upene rẹ omogodẹ ọvo rẹ ẹgbukpẹ ọvo, re vwo ze izobo rẹ ẹtorhẹ;

⁴⁶ ẹkpro ọvo, re vwo ze izobo rẹ umwemwu;

⁴⁷ kugbe izobo rẹ ufuoma, irhuẹn eshare ivẹ, egbo iyori, ẹkpro iyori kugbe imigodẹ rẹ eshare iyori upene rẹ ẹgbukpe ọvo. Ọnana kọye hẹ izobo rẹ Eliasaf rẹ ọmọ ri Deuẹl.

⁴⁸ Vwẹ ẹdẹ rẹ ighwrẹn Elishama rẹ ọmọ rẹ Ammihud, osun rẹ ihwo rẹ Ifrem;

⁴⁹ izobo rọye da dia ọsete rẹ idọnọ ọfuanfon, rẹ ẹhọhọ rọye dia shekẹl ujosan gbẹ ihwe oze rẹ idọnọ ọfuanfon ọvo ri shekẹl ujorha gbẹ ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha rẹ ọka ra vwẹ evwri gua kugbe re vwo ze izobo rẹ ọka;

⁵⁰ egebule rẹ oro ọvo ri shekẹl ihwe, rọ vọnre vẹ ugboduma;

⁵¹ upene rẹ erhuẹn ọshare ọvo, egbo ọvo, omogodẹ ọvo upene rẹ ẹgbukpe ọvo, re vwo ze izobo rẹ ẹtorhẹ;

⁵² ẹkpro ọvo re vwo ze izobo rẹ umwemwu;

⁵³ kugbe ọ rẹ izobo rẹ ufuoma, irhuẹn eshare ivẹ, egbo iyori, ẹkpro iyori, kugbe imigodẹ rẹ eshare iyori upene rẹ ẹgbukpe. Ọnana kọye hẹ izobo rẹ Elishama ọmọ rẹ Ammihud.

⁵⁴ Vwẹ ẹdẹ rẹ ẹrenren Gamaliẹl rẹ ọmọ ri Pedahzur osun rẹ ihwo ri Manasse:

⁵⁵ izobo rọye da dia ọsete ọvo rẹ idọnọ ọfuanfon rẹ ẹhọhọ rọye dia shekẹl ujosan gbẹ ihwe, oze rẹ idọnọ ọfuanfon ọvo ri shekẹl ujorha gbẹ ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha rẹ ọka ra vwẹ evwri gua kugbe re vwo ze izobo rẹ ọka;

⁵⁶ egebule rẹ oro ọvo ri shekẹl ihwe, rọ vọnre vẹ ugboduma;

⁵⁷ upene rẹ erhuẹn ọshare ọvo, egbo ọvo, omogodẹ ọshare ọvo upene rẹ ẹgbukpe ọvo re vwo ze izobo rẹ ẹtorhẹ;

⁵⁸ ẹkpro ọvo re vwo ze izobo rẹ umwemwu;

⁵⁹ ẹkpro ọvo re vwo ze izobo rẹ ufuoma, irhuẹn ivẹ, egbo iyori, ẹkpro iyori, kugbe imigodẹ iyori upene rẹ ẹgbukpe. Ọnana kọye izobo ri Gamaliẹl rẹ ọmọ ri Pedahzur.

⁶⁰ Vwẹ ẹdẹ rẹ irhiri Abidan rẹ ọmọ ri Gidiọni, osun rẹ ihwo ri Bẹnjamin:

⁶¹ izobo rọye da dia ọsete rẹ idọnọ ọfuanfon ọvo, rẹ ẹhọhọ rọye te shekẹl ujosan gbẹ ihwe, oze rẹ idọnọ ọfuanfon ọvo ri shekẹl ujorha gbẹ ihwe, kirobo ri shekẹl rẹ ẹshẹ epha, ivivẹ na vọnre vẹ omamọ rẹ eyagha rẹ ọka ra vwẹ evwri gua kugbe re vwo ze izobo rẹ ọka;

⁶² egebule rẹ oro ọvo ri shekẹl ihwe, rọ vọnre vẹ ugboduma;

⁶³ upene rẹ erhuẹn ọshare ọvo, egbo ọvo, omogodẹ ọvo upene rẹ ẹgbukpe ọvo, re vwo ze izobo rẹ ẹtorhẹ;

⁶⁴ ẹkpro ọvo re vwo ze izobo rẹ umwemwu,

⁶⁵ kugbe ọ rẹ izobo rẹ ufuoma, irhuẹn eshare ivẹ, egbo iyori, ẹkpro iyori, kugbe imigodẹ rẹ eshare iyori upene rẹ ẹgbukpe ọvo. Ọnana kọye hẹ izobo rẹ Abidan rẹ ọmọ ri Gidiọni.

⁶⁶ Vwẹ ẹdẹ rẹ ihwe Ahieaze rẹ ọmọ rẹ Ammishaddai, osun rẹ ihwo ri Dan;

⁶⁷ izobo rọye da dia ọsete rẹ idọnọ ọfuanfon ọvo, rẹ ẹhọhọ rọye te shekẹl ujosan gbe ihwe, oze rẹ idọnọ ọfuanfon ọvo ri shekẹl ujorha gbẹ ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha rẹ ọka ra vwẹ evwri gua kugbe re vwo ze izobo rẹ ọka;

⁶⁸ egebule ọvo rẹ oro ri shekẹl ihwe, rọ vọnre vẹ ugboduma;

⁶⁹ upene rẹ erhuẹn ọshare ọvo, egbo ọvo, omogodẹ ọvo upene rẹ ẹgbukpe ọvo, re vwo ze izobo rẹ ẹtorhẹ;

⁷⁰ ẹkpro ọvo re vwo ze izobo rẹ umwemwu;

⁷¹ kugbe ọ rẹ izobo rẹ ufuoma, irhuẹn eshare ivẹ, egbo iyori, ẹkpro iyori; kugbe imigodẹ eshare iyori upene rẹ ẹgbukpe ọvo. Ọnana kọye dia izobo rẹ Ahieza rẹ ọmọ rẹ Ammishaddai.

⁷² Vwẹ ẹdẹ rẹ uhwọvo Pagiẹl rẹ ọmọ rẹ Ochran, osun rẹ ihwo rẹ Asha:

⁷³ izobo rọye da dia ọsete rẹ idọnọ ọfuanfon ọvo, rẹ ẹhọhọ rọye te shekẹl ujosan gbẹ ihwe, oze rẹ idọnọ ọfuanfon ọvo ri shekẹl ujorha gbẹ ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha rẹ ọka ra vwẹ evwri gua kugbe re vwo ze izobo rẹ ọka;

⁷⁴ egebule rẹ oro ọvo ri shekẹl ihwe, ro vọnre vẹ ugboduma;

⁷⁵ upene rẹ erhuẹn ọshare ọvo egbo ọvo, omogodẹ ọvo upene rẹ ẹgbukpe ọvo; re vwo ze izobo rẹ ẹtorhẹ

⁷⁶ ẹkpro ọvo re vwo ze izobo rẹ umwemwu;

⁷⁷ kugbe ọ rẹ izobo rẹ ufuoma, irhuẹn eshare ivẹ, egbo iyori, ẹkpro iyori, kugbe imigodẹ iyori upene rẹ ẹgbukpe ọvo. Ọnana kọye izobo ri Pagiẹl rẹ ọmọ rẹ Okran.

⁷⁸ Vwẹ ẹdẹ rẹ ihwivẹ Ahira rẹ ọmọ rẹ Enan, osun rẹ ihwo ri Naftali;

⁷⁹ izobo rọye da dia ọsete rẹ idọnọ ọfuanfon ọvo, rẹ ẹhọhọ rọye te shekẹl ujosan gbe ihwe, oze rẹ idọnọ ọfuanfon ọvo ri shekẹl ujorha gbe ihwe, kirobo ri shekẹl rẹ ẹshẹ na epha, ivivẹ na vọnre vẹ omamọ rẹ eyagha rẹ ọka ra vwẹ evwri gua kugbe re vwo ze izobo rẹ ọka;

⁸⁰ egebule rẹ oro ọvo ri shekẹl ihwe, rọ vọnre vẹ ugboduma;

⁸¹ upene rẹ erhuẹn ọvo, egbo ọvo, omogodẹ ọvo upene rẹ ẹgbukpe ọvo, re vwo ze izobo rẹ ẹtorhẹ;

⁸² ẹkpro ọvo rẹ vwo ze izobo rẹ umwemwu,

⁸³ kugbe re vwo ze izobo rẹ ufuoma, irhuẹn eshare ivẹ egho iyori, ẹkpro iyori, kugbe imigodẹ iyori upene rẹ ẹgbukpe ọvo. Ọnana kọye hẹ izobo rẹ Ahira rẹ ọmọ rẹ Enan.

⁸⁴ Ọnana kọye izobo rẹ irhierhie rẹ agbada na, vwẹ ẹdẹ ra vwọ vwẹ evwri te, nẹ obọ rẹ isun rẹ Izrẹl rhe: isete ihwivẹ rẹ idọnọ ọfuanfon, ize ihwivẹ rẹ idọnọ ọfuanfon egebule ihwivẹ rẹ oro.

⁸⁵ Ọsete rẹ idọnọ ọvuọvo rọ họhọ te shekẹl ujosan gbe ihwe kugbe oze ọvuọvo ujorha gbe ihwe, idọnọ ọfuanfon rẹ ekuakua na ejobi da dia shekẹl uriori ivẹ kugbe uri ivẹ, kirobo ri shekẹl rẹ ẹshẹ na epha

⁸⁶ egebule ihwivẹ rẹ oro na, vọnre vẹ ugboduma, rọ họhọ te shekẹl ihwihwe, kirobo ri shekẹl rẹ ẹshẹ na epha, oro rẹ igebule na ejobi da dia shekẹl ujosan;

⁸⁷ eranvwe ejobi rẹ izobo rẹ ẹtorhẹ da dia irhuẹn eshare ihwivẹ, egho ihwivẹ, imigodẹ ihwivẹ upene rẹ ẹgbukpe ọvo, vẹ izobo rẹ ọka rayen; kugbe ẹkpro ihwivẹ re vwo ze izobo rẹ umwemwu;

⁸⁸ kugbe eranvwe rẹ izobo rẹ ufuoma na da dia irhuẹn eshare uje gbe ẹne; egbo na ujorha, ẹkpro na ujorha, upene rẹ imigodẹ rẹ ẹgbukpe ọvo da dia ujorha. Ọnana kọye izobo rẹ irhierhie rẹ agbada na, vwẹ ọke ra vwọ vwẹ evwri ghworo nu.

⁸⁹ Ọke ri Mosis vwọ ro evun rẹ utughẹ ra da vwa oma na ra ta ota kẹ Ọrovwohwo, o de nyo urhuru rọ ta ota kẹ nẹ obenu rẹ akpanurhe rẹ arodọvwẹ rọ hẹ enu rẹ ekpeti rẹ iseri na, vwẹ uvwre ri chẹrobim ivẹ na; ọda ta ota kẹ.