Biblia Todo Logo
Bìoball air-loidhne

- Sanasan -

Ukeri 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ


A djẹ Erhi ri Jẹfuọn nẹ Evun rẹ Erhọn na

1 Ọrovwohwo da ta kẹ Mosis;

2 Ta kẹ ihwo rẹ Izrẹl nẹ ayen si ọhọnvwoti kọhọnvwoti, kugbe kohwo kohwo rẹ ọbara hwẹ nẹ oma cha, kugbe kohwo kohwo ejobi ro gbe ẹgua nẹ evun rẹ erhọn na; fikiridie ọ vwẹ oma te orivwi.

3 Wo si te ọshare te aye nẹ evun rẹ erhọn na rere ayen vwo je erhọn na emiovwo, vwẹ uherevie rẹ asan re me dia na.

4 Ihwo rẹ Izrẹl na de ghine ru ọtiọye, ayen da djẹ ihwo na nẹ evun rẹ erhọn na, kirobo rẹ Ọrovwohwo ta kẹ Mosis, ọtiọye ihwo rẹ Izrẹl ruru.


Urhi rẹ Erhan Rhivwi

5 Ọrovwohwo da ta kẹ Mosis,

6 Ta kẹ ihwo rẹ Izrẹl nẹ, ọke rẹ ọshare yẹrẹ aye de ru umwemwu rẹ ihwo ruẹ siẹ rẹ ayen de miovwo urhi rẹ esegbuyota rẹ Ọrovwohwo rẹ ohwo yena da re abe,

7 kọ fan umwemwu rọye ro ruru na; kọ hwa osa rẹ obo ro ru chọ na, ọ me vwẹ akoiyori vwọ ba, ọ me vwọ ba kẹ ohwo ro ru chọ na.

8 Ẹkẹvuọvo ohwo na rhe vwo omoni ra rhan emu rẹ orucho na kẹ-ẹ, emu rẹ oruehọ na ra cha rhan rhivwi na, ka rhan kẹ Ọrovwohwo ra vwọ kẹ orherẹn, ra vwẹ egbo rẹ arhuẹrẹ vwọ ba kọye a vwọ rhuẹrẹ vwọ kẹ.

9 Kizobo kizobo ejobi, emu ọfuanfon ejobi rẹ ihwo rẹ Izrẹl, reyọ vwo rhe orherẹn, kọ dia ọrọye.

10 Kohwo kohwo ro vwo emu ọfuanfon ejobi kọ dia ọrọye; kemu kemu ejobi rẹ ohwo vwọ kẹ orherẹn kọ dia ọrọye.


Urhi Kpahe Omaẹriọ

11 Ọrovwohwo da ta kẹ Mosis,

12 Ta kẹ ihwo rẹ Izrẹl, ọ da dianẹ aye rẹ ohwo yan ghwru ro de gbe ọfanrhiẹn rhurho,

13 ọ da dianẹ ohwo ọfa duro, rọ da djahọ kẹ ọshare rọye, yẹn a je mrẹ otọ rọye dede na yo miovwi oma rọye nure, yẹn a mrẹ ohwo ro se oseri muo-o, fikiridie ọ vabọ.

14 Ọ da dianẹ erhi rẹ omẹriọ da ro ọshare rọye oma; rọ da rioma kpahe aye rọye na ro miovwo oma rọye na; eyẹ ọ da dianẹ erhi rẹ omẹriọ de bro rhe, rọ da rioma kpahe aye rọye, dede na yo ji miovwo oma rọye-e na;

15 ọke yena ọshare na kọ reyọ aye na vwo rhe orherẹn ọ me reyọ izobo ra guọnọ vwẹ obọ rọye rhe, ẹkẹn ihwe rẹ iputusẹ rẹ ọka ri bali; o ku ọfigbo phihọ-ọ, o ji phi adjidja phihọ-ọ, fikiridie ọye izobo rẹ ọka rẹ omẹriọ, izobo rẹ ọka rẹ ẹkarohọ rọ nẹrhẹ a karohọ imwemwu.

16 Ọke yena orherẹn na ko sio kẹrẹ oma, o mi muo phihọ obaro rẹ Ọrovwohwo;

17 orherẹn na kọ reyọ ame ọfuanfon phihọ ẹvwẹrẹ, kọ ghwẹ ekpẹn rẹ utuwevwi rẹ ọgarivi na o mi phio phihọ evun rẹ ame na.

18 Orherẹn na ko phi aye na phihọ obaro rẹ Ọrovwohwo na, ọ me rhan ẹto rẹ uyovwi rẹ aye na, o mi mu izobo rẹ ọka rẹ ẹkaroho na phihọ obọ rọye, kọye izobo rẹ ọka rẹ omẹriọ na. Orherẹn na mi rhe mu ame phihọ obọ rọye kọye ame rọ yara korokoro rọ ghwẹ ekan yan.

19 Etiyin orherẹn na ko vwo duvwu iyori, tanẹ, ọ da dianẹ ọshare ọfa vẹ owẹ mroma, ọ da dianẹ wo gbe owọ phihọ aghwa vwo ru emu rẹ ẹgua, vwẹ ọke ru wọ vwọ otọ rẹ ogangan rẹ ọshare wẹn na, gbe jẹn ame nana rọ yara korokoro rọ ghwẹ ekan yan na rhiẹ wẹ.

20 Ẹkẹvuọvo wo de gbe owọ phihọ aghwa, dede na ye wọ otọ rẹ ogangan rẹ ọshare wẹn na, ọ da dianẹ wo gbe oma wẹn ẹgua-a, rẹ ohwo ọfa rọ dia ọshare wẹ-ẹn de nene uwe ru emu,

21 etiyin, (gbe jẹn orherẹn na vwẹ aye na duvwu iyori rẹ ekan na, re ọ ta kẹ aye na) Ọrovwohwo na ru we phihọ isọn kugbe iyori vwẹ ohri rẹ ihwo wẹn, vwẹ ọke rẹ Ọrovwohwo na da kpare owọ wẹn nu we ro de ru ekroma wẹn vwọ;

22 gbe jẹn ame nana rọ ghwẹ ekan cha na su ame vọn we evun rọ nẹrhẹ oma wẹn vwọ rere ekpoghowọ wẹn kpare nẹ uwe oma. Aye na kọ ta, Isẹ, Isẹ.

23 Ọrherẹn na mi re si ekan nana phihọ ẹbe rẹ ekan na, ọ me hworhẹ ayen phihọ ame rọ yara korokoro na;

24 kọ vwẹ ame rọ yara korokoro na rọ ghwẹ ekan cha na vwọ kẹ aye na da. Ame na rọ ghwẹ ekan cha na kọ ro evun rọye kọ miavwọ gangan.

25 Ọrherẹn na me reyọ izobo rẹ ọka rẹ omẹriọ nẹ obọ rẹ aye na, kọ kpogho izobo rẹ ọka na vwẹ obaro rẹ Ọrovwohwo na ro ki muo rhe enu rẹ agbada na;

26 orherẹn na me ghwẹ ẹkuobọ rẹ izobo rẹ ọka na; rọ dia ẹkẹn rẹ ẹkarohọ, ọ me torhẹ vwẹ enu rẹ agbada na, o de ru nu ọ me rha vwẹ ame na kẹ aye na da.

27 Ọke rọ da vwẹ ame na kẹ da nure, etiyin, ọ da dianẹ o gbe oma rọye ẹgua rọ de gbe ọfanrhiẹn rhurhu ọshare rọye, ame rọ ghwẹ ekan cha na kọ ro evun rẹ oma rọye kọ miavwọ gangan, oma roye kọ vwọ ekpoghowọ rọye kọ kpare she kufia, aye na ko che hirhe phihọ isọn vwẹ uherevie rẹ ihwo rọye.

28 Ẹkẹvuọvo aye na rhe gbe oma rọye ẹgua-a rọ da fon, kọ dia phrẹrẹ kọ sa mrevun ro de vwiẹ emọ.

29 Ọnana kọye urhi rẹ omẹriọ, rọ da dianẹ aye, rọ otọ rẹ ogangan rẹ ọshare, o de dje owọ phihọ aghwa ro de gbe oma rọye ẹgua,

30 eyẹ vwẹ ọke rẹ erhi rẹ omẹriọ de bru ọshare na rhe rọ da rioma kpahe aye rọye; etiyin ko phi aye na phihọ obaro rẹ Ọrovwohwo na, orherẹn na kọ vwẹ urhi nana ejobi vwo muo.

31 Oshare na kọ vabọ rẹ orukuruku nana phrẹrẹ, ẹkẹvuọvo aye na kọ ghwa oghwa rẹ orukuruku rọye.

Bible in Urhobo © United Bible Societies, 1977.

Bible Society of Nigeria
Lean sinn:



Sanasan