Ukeri 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Unu kugbe iruo rẹ ihwo ri Livae na

¹ Enana keye uvwiẹ rẹ Erọn vẹ Mosis vwẹ ọke rẹ Ọrovwohwo vwọ ta ota kẹ Mosis vwẹ enu rẹ ugbenu ri Sinae.

² Enana keye edẹ rẹ emọ rẹ Erọn: Nadab rẹ ọmọ ọkpako, Abihu, Eleazar vẹ Itamar;

³ enana keye rha edẹ rẹ emọ rẹ Erọn ra vwẹ evwri ghworo nẹ e dia irherẹn, ri gbe odibo vwẹ ẹdia rẹ irherẹn na.

⁴ Ẹkẹvuọvo Nadab vẹ Abihu de ghwu vwẹ obaro rẹ Ọrovwohwo vwẹ ọke rẹ ayen vwọ vwẹ erhanre ze izobo rẹ ẹgua vwẹ obaro rẹ Ọrovwohwo vwẹ evun rẹ aton ri Sinae; ẹkẹvuọvo ayen vwe emọ-ọ. Kọye, Ẹleazar vẹ Itamar de gbe odibo kerẹ irherẹn vwẹ ọke rẹ Erọn rẹ ọsẹ rayen vwọ akpọ.

⁵ Etiyin Ọrovwohwo da ta kẹ Mosis,

⁶ Reyọ orua ri Livae kẹroma, wo vwẹ ayen vwo mudia vwẹ obaro rẹ Erọn rẹ orherẹn na rere ayen gbe odibo kẹ.

⁷ Kẹ ayen ru iruo vwọ kẹ kugbe ukoko na ejobi vwẹ evun rẹ utughẹ ra da vwa oma na, kirobo rẹ ayen gbe odibo vwẹ obo ọgarivi na;

⁸ kẹ ayen vwẹ ẹro te ekuakua ra vwọ rhuẹrẹ utughẹ ra da vwa oma na; ji ru iruo kẹ ihwo rẹ Izrẹl kirobo rẹ ayen gbe odibo vwẹ obo ọgarivi na.

⁹ Ko wọ vwẹ ihwo ri Livae na vwọ kẹ Erọn vẹ emọ rọye; a vwẹ ayen kẹ tototo vwẹ ohri rẹ ihwo rẹ Izrẹl na.

¹⁰ Ku wọ vwẹ Erọn vẹ emọ rọye vwo mu, kẹ ayen ru iruo rẹ orherẹn rayen; ẹkẹvuọvo ohwo ọvo de rhi bi kẹrẹ ayen, ka teyọ ohwo na hwe.

¹¹ Etiyin Ọrovwohwo da ta kẹ Mosis.

¹² Nighere, me reyọ ihwo ri Livae nẹ uherevie rẹ ihwo rẹ Izrẹl nẹ e dia ẹdia rẹ ewanra re bẹrẹ urhoro rẹ ihwo rẹ Izrẹl na. Ihwo ri Livae na ke dia emẹ,

¹³ kidie ewanra na ejobi emẹ; vwẹ ẹdẹ ri mi vwo hwe ewanra na ejobi vwẹ otọ rẹ Ijipt, mi de ru ewanra rẹ Izrẹl na ejobi fuanfọn vwọ kẹ oma mẹ, te ọwanra rẹ ohwo te ọ rẹ eranvwe; ke dia emẹ: Mẹvwẹ Ọrovwohwo na.

¹⁴ Ọrovwohwo da ta kẹ Mosis vwẹ evun rẹ aton ri Sinae.

¹⁵ Kere emọ ri Livae, vwẹ unuwevwi rẹ esẹ na kugbe ekrekru; kọshare kọshare nẹ emeranvwe ọvo kpenu ku wo kere.

¹⁶ Etiyin Mosis de kere ayen kirobo rẹ ota rẹ Ọrovwohwo epha, kirobo re ji urhi kẹ.

¹⁷ Enana keye emọ ri Livae ododẹ rayen: Gershọn kugbe Kohat kugbe Merari.

¹⁸ Enana keye rha odẹ rẹ emọ ri Gershọn vwẹ ekrekru rayen: Libni kugbe Shimei.

¹⁹ Kugbe emọ ri Kohar vwẹ ekrekru rayen: Amram, Izhar, Hibrọn, kugbe Uzziel.

²⁰ Kugbe emọ ri Merari vwẹ ekrekru rayen: Mahii kugbe Mushi. Enana keye ekru rẹ ihwo Livae, vwẹ uwevwi rẹ esẹ rayen.

²¹ Orua ri Gershọn, ọye ihwo ri Libni vẹ Shime nurhe: enana keye ekru ri Gershọn.

²² Unu rayen kirobo rẹ unu rẹ eshare rayen ejobi epha nẹ emeranvwe ọvo kpenu da dia uriori ighwrẹn kugbe ujori iyori.

²³ Orua ri Gershọn keye ri mu erhọn phihọ obuko rẹ ọgarivi vwẹ obuko ọnre,

²⁴ Eliasaf, rẹ ọmọ ri Laẹl kọye olori rẹ uwevwi rẹ esẹ rẹ emọ ri Gershọn.

²⁵ Ẹkẹn iruo ro te emọ ri Gershọn vwẹ utughẹ ra da vwa oma na da dia ọgarivi na, utughẹ na kugbe obo re vwo rhurho, kugbe amwa ra vwọ ghare anurhoro rẹ utughẹ ra da vwa oma na,

²⁶ osirhere rẹ ọguan na, amwa ra vwọ ghare anurhoro rẹ ọguan na rọ riariẹ ọgarivi na kugbe agbada na, kugbe ifi rọye; kugbe ẹkẹn iruo ro te enana ejobi.

²⁷ Orua ri Kohat ọye je orua rẹ Amram kugbe orua rẹ Izhar kugbe orua ri Hibrọn kugbe orua rẹ Uzzi; enana ejobi kẹ orua ri Kohat.

²⁸ Kere unu rẹ eshare na ejobi, kẹ emeranvwe ọvo kpenu da dia uriori erẹnrẹn kugbe ujori esan, ri ruẹ iruo rẹ odibo egbe vwẹ ẹshẹ na.

²⁹ Orua rẹ emọ ri Kohat na ki mu erhọn phihọ obuko ọnre rẹ ọgarivi na,

³⁰ vẹ Elizafan rẹ ọmọ rẹ Uzziẹl rẹ olori rẹ uwevwi rẹ esẹ rẹ orua ri Kohat.

³¹ Ẹkẹn irua rayen kẹ emuo rẹ ekpeti rẹ ọphọ na, kugbe imẹjẹ, ogburhukpẹ na, agbada na, ekuakua re enu rẹ ẹshẹ na rẹ irherẹn na vwo gbe odibo, kugbe amwa rẹ ogharọ, kugbe ẹga ra ga kẹ enana ejobi na.

³² Etiyin Eleazar rẹ ọmọ rẹ Erọn rẹ orherẹn na kọye re dia olọri vwẹ enu rẹ isun ri Livae, rere ọ rha vwẹ ẹro te ihwo re vwo mu vwẹ enu rẹ iruo rẹ ẹshẹ na.

³³ Merari kọye orua ri Mahii kugbe orua ri Mushi: enana keye orua ri Merari.

³⁴ Unu rayen kirobo rẹ unu rẹ eshare rayen epha nẹ emeranvwe ọvo kpenu da dia uriori esan kugbe ujori ivẹ.

³⁵ Olori rẹ uwevwi rẹ esẹ rẹ orua ri Merari da dia Zuriel rẹ ọmọ rẹ Abihail; kẹ ayen mu erhọn phihọ obohwẹre ọnre rẹ ọgarivi na.

³⁶ Ẹkẹn iruo ra ghare te emọ ri Merari da dia egbẹn rẹ anurhoro rẹ ọgarivi na, te ephapha rọye vẹ ichivwo rọye, tẹ obesiri rọye kugbe ekuakua rọye ejobi; kugbe obo ra vwẹ ekuakua nana ruẹ ejobi.

³⁷ Ji kugbe ichivwo re riariẹ ọguan na phihọ ejobi, vẹ esiri rọye kugbe ekanrọ vẹ ifi na ejobi.

³⁸ Ayen ihwo ri che mu erhọn phihọ obaro rẹ ọgarivi na vwẹ obaro ọnre, vwẹ obaro rẹ utughẹ ra da vwa oma na vwẹ ẹbẹre rẹ ọnre da vacha, ki Mosis vẹ Erọn kugbe emọ rọye, keye ri vwo iruo rẹ egagọ rẹ asan ẹshẹ na, kemu kemu re che ru kẹ ihwo rẹ Izrẹl ejobi; ohwo kohwo ro bi kẹrẹ etiyin ejobi ka teyọ hwe.

³⁹ Ihwo ri Livae re keri ejobi, ri Mosis vẹ Erọn keri kirobo rẹ Ọrovwohwo ji urhi kẹ ayen, oruorua, eshare ejobi nẹ emeranvwe ọvo kpenu, da dia uriori uje gbẹ ivẹ.

Ihwo ri Livae na kugbe Etanhirhe rẹ Emekpako na

⁴⁰ Ọrovwohwo da ta kẹ Mosis, Kere ewanra rẹ ihwo rẹ Izrẹl nẹ emeranvwe ọvo kpenu wo mi keri unu rayen kugbe odẹ rayen.

⁴¹ Ku wọ reyọ Livae na kẹ vwẹ– mẹvwẹ ọye Ọrovwohwo– vwẹ ẹdia re ewanra rẹ ihwo rẹ Izrẹl, kugbe uchuru rẹ ihwo ri Livae vwẹ ẹdia rẹ utuvwiẹ ejobi vwọ ohri re uchuru rẹ ihwo rẹ Izrẹl.

⁴² Etiyin Mosis de kere ewanra rẹ ohri rẹ ihwo rẹ Izrẹl ejobi, kirobo rẹ Ọrovwohwo ta kẹ.

⁴³ Ewanra na ejobi, kirobo rẹ unu rẹ edẹ rayen epha, nẹ emeranvwe ọvo kpenu kirobo re kere ayen da dia uriori uje gbẹ ivẹ kugbe ujori ivẹ gbẹ ujorha gbẹ ihwerha.

⁴⁴ Ọrovwohwo da ta kẹ Mosis,

⁴⁵ Reyọ ihwo ri Livae na phihọ ẹdia rẹ ewanra vwẹ ohri rẹ ihwo rẹ Izrẹl na kugbe uchuru rẹ ihwo ri Livae na phihọ ẹdia rẹ eranvwe rayen; okpuyovwi rẹ ihwo ri Livae ke dia emẹ: Mẹvwẹ ọye Ọrovwohwo.

⁴⁶ Vwẹ ẹtanhirhe rẹ ihwo ujori ivẹ gbe ujuvẹ gbe ihwerha rẹ ewanra rẹ ihwo rẹ Izrẹl na, ko bu vrẹn unu rẹ eshare rẹ ihwo ri Livae na,

⁴⁷ ku wọ reyọ shekẹl iyori sansan; ra vwẹ shekẹl rẹ ẹshẹ na kere; shekẹl ri gera uje, ku wọ reyọ ayen,

⁴⁸ ku wọ reyọ igho re gba chekọ vwẹ oma rẹ etantan vwọ kẹ Erọn vẹ emeshare rọye.

⁴⁹ Ọtiọyẹ Mosis da reyọ igho rẹ ẹtanhirhe na mie ayen otu rẹ e gba chekọ vwẹ enu rayen ihwo ri Livae tanhirhe na;

⁵⁰ o de mie emekpako rẹ ihwo rẹ Izrẹl igho na, shekẹl uriori gbẹ ujori erha gbẹ ujorha gbẹ iyori ra vwẹ shekẹl re ẹshẹ na keri.

⁵¹ Mosis da vwẹ igho rẹ etanhirhe na kẹ Erọn kugbe emọ rọye, kirobo rẹ ota rẹ Ọrovwohwo epha, kerẹ urhi rẹ Ọrovwohwo ji kẹ Mosis.